وتكەن كۇندەرى قاراعاندى قالاسىنىڭ پوليتەحنيكالىق كوللەدجىندە ۇلت قۇندىلىقتارىن ساقتاۋ مەن ناسيحاتتاۋعا باعىتتالعان قازاق كۇنتىزبەسىندەگى 15 قاراشا – قازاق باتىرلارى كۇنىنە وراي جاريالانعان «باتىرلار مۇراسى» ونكۇندىگى اياسىندا قازاقتىڭ سوڭعى حانى كەنەسارى قاسىمۇلىنىڭ 220 جىلدىعىنا، ەسەت باتىر كوكىۇلىنىڭ 355 جىلدىعىنا، اقجولتاي اعىباي باتىردىڭ 220 جىلدىعىنا جانە قازاقتىڭ باتىر قىزى مانشۇك مامەتتىڭ تۋعانىنا 100 جىل تولۋىنا وراي جاستار اراسىنداعى 3-ءشى عىلىمي – تانىمدىق كونفەرەنتسيا ءوتتى، دەپ جازادى "ادىرنا" ۇلتتىق پورتالى.
2018 جىلدان بەرى Qazaq club باستاماسىمەن قولعا الىنىپ جۇرگەن بۇل شارا جاستارعا قازاق قوعامىنداعى باتىرلار ينستيتۋتىنىڭ ءرولى مەن ۇلت باتىرلارىنىڭ حالىق الدىنداعى ەڭبەگىن ناسيحاتتاۋعا باعىتتالعان. بيىلعى جىلى بۇل شاراعا قاراعاندى وبلىسى اكىمدىگى دە قولداۋ ءبىلدىردى. شارانىڭ سالتاناتتى اشىلۋىندا ءسوز العان وبلىس اكىمىنىڭ اسكەري قاۋىپسىزدىك جانە قورعانىس ماسەلەلەرى جونىندەگى كومەكشىسى قانات ءابىلحان مۇنداي شارانىڭ جاستارعا اسكەري-پاتريوتتىق تاربيە بەرۋدە ماڭىزى جوعارى ەكەندىگىن ءسوز ەتە كەلىپ، قازاق قوعامىنداعى باتىرلار ينستيتۋتى مەن باتىر ۇعىمىنىڭ قالىپتاسۋىنا توقتالدى.
ودان ءارى پوليتەحنيكالىق كوللەدج ستۋدەنتتەرى ءماجيت ەربوسىن «ەسەت باتىر كوكىۇلىنا - 355 جىل» اتتى بايانداماسىندا باتىردىڭ باسقىنشىلارمەن كۇرەسىن بايانداسا، سامات الماس «كەنەسارى حاننىڭ قازاق مەملەكەتتىلىگىن قالپىنا كەلتىرۋدەگى ەڭبەگى» اتتى باياندامانى، ال حانات ءابدۋالي «اقجولتاي اعىباي باتىر – ەل قورعانى» بايانداماسىندا باتىردىڭ وتارشىلدارعا قارسى جۇرگىزگەن اسكەري قيمىلدارى جايلى ءسوز ەتتى. بايانداماشى تاڭىربەرگەن شافاعات بولسا، «قازاقتىڭ باتىر قىزى مانشۇك مامەتوۆاعا 100 جىل» تاقىرىبىندا بايانداما وقىدى. سونىمەن قاتار كونفەرەنتسيا بارىسىندا شاراعا ارنايى كەلگەن اۋعان سوعىسىنا قاتىسۋشىلاردىڭ «ارداگەر» ۇيىمىنىڭ توراعاسى ت.حاسەن، ارداگەرلەر ج.جايناق، ۇ.قالىق، س.جاقان، ب.تايبەك، د.ءابدىراحمان، چەرنوبىل اپاتىن جويۋعا قاتىسۋشىلار ۇيىمىنىڭ توراعاسى م.باەكەن ءوز ەستەلىكتەرىمەن ءبولىسىپ، جاستارعا اعالىق جىلى لەبىزدەرىن ارنادى.
شارا سوڭىندا كونفەرەنتسياعا بەلسەندى قاتىسقان جاستار مەن ارداگەرلەرگە «قازاق حالقىنىڭ مۇراسى» كىتاپتار سەرياسىمەن قازاقتىڭ اسكەري تاريحى مەن باتىرلارىنىڭ ەڭبەگىن ناسيحاتتاۋ ماقساتىندا 2020 جىلى جارىق كورگەن «جاۋىنگەرلىك داڭق» لەنتاسى تابىس ەتىلدى.
قاراعاندى تەحنيكالىق ۋنيۆەرسيتەتىنىڭ
تاريح كافەدراسىنىڭ قىزمەتكەرى
ن.وشان
