قاراعاندى وبلىستىق ەكولوگيا دەپارتامەنتىنىڭ قىزمەتكەرى 10 ميلليون تەڭگە پارا الۋ ۇستىندە قولعا ءتۇستى، دەپ حابارلايدى "ادىرنا" ۇلتتىق پورتالى.
ءوندىرىس ورىندارىنا تەكسەرۋ جۇرگىزگەن ەكولوگ وبلىستاعى ءبىر جشس-دان كەمشىلىك تاپقان، دەپ جازادى قاراعاندى وبلىستىق سوتىنىڭ ءباسپاسوز قىزمەتى. پارا بەرگىسى كەلمەگەن مەكەمە باسشىسى قۇقىق قورعاۋ قىزمەتىنە شاعىم تۇسىرەدى.
اتالمىش جشس-نىڭ تەحنيكالىق ديرەكتورى مەن ەكولوگ ءوزارا كەلىسىپ، مەكەمە باسشىسىنان العان اقشانى ەكەۋى ءبولىپ الماقشى بولعان. الايدا قىلمىسكەرلەر پارا الۋ ۇستىندە تۇتقىندالدى. بىراق تەحنيكالىق ديرەكتور قايتىس بولعاندىقتان، قىلمىستىق ءىس تەك ەكولوگقا قاتىستى قوزعالدى.
ايتا كەتەيىك، قىلمىستىق ءىس "پارا الۋ" بابىنان "الاياقتىق جاساۋعا تالپىنۋ" بابىنا وزگەرتىلىپ، پاراقور ەكولوگقا قر قك 24-190 بابى 3-ءبولىمى بويىنشا ايىپتالۋدا.
"ادىرنا" ۇلتتىق پورتالى
