سەنات دەپۋتاتتارى ۇلتتىق زاڭناماعا قاۋىپسىزدىكتى قامتاماسىز ەتۋ جانە ارناۋلى مەمورگاندارىنداعى قىزمەت ماسەلەسى بويىنشا وزگەرىس ەنگىزۋدى كوزدەيتىن زاڭدى ەكى وقىلىمدا تالقىلاپ جاتىر. بۇل تۋرالى سەنات توراعاسى ماۋلەن اشىمباەۆ مەملەكەتتىك قورعانىس كاسىپورىندارىن جەكەشەلەندىرۋ جونىندە پىكىر ءبىلدىردى، دەپ حابارلايدى “ادىرنا” ۇلتتىق پورتالى.
زاڭ جوباسىندا قورعانىس-ونەركاسىپ كەشەنىندەگى ستراتەگيالىق وبەكتىلەر تىزبەسىن قالىپتاستىرۋ، مەملەكەت مەنشىگىندەگى كاسىپورىنداردى «التىن اكتسيا» ۇلەسى ساقتالعان جاعدايدا جەكەشەلەندىرۋگە رۇقسات ەتۋ نورمالارى ۇسىنىلعان.
پالاتا توراعاسى ماۋلەن اشىمباەۆ اتالمىش زاڭداعى قۇجاتتىڭ وسى بولىگىنە پىكىر ءبىلدىردى.
«جالپى مەملەكەتتىك قورعانىس كاسىپورىندارىنىڭ جاعدايىنا بايلانىستى ءبىراز سۇراقتار بار. بىزدە «قازينجينيرينگ» دەگەن كومپانيا جۇمىس ىستەپ جاتىر. ونى ءبارىمىز بىلەمىز. ءبىر ونشاقتى زاۋىتى بار. بىراق سولاردىڭ مەملەكەتتىك ورگاندار تاراپىنان تاپسىرىس الۋ ماسەلەسىندە كوپتەگەن تۇيتكىلدەر بار ەكەنى جاسىرىن ەمەس. بۇلار - مەملەكەتتىڭ قورعانىس الەۋەتىنە ۇلەس قوسىپ جۇرگەن كاسىپورىندار. بىزگە ولاردى قولداۋدىڭ ءبىر قالىبىن، فورماتىن تابۋ كەرەك. ەگەر مەملەكەتكە ونداي كاسىپورىندار كەرەك بولماسا، «بىزگە ول كەرەك ەمەس، شەتەلدەن ساتىپ الامىز» دەپ اشىق ايتۋ كەرەك. وعان جەتكىزۋگە بولمايدى عوي. وزىمىزدە قورعانىس كاسىپورىندارى بولۋى كەرەك. بۇل — ۇلتتىق قاۋىپسىزدىك ماسەلەسى. ءبىز ولار مەملەكەتتىڭ مەنشىگىندە بولۋى كەرەك دەپ سانايمىز. سول سەبەپتى وسىنداي كاسىپورىنداردى قولداۋدىڭ ءبىر جۇيەلى تەتىكتەرى كەرەك ەكەنى انىق. سىزدەرگە وسى ماسەلەنى ءبىزدىڭ حالىقارالىق ىستەر، قورعانىس جانە قاۋىپسىزدىك كوميتەتىمەن بىرگە پىسىقتاپ، زاڭ اياسىندا قانداي مۇمكىندىكتەر بار ەكەنىن انىقتاۋ كەرەك دەپ ەسەپتەيمىز. زاڭعا مەملەكەتتىك كاسىپورىنداردى قولداۋ باعىتىندا وزگەرىس ەنگىزۋ كەرەك بولسا، ول جاعىن دەپۋتاتتارمەن قاراستىرۋعا دايىنبىز. بىراق سىزدەردەن ناقتى پوزيتسيا، ۇستانىم كەرەك. ەگەر ءبىزدىڭ ۇستانىمىمىز بولماسا، ول كاسىپورىندار وزىمەن-ءوزى جۇرەتىن بولسا، مەملەكەتتىك تاپسىرىس وزىمەن-ءوزى قالىپتاسىپ جاتاتىن بولسا، جۇيەلى جۇمىس بولمايتىنى انىق. سول سەبەپتى وسى باعىتتاعى جۇمىستى جاڭا دەڭگەيگە شىعاراسىزدار دەپ سەنەمىز. ءبىز بىرگە جۇمىس ىستەۋگە دايىنبىز»، — دەدى ماۋلەن اشىمباەۆ.
