تىنىش ءومىر سۇرگىڭ كەلە مە؟ ءوسىپ-ونگىڭ كەلە مە؟ وندا وندىرىسكە جولاما! بۇل پىكىردى زاڭگەر ابزال قۇسپان جۋرناليست نارتاي ارالبايۇلىنا بەرگەن سۇحباتىندا ايتتى، دەپ حابارلايدى “ادىرنا” ۇلتتىق پورتالى.
زاڭگەردىڭ ايتۋىنشا، وندىرىسكە جولاۋ - قاۋىپ.
“بەيسەنباەۆتىڭ ءىسىن الىپ قارايىقشى. قىزىلوردا وبلىسىندا امەريكاندىق كومپانيالارمەن بىرىگىپ، اينەك زاۋىتىن سالىپ جاتتى. مىنە، ءبىتىپ، 90%-ى قالدى دەپ جاتقان كەزدە انتيكور قىلمىستىق ءىس قوزعايدى. بۇكىل جۇمىستى توقتاتىپ تاستايدى، ءىس قۇجاتتارىن تارتىپ الادى. سوسىن قىلمىستىق ءىس سوتقا دەيىن جەتەدى. ەل-جۇرت ونىڭ دەتالدارىن بىلمەيدى. ويتكەنى، سوتتا نە بولىپ جاتقانى ەشكىمگە قىزىق ەمەس. جۋرناليستەر دە دۇرىس اقپارات تاراتپايدى. ءبىر-ەكى سايت اقپارات تاراتسا، مىناۋ ءمينيستردى اقتايىن دەپ جاتىر دەپ سەنىمسىزدىك بىلدىرەدى.
مەن دە ءمينيستردى قورعاعام جوق. بىراق ونداعان ازاماتتار ىسكە تارتىلدى، سونىڭ ىشىندە قۇرىلىسشىلاردىڭ مۇددەسىن قورعادىم. بىراق انا جەردە وتىرىپ انىق كوزىم جەتتى.
ول امەريكاندىق كومپانيانىڭ ءوزىنىڭ تاراپىنان دا ايتىلدى: “جاقسى ءىس بولدى، جاقسى سىبايلاس جەمقورلىق بولسىن دەيىك، جاقسى بىرنەشە اي ءىس بولدى، جاقسى تەرگەۋ جۇرگىزىلدى. بىراق نەگە ءبىزدىڭ جۇمىستى توقتاتاسىزدار؟ بۇل قازاقستانعا ءتيىمسىز عوي”،- دەپ اشىق تەكستپەن ايتتى. ونى بەيسەنباەۆ تا ايتىپ جاتىر: “مۇنىڭ ساياسي استارى بار، رەسەي تاراپىنان جاسالىپ جاتقان قىسىم” دەپ.
وسىنداي ىستەردى كوپ كوردىم. كەڭەس الاتىن كاسىپكەرلەرگە ايتامىن: تىنىش ءومىر سۇرگىڭ كەلە مە؟ ءوسىپ-ونگىڭ كەلە مە؟ وندا وندىرىسكە جولاما! الىپ-ساتۋمەن جۇرە بەر. مەملەكەتتەن اقشا الىپ، قۇرىلىسىڭدى جۇرگىزە بەر. بىراق وندىرىسكە جاقىندادىڭ بولدى، رەسەيدەن ءارتۇرلى جولمەن قىسىم ۇيىمداستىرادى”، دەدى ابزال قۇسپان.
