Bank RBK-نىڭ ەكس-باسشىسى جومارت ەرتاەۆ تۇرمەگە قايتا وتىرادى. بۇل تۋرالى 1 قازاندا ءماجىلىس دەپۋتاتى، ادۆوكات ابزال قۇسپان ايتتى، دەپ حابارلايدى «ادىرنا» ءتىلشىسى.
«ەرتاەۆقا قاتىستى سوت قاۋلىسى بۇزىلدى. ءوتىنىشىمدى قولداپ، ءادىل شەشىمگە ىقپال ەتكەن قر باس پروكۋراتۋراسى الماتى وبلىسىنىڭ پروكۋرورى مەن سوتىنا، سونداي-اق ماسەلەنى العاش كوتەرگەن جۋرناليستەر قاۋىمىنا العىس ايتامىن!» - دەدى ول.
ەسكە سالايىق، 2020 جىلدىڭ قاراشاسىندا بۇرىنعى بانكير جومارت ەرتاەۆ Bank RBK-تەن 144 ميلليارد تەڭگە ۇرلاعانى ءۇشىن 11 جىلعا باس بوستاندىعىنان ايىرىلعان. ونىمەن بىرگە تاعى 35 ادام سوتتالعان ەدى. ال ەكىنشى قىلمىستىق ءىس بويىنشا سوت ۇكىمى 2021 جىلى شىققان. ول قىلمىستىق توپ قۇرعانى جانە الاياقتىق جاساعانى ءۇشىن كىنالى دەپ تانىلىپ، 9 جىلعا باس بوستاندىعىنان ايىرىلعان. جالپى العاندا ەرتاەۆ 20 جىل بويى جازاسىن وتەۋى كەرەك بولعان.
2025 جىلدىڭ 3 قىركۇيەگىندە ونىڭ راقىمشىلىققا ىلىگىپ، بوستاندىققا شىققانى ايتىلعان بولاتىن.
