اقش پرەزيدەنتى دونالد ترامپ ۋكرايناداعى سوعىستى اياقتاۋعا باعىتتالعان بەيبىت كەلىسىمگە جاقىن ارادا قول جەتكىزىلۋى مۇمكىن ەكەنىن مالىمدەدى. سونىمەن قاتار ول كەلىسىم ناتيجەسىندە ۋكراينانىڭ مەملەكەتتىك شەكاراسى وزگەرۋى ىقتيمال ەكەنىن تىلگە تيەك ەتتى. بۇل تۋرالى ول YouTube جەلىسىندەگى 60 Minutes ارناسىنا بەرگەن سۇحباتىندا ايتتى، دەپ حابارلايدى «ادىرنا» ءتىلشىسى.
جۋرناليست ترامپتىڭ بيلىككە كەلگەن كەزدە ۋكرايناداعى سوعىستى توقتاتۋعا ۋادە بەرگەنىن، الايدا سوعىس ءالى دە جالعاسىپ جاتقانىن اتاپ ءوتتى. وسىعان بايلانىستى جۇرگىزۋشى پرەزيدەنتتەن بەيبىتشىلىككە قول جەتكىزۋگە كەدەرگى بولىپ وتىرعان باستى سەبەپتى سۇرادى.
«زەلەنسكي مەن ءپۋتيننىڭ اراسىنداعى وشپەندىلىك… ەگەر مەن پرەزيدەنت بولعانىمدا، بۇل سوعىس ەشقاشان باستالماس ەدى. بۇعان ەشقانداي مۇمكىندىك بولماس ەدى. الايدا سوعىس باستالىپ كەتتى. مەنىڭ ويىمشا، ءبىز كەلىسىمگە قول قويۋعا وتە جاقىنبىز»، – دەپ جاۋاپ بەردى ترامپ.
اقش باسشىسىنان ۋكراينا پرەزيدەنتى ۆلاديمير زەلەنسكيگە مە، الدە رەسەي پرەزيدەنتى ۆلاديمير پۋتينگە مە كوبىرەك سەنەتىنى سۇرالدى. الايدا ترامپ بۇل سۇراققا تىكەلەي جاۋاپ بەرمەدى. ونىڭ ايتۋىنشا، ەكى كوشباسشىمەن دە قارىم-قاتىناسى جاقسى جانە ولاردىڭ كەزدەسۋى جوسپارلانعان. اڭگىمە 10–11 قاراشادا ابۋ-دابيدە وتەدى دەپ جوسپارلانعان ۋكراينا، اقش جانە رەسەي اراسىنداعى كەلىسسوزدەر تۋرالى بولۋى مۇمكىن.
بۇدان كەيىن ترامپ سوعىستىڭ اياقتالۋىنا سەبەپ بولاتىن جالعىز ادام – ءوزى ەكەنىن ايتتى.
جۋرناليست زەلەنسكيدىڭ رەسەي ۋكرايناعا باسىپ كىرگەندىكتەن پۋتينگە دەگەن وشپەندىلىگى تۇسىنىكتى ەمەس پە دەگەن ساۋال قويدى.
ء«يا، مۇنى تۇسىنۋگە بولادى. بىراق مۇنىڭ ءبارى وتە كۇردەلى بولدى… ولاردىڭ العاشقى كەزدەسۋى كەزىندە رەسەي ۇلكەن قۇرمەتسىزدىككە تاپ بولدى. سوندىقتان بۇل تۋرالى ەشتەڭە ايتپايمىن… مەن پرەزيدەنت بولعان ءتورت جىل ىشىندە (2016–2020 جىلدارداعى العاشقى پرەزيدەنتتىك مەرزىمى – رەد.) بۇل سوعىس باستالعان جوق. پۋتين مۇنى قاتتى قالاعانىمەن، سوعىس ەشقاشان باستالماس ەدى»، – دەدى اق ءۇي باسشىسى.
جۋرناليست ترامپتىڭ بەيبىت كەلىسىم جاقىن ارادا جاسالاتىنىن قايتا-قايتا ايتاتىنىن، الايدا ءىس جۇزىندە وعان كەدەرگى كەلتىرىپ وتىرعان تاراپ پۋتين بولۋى مۇمكىن ەكەنىن ەسكە سالدى. سونداي-اق ۋكرايناعا كورسەتىلەتىن كومەكتىڭ توقتاتىلۋى جانە رەسەيمەن جاسالعان ديزەل وتىنىنا قاتىستى كەلىسىم تۋرالى سۇراقتار قويىلدى. بۇعان جاۋاپ رەتىندە ترامپ ءوزىنىڭ رەسەيگە قاتىستى ۇستانىمى قاتاڭ ەكەنىن مالىمدەدى.
«رەسەيگە مەنەن ارتىق قاتاڭ ساياسات جۇرگىزگەن ەشكىم جوق… ساۋدا سالاسىندا ولارعا قاتىستى نە ىستەگەنىمە، قانداي سانكتسيالار ەنگىزگەنىمە جانە باسقا دا شارالارىما قاراڭىزدار… مەن ديزەل وتىنىنا سالىنعان سانكتسيالاردى الىپ تاستاعان جوقپىن. رەسەيگە مۇناي مەن ديزەل وتىنىن اقش-قا ەمەس، بۇكىل الەمگە جەتكىزۋگە رۇقسات بەردىم. الەمگە مىڭداعان باررەل مۇناي مەن ديزەل وتىنى قاجەت بولدى… مەنىڭ نە ىستەگەنىمە قاراڭىزدار. “وباما ولارعا (ۋكرايناعا – رەد.) كورپە بەردى، ال مەن تانكىگە قارسى قارۋ بەردىم” دەگەن ەسكى ءسوز بار. مەن ولارعا وسىنداي قارۋدىڭ مىڭداعان داناسىن جەتكىزدىم»، – دەپ اتاپ ءوتتى اقش پرەزيدەنتى.
