ءماجىلىس دەپۋتاتى ابزال قۇسپان قىتايدان اكەلىنگەن گيبريدتى اۆتوكولىكتەرگە قاتىستى تۋىنداعان رەزونانستان كەيىن مەملەكەتتىك كىرىستەر كوميتەتىن قاتاڭ سىنعا الدى، دەپ حابارلايدى «ادىرنا» ءتىلشىسى.
«مەنىڭ دەپۋتاتتىق ساۋالىم جۇزدەگەن قازاقستاندىق وتباسى مەن كاسىپكەرلەر تاپ بولعان كۇردەلى جاعدايعا بايلانىستى. بۇعان مەملەكەتتىك كىرىستەر ورگاندارىنىڭ زاڭسىز ءارى اگرەسسيۆتى ارەكەتتەرى سەبەپ بولدى. اڭگىمە BYD DESTROYER 05 ماركالى تانىمال گيبريدتى كولىكتەرگە قاتىستى كەدەندىك باجدار مەن ايىپپۇلداردىڭ «كەرى كۇشپەن» جاپپاي ەسەپتەلۋى تۋرالى بولىپ وتىر. بۇل كەيس – مەملەكەت باسشىسى جۇيەلى تۇردە ىلگەرىلەتىپ وتىرعان «زاڭ مەن ءتارتىپ» قاعيداتىنىڭ ماڭىزىن ايقىن كورسەتەتىن مىسال. مۇندا ازاماتتاردىڭ قۇقىعى، قۇقىقتىق ايقىندىق جانە مەملەكەتكە دەگەن سەنىم بارلىق مەملەكەتتىك ورگاندار ءۇشىن ءسوزسىز باسىمدىق بولۋى ءتيىس»، – دەدى قۇسپان دەپۋتاتتىق ساۋالىندا.
زاڭگەر كونستيتۋتسياعا سايكەس ازاماتتاردىڭ جاعدايىن ناشارلاتاتىن نورمالارعا كەرى كۇش بەرۋگە بولمايتىنىن ەسكە سالدى. الايدا ونىڭ سوزىنشە، ءىس جۇزىندە كەيبىر مينيسترلىك، ۆەدومستۆولار مەن وڭىرلىك دەپارتامەنتتەر زاڭدى تەك بيۋدجەت مۇددەسىنە قاراي ءتۇسىندىرىپ، قاراپايىم ازاماتتاردىڭ قۇقىعىن ەلەمەي وتىر.
«جەرگىلىكتى شەنەۋنىكتەر بۇگىن ءبىر نارسەگە رۇقسات بەرىپ، ەرتەڭ ويلارىن وزگەرتىپ، كەشە وزدەرى بەكىتكەن ەرەجەلەر بويىنشا ازاماتتاردى جازالاي الادى دەپ ەسەپتەيدى. مۇنداي تاجىريبە قوعامنىڭ مەملەكەتكە دەگەن سەنىمىن السىرەتەدى جانە پرەزيدەنت جۇرگىزىپ وتىرعان قۇقىقتىق رەفورمالاردىڭ مانىنە قايشى كەلەدى. ازامات ۆەدومستۆولىق حاوستىڭ قۇربانى بولماۋى ءتيىس»، – دەدى قۇسپان.
گيبريد كولىكتەرگە قاتىستى جاعدايعا توقتالعان دەپۋتاتتىڭ ايتۋىنشا، ازاماتتار مەن يمپورتتاۋشىلار كولىكتى كەدەندىك راسىمدەۋدەن بۇرىن مەملەكەتتىك كىرىستەر دەپارتامەنتىنە جۇگىنگەن. كەدەن ورگاندارى رەسمي مەملەكەتتىك ساراپتاما جۇرگىزىپ، قوزعالتقىش قۋاتىن ولشەپ، تاۋاردى جىكتەۋ جونىندە الدىن الا رەسمي شەشىم بەرگەن. سول قۇجاتقا سايكەس بۇل كولىكتەرگە كەدەندىك باج 0% بولعان.
«ازاماتتار مەملەكەتكە سەنىپ، كەدەن تالاپ ەتكەندەي دەكلاراتسيانى تولتىرىپ، بارلىق تولەمدى تولەپ، ءنومىر العان. بىراق ءبىراز ۋاقىتتان كەيىن سالىق جانە كەدەن ورگاندارى كەنەتتەن ءوز شەشىمىن وزگەرتىپ، «قاتەلەستىك» دەدى. ەندى وتكەن كەزەڭدەر ءۇشىن ميلليونداعان تەڭگە تولەۋدى تالاپ ەتىپ وتىر»، – دەدى زاڭگەر.
ونىڭ ايتۋىنشا، بۇل ەسەپتەۋلەردىڭ نەگىزى رەتىندە تاۋەلسىز جاڭا ساراپتاما ەمەس، New Energy Vehicles Kazakhstan اتتى كوممەرتسيالىق كومپانيانىڭ حاتى الىنعان. دەپۋتات بۇل كومپانيانىڭ باسەكەلەستەردى نارىقتان ىعىستىرۋعا مۇددەلى ەكەنىن ايتىپ، مۇددەلەر قاقتىعىسى بار بولۋى مۇمكىن ەكەنىن جەتكىزدى.
سونىمەن قاتار ول مەملەكەتتىك كىرىستەر ورگاندارى ازاماتتاردىڭ بانكتىك شوتتارىن الدىن الا ەسكەرتۋسىز بۇعاتتاپ، زاڭدى تۇردە شاعىمدانۋ قۇقىعىن پايدالانۋعا مۇمكىندىك بەرمەگەنىن اتاپ ءوتتى.
«400-دەن استام وتباسى، 5 مىڭنان استام ازامات زارداپ شەكتى. شوتتار بۇعاتتالىپ، بيزنەس توقتادى، ادامدار اۋىر الەۋمەتتىك جاعدايعا ءتۇستى»، – دەدى قۇسپان.
ول قارجى مينيسترىنە رەسمي ساۋال جولداعانىن، بىراق ماسەلەنى مينيسترلىك دەڭگەيىندە شەشۋدىڭ ورنىنا ونى مكك توراعاسىنىڭ ورىنباسارى دەڭگەيىندە قاراۋدى ۇسىنعانىن ايتتى. دەپۋتات مۇنى ازاماتتاردىڭ ماسەلەسىنە سالعىرت قاراۋ دەپ باعالادى.
ماسەلە قوعامدا كەڭ رەزونانس تۋدىرعان. وسىعان بايلانىستى ول پارلامەنت پەن دەپۋتات مارتەبەسى تۋرالى كونستيتۋتسيالىق زاڭنىڭ 27-بابىنا سۇيەنە وتىرىپ، بىرقاتار شارا قابىلداۋدى سۇرادى:
- مكك باسشىلىعى مەن وڭىرلىك دەپارتامەنتتەرگە قاتىستى قىزمەتتىك تەكسەرىس جۇرگىزۋ;
- زاڭسىز شەشىمدەردى جويۋ جانە سوتقا دەيىن ازاماتتاردىڭ شوتتارىن دەرەۋ بۇعاتتان شىعارۋ;
- سالىق ورگاندارىنىڭ ءبىر كومپانياعا ارتىقشىلىق بەرىپ، باسەكەلەستىكتى شەكتەۋ فاكتىلەرىن تەكسەرۋ.
سونداي-اق ول بۇل جاعدايعا جول بەرگەن لاۋازىمدى تۇلعالاردى قاتاڭ جاۋاپكەرشىلىككە تارتۋدى تالاپ ەتتى.
ەسكە سالايىق، بۇعان دەيىن قازاقستاندا قىتايدان اكەلىنگەن گيبريد كولىكتەر يەلەرىنە قوسىمشا سالىقتار ەسەپتەلگەنى تۋرالى اقپارات تاراعان ەدى. سونداي-اق الەۋمەتتىك جەلىلەردە شوتتاردىڭ بۇعاتتالعانى تۋرالى حابارلامالار تاراعان، الايدا مكك بۇل اقپاراتتى جوققا شىعارعان بولاتىن.
