ەلىمىزدە ەندى ماگيستراتۋرا مەن دوكتورانتۋراعا قابىلداۋ جىلىنا ەكى رەت وتكىزىلەدى، دەپ حابارلايدى "ادىرنا" ۇلتتىق پورتالىنىڭ ءتىلشىسى. بۇل تۋرالى ءبىلىم جانە عىلىم ءمينيسترى اسحات ايماعامبەتوۆ الەۋمەتتىك جەلىدەگى پاراقشاسىندا جازدى. ءمينيستردىڭ ايتۋىنشا، ماگيستراتۋرا مەن دوكتورانتۋراعا قابىلداۋعا قاتىستى بىرقاتار ۇسىنىستاردى جوعارى وقۋ ورىندارىنىڭ قاۋىمداستىعى مەن رەكتورلار كەڭەسى تامىز كەڭەسىنىڭ وتىرىسىندا ەنگىزگەن.
- ەگجەي-تەگجەيلى تالقىلاۋدان كەيىن ءبىز قابىلداۋ ەرەجەلەرىنە وزگەرىستەر ەنگىزۋ تۋرالى شەشىم قابىلدادىق. ەندى ماگيستراتۋرا مەن دوكتورانتۋراعا قابىلداۋ جىلىنا ەكى رەت وتكىزىلەدى. ياعني، ماگيستراتۋرا مەن دوكتورانتۋراعا ءتۇسۋ ەمتيحاندارى ءداستۇرلى تۇردە تامىز ايىندا جانە قوسىمشا جەلتوقسان ايىندا ۇيىمداستىرىلادى. وسى نورما 2021 جىلى كۇشىنە ەنەدى دەپ جوسپارلاپ وتىرمىز. وسى ماقساتتا ۇلتتىق تەستىلەۋ ورتالىعىنىڭ قىزمەتكەرلەرى كەشەندى تەستىلەۋ مەن ءتۇسۋ ەمتيحاندارىن قوسىمشا ۇيىمداستىرادى. قۇجاتتاردى قابىلداۋ قاراشا ايىندا باستالادى، – دەپ جازدى اسحات ايماعامبەتوۆ.
ءسوز سوڭىندا مينيستر جازعى قابىلداۋ ناۋقانى مەن وتكىزىلگەن ەمتيحانداردىڭ قورىتىندىسى بويىنشا ماگيستراتۋرا مەن دوكتورانتۋراعا ارنالعان ءبىلىم بەرۋ گرانتتارىنىڭ ارتىق قالۋىنا بايلانىستى ازاماتتار وسى جىلدىڭ جەلتوقسان ايىندا مەملەكەتتىك گرانتتاردى يەلەنە الاتىنىنىن، دايىندىق باعىتتارى بولىنىسىندە گرانتتاردىڭ سانى مەن قۇجاتتاردى قابىلداۋدىڭ ناقتى مەرزىمدەرى تۋرالى اقپارات قوسىمشا جاريالاناتىنىن مالىمدەدى.
"ادىرنا" ۇلتتىق پورتالى
