بەلگىلى زاڭگەر، قورعاۋشى ابزال قۇسپان ءوزىنىڭ فەيسبۋك پاراقشاسىندا ارنايى بارىپ الىبيمەن جولىققانىن، الداعى اپتا ءالىبيدىڭ ىسىنە قاتىستى مالىمدەمە جاسايتىنىن جەتكىزدى دەپ حابارلايدى "ادىرنا" ۇلتتىق پورتالى.
"جولدا ۇزاق جۇرگەندە، كەي جەردە جاعدايىڭ بولادى، كەي جەردە تابىلا بەرمەيدى. كەشە جاۋىرىن تۇسىمنان شانشۋ قادالعانىن انىق سەزىندىم. تۇسكە تامان تۇشكىرۋىم جيىلەي باستادى، بىراق، “الىبيگە بارامىن، جاعدايىن ءوز كوزىممەن كورەمىن”- دەگەن ۋادە بار، ال ۋادە قازاق ءۇشىن - قۇداي ءسوزى!
سودان الماتىدان قىزىلورداعا ۇشىپ شىقتىم. ۇشاقتان تۇسە سالا، قىزىلوردا ۋاقىتىمەن 14.00-دە ءالىبي جازاسىن وتەپ جاتىرعان “زكو 169/5” مەكەمەسىنىڭ الدىندا تۇردىم. سويتسەم، ولاردا تۇستەن كەيىن جۇمىس 15.00-دە باستالادى ەكەن، ىشكە كىرۋى بار، ىشتەن ءالىبيدى “تابۋدىڭ” تۋدىرعان قيىندىعى بار، ءسال اشۋ شاقىرىپ، ايقايعا سالعانىم بار، الىبيمەن كەشكى 5-تەن كەتە كەزدەسۋدىڭ ءساتى ءتۇسىپ، 18.00-دە شىققانىمدا اۋرۋعا السىزدىك قوسىلىپ، ەندى ەم الماسام جاعدايىمنىڭ ناشارلايتىنىن تولىق سەزىندىم.
... سوندىقتان دا كەشە ساقتىق جاساپ قىزىلوردادان الماتىعا پويىزعا بيلەت الدىم. بارىسىمەن الىبيگە قاتىستى مالىمدەمە جاسايمىن دەپ وتىرمىن. نەگىزى، كەشە كولونيادان شىعا سالا سول جەردە جاسايمىن دەپ ويلاعام، وعان دەنساۋلىق جاعدايى بولمادى، بۇگىن-ەرتەڭ سەنبى، ءارى پويىزدا بولامىن، سوندىقتان قۇداي قالاسا دۇيسەنبى-جۇمىس كۇنى دەپ وتىرمىن!", — دەدى قورعاۋشى (قورعاۋشىنىڭ ءسوزىن ەش وزگەرىسسىز بەرىپ وتىرمىز-رەد).
ايتا كەتۋ كەرەك، بۇعان دەيىن ينستاگرام پاراقشاسىندا بەلگىلى ءانشى مەرۋەرت تۇسىپباەۆا الىبيگە قاتىستى ءىستى ابزال قۇسپان ءوز قولىنا الاتىنىن ايتقان بولاتىن.
"ادىرنا" ۇلتتىق پورتالى.
