اقش پرەزيدەنتى دونالد ترامپ يراننىڭ قۇرلىقتاعى شەكارالارى مەن كاسپي تەڭىزى ارقىلى قارۋ-جاراق تاسىمالداۋىنا جول بەرمەۋگە باعىتتالعان Iron Gate («تەمىر قاقپا») بولىمشەسىنىڭ جۇمىسىن باستاعانىن مالىمدەدى، دەپ حابارلايدى «ادىرنا» ءتىلشىسى.
بۇعان دەيىن اقش قارۋلى كۇشتەرىنىڭ ورتالىق قولباسشىلىعى يراننىڭ قارۋ-جاراق، قوس ماقساتتا پايدالانىلاتىن تەحنولوگيالار مەن سانكتسياعا ىلىككەن ماتەريالداردى تاسىمالداۋىنا توسقاۋىل قويۋ جۇمىستارىن ۇيلەستىرۋ ءۇشىن ارنايى جۇمىس توبى قۇرىلعانىن ايتقان ەدى. قۇرامىندا 20-عا جۋىق اسكەري قىزمەتكەر مەن ازاماتتىق مامان بار توپ فلوريدا شتاتىنداعى تامپا قالاسىندا ورنالاسقان. ال يران قارۋلى كۇشتەرىنىڭ قۇرامىنا كىرەتىن يسلام رەۆوليۋتسياسى ساقشىلار كورپۋسىنىڭ رەسمي وكىلى حوسەين موحەبي Iron Gate بولىمشەسى كوزدەگەن ماقساتىنا جەتە المايتىنىن مالىمدەگەن.
«Iron Gate جەدەل توبى يران يسلام رەسپۋبليكاسىندا تولىق قۋاتتا جۇمىس ىستەپ جاتىر. بۇل شارا تاريحتاعى ەڭ اۋقىمدى اسكەري-تەڭىز بلوكاداسىمەن ۇشتاسىپ، يرانعا تاۋارلاردىڭ ءىس جۇزىندە جەتكىزىلمەۋىنە جانە ەلدەن ءونىم شىعارۋدىڭ دەرلىك توقتاۋىنا اكەلىپ وتىر»، – دەپ جازدى دونالد ترامپ Truth Social الەۋمەتتىك جەلىسىندەگى پاراقشاسىندا.
28 اقپاندا اقش پەن يزرايل يران اۋماعىنداعى نىساندارعا سوققى جاساي باستاعان. بۇعان جاۋاپ رەتىندە يران دا قارسى شابۋىلدار جاساعان. قازىرگى ۋاقىتتا قاقتىعىس باسەڭدەگەنىمەن، ءالى دە رەتتەلمەگەن كۇيدە قالىپ وتىر. سونىمەن قاتار اسكەري ءىس-قيمىلداردىڭ قايتا باستالۋ قاۋپى بار.
