قاراعاندىدا اۋىر جاعدايدا كوز جۇمعان بۇلدىرشىنگە قاتىستى دەنساۋلىق ساقتاۋ مينيسترلىگى رەسمي تۇسىنىكتەمە بەردى، دەپ حابارلايدى "ادىرنا".
قاراعاندى وبلىسى دەنساۋلىق ساقتاۋ باسقارماسىنىڭ مالىمەتىنشە، ءبۇلدىرشىن اۋرۋ باستالعاننان كەيىن 2-تاۋلىكتە ينفەكتسيالىق ورتالىققا جەتكىزىلگەن. جاعدايى كۇرت ناشارلاپ، كەيىن رەانيماتسيا جانە قارقىندى تەراپيا بولىمشەسىنە اۋىستىرىلعان. تەكسەرۋ بارىسىندا بالانىڭ اعزاسىندا باكتەريالىق، ۆيرۋستىق جانە ساڭىراۋقۇلاق تەكتى قوزدىرعىشتار قاتار جۇرگەن ارالاس ينفەكتسيا انىقتالعان.
دارىگەرلەردىڭ دەرەگىنشە، اۋرۋدىڭ اۋىر وتۋىنە ايقىن يممۋن تاپشىلىعى اسەر ەتكەن. سونىمەن قاتار بالاعا تۋعاننان بەرى ۆاكتسينا سالىنباعانى انىقتالعان، بۇل اعزانىڭ ينفەكتسياعا قارسى تۇرۋ قابىلەتىن ەداۋىر السىرەتكەن. سونىڭ سالدارىنان جۇرگىزىلگەن ەم شارالارى تولىق كولەمدە كورسەتىلگەنىنە قاراماستان، كۇتكەن ناتيجە بەرمەگەن.
ەمدەۋ تاكتيكاسى بىرنەشە رەت رەسپۋبليكالىق دەڭگەيدەگى كونسيليۋمداردا قارالعان. وعان شتاتتان تىس باس بالالار ينفەكتسيونيستى، پۋلمونولوگ جانە رەانيماتولوگ سەكىلدى سالالىق ماماندار تارتىلعان. قوسىمشا ءادىس رەتىندە ەكستراكورپورالدىق مەمبرانالىق وكسيگەناتسيا (ەكمو) قولدانۋ مۇمكىندىگى دە تالقىلانعانىمەن، بالانىڭ جاعدايى مەن مەديتسينالىق كورسەتكىشتەرىنە بايلانىستى بۇل ءتاسىل ۇسىنىلماعان.
مينيسترلىك مۇنداي جاعدايلاردىڭ مەديتسينالىق تۇرعىدان اسا كۇردەلى ەكەنىن اتاپ ءوتتى. اۋىر ينفەكتسيا، يممۋن تاپشىلىعى جانە ۆاكتسيناتسيانىڭ بولماۋى قاتار كەلگەن كەزدە، ءتىپتى ۋاقىتىلى جانە تولىق جۇرگىزىلگەن ەمنىڭ وزىندە قولايسىز ناتيجە قاۋپى ايتارلىقتاي ارتادى.
ۆەدومستۆو اتالعان وقيعا بويىنشا كورسەتىلگەن مەديتسينالىق كومەكتىڭ ساپاسىن وبەكتيۆتى باعالاۋ ءۇشىن تاۋەلسىز ساراپشىلاردى تارتا وتىرىپ، جان-جاقتى تەكسەرۋ جۇرگىزەتىنىن حابارلادى. سونىمەن قاتار قوعام مەن باق وكىلدەرىن تەك رەسمي ءارى تەكسەرىلگەن اقپاراتقا سۇيەنۋگە، اسىعىس قورىتىندى جاساماۋعا شاقىردى.
دەنساۋلىق ساقتاۋ مينيسترلىگى مارقۇم بالانىڭ وتباسى مەن جاقىندارىنا كوڭىل ايتتى.
