ايماعامبەتوۆ نە ءۇشىن وتستاۆكاعا كەتۋى كەرەك؟ - ءومىر شىنىبەكۇلىمەن سۇحبات

8096
Adyrna.kz Telegram

«اسحات ايماعامبەتوۆ وتساۆكاعا كەتۋى كەرەك». بۇل پىكىر يەسى قازاقستان رەسپۋبليكاسىنىڭ ءبىلىم بەرۋ ءىسىنىڭ قۇرمەتتى قىزمەتكەرى، ۇستاز ءومىر شىنىبەكۇلى.

 ءومىر شىنىبەكۇلى ءوز پاراقشاسىندا ءبىلىم سالاسىنداعى بىلىقتارعا ءبىلىم ءمينيسترىنىڭ ارالاسپاي وتىرعانىن باسا ايتتى. وعان قوسا، ەگەر ايماعامبەتوۆ ورنىنان تۇسپەسە مينيسترلىكتەن العان بارلىق ماراپاتىنان باس تارتاتىنى تۋرالى مالىمدەدى.

«تۇركىستان وبلىسى ءبىلىم سالاسىنداعى وسىنشا بىلىقتى ەستىپ، كورىپ ءبىلىپ وتىرىپ ساۋساعىن قىبىرلاتۋعا مۇرشاسى كەلمەي وتىرعان بجعم ءمينيسترى ايماعامبەتوۆ وتستاۆكاعا كەتۋى كەرەك..

مينيستر وتستاۆكاعا كەتپەسە بجعم بەرگەن "قازاقستان رەسپۋبليكاسىنىڭ ءبىلىم بەرۋ ءىسىنىڭ قۇرمەتتى قىزمەتكەرى", "ى.التىنسارين" توسبەلگىلەرىنەن باس تارتاتىنىمدى مالىمدەيمىن...

مۇنداي شاراسىز مينيسترلىكتەن العان ماراپاتتاردىڭ قۇنى مەن ءۇشىن كوك تيىن..

ال سوتتاساڭ سوتتاپ جىبەر...

پەداگوگ-ارىپتەستەرىم دەمالىس كەزىندە ءشوپ شاۋىپ جىلاپ جۇرگەندە مەن مىناۋ سىلدىرماقتاردى تاعىپ وتىرعانىم يتتىك بولار ەدى..»،-دەدى ءومىر شىنىبەكۇلى ءوز جازباسىندا.

 «ادىرنا» ۇلتتىق پورتالىنىڭ ءتىلشىسى ءومىر شىنىبەكۇلىمەن حابارلاسىپ، سۇحباتتاسقان بولاتىن.

 كەشە facebook پاراقشاڭىزعا جاريالاعان “ايماعامبەتوۆ وتساۆكاعا كەتۋى كەرەك” دەگەن پوستىڭىز باق بەتىندە ءجۇر.

-جالپى “حالىقتىڭ سۇيىكتى مينيسترىنە” اينالعان ايماعامبەتوۆتىڭ ەكس- مينيسترلەردەن ايىرماشىلىعى بولدى ما؟

-ا.ايماعامبەتوۆتىڭ جەكە باسىنا قويار ەش كىنام جوق.

كەرىسىنشە، مەن كورگەن مينيسترلەردىڭ اراسىنداعى ەڭ اشىعى وسى اسقات قاناتۇلى بولدى..

مەنىڭ ۇندەۋىم بىزدەگى باسقارۋ جۇيەسىنە قاتىستى دەپ تۇسىنگەن ءجون.

2015 جىلى سول كەزدەگى بجعم ءمينيسترى ا.سارىنجىپوۆكە وبلىستىق ءبىلىم باسقارمالارىن وبلىستىق اكىمدىكتەردەن الىپ تىكەلەي مينيسترلىككە باعىندىرۋدى ايتىپ اشىق حات جازعانمىن. سولاي ەتپەسەك، پەداگوگتار سايلاۋ-سەنبىلىك سەكىلدى ناۋقاندارعا تارتىلا بەرگەنى بەرگەن..

ءبىلىم باسقارماسىنىڭ باسشىسى مينيسترگە ەمەس، وبلىس اكىمىنە باعىنىشتى..

كەشەگى مالىمدەمەم، كەيىنگى كەزدەرى اتى ءجيى اتالىپ كەتكەن تۇركىستان وبلىستىق ءبىلىم باسقارماسىنا قاراستى «ۇزىن-اتا» بالا باقشاسىنىڭ ءوز باسشىسىنا قارسى شىققان قىزمەتكەرىنە جاسالعان قىسىمعا بايلانىستى ەدى..

-2 جىلعا جۋىق ەڭبەك ەتتى، ناقتى قانداي جوبا، جۇيەسىن قولداۋعا تۇرارلىق؟

مينيسترلىكتىڭ جۇمىسىنا باعا بەرۋگە 2 جىل ازدىق ەتسە كەرەك..

كوپ نارسە وزگەردى دەپ ايتۋ قيىن. اسقات قاناتۇلى ءوزىنىڭ الدىنداعى مينيسترلەر ءبۇلدىرىپ كەتكەندى تۇزەتۋمەن اينالىسىپ جاتىر دەگەن دۇرىس بولار..

ماسەلەن، «الىپپەنى» قايتاردى، تومەنگى سىنىپتاردان «ۇشتىلدىك» دەگەندى اقىرىنداپ شەگىندىرىپ جاتىر دەگەن سەكىلدى.

ەندى عانا «ءبىلىمدى ۇلت» دەگەن جوبا جاسالدى. جاقىندا قوعام تالقىلاۋىنا ءتۇسىپ قالار..

سول جوبا قابىلدانىپ، ناتيجە بەرسە عانا ايماعامبەتوۆ بىردەڭە ءبىتىردى دەۋگە بولادى..

دەگەنمەن، اسقات قاناتۇلى بۇرىن بىردە ءبىر ءمينيستردىڭ قولىنان كەلمەگەن اشىقتىقتىڭ ۇلگىسىن كورسەتكەنىن باسا ايتۋىمىز كەرەك. بەلسەندى پەداگوگتاردى توقسان سايىن قابىلداپ تۇرادى، كەڭەسەدى..

-ءبىلىم سالاسىنداعى بىلىقتاردى رەتتەۋگە قانداي رەفورما كەرەك؟

مەكتەپ قوعامنىڭ كىشكەنتاي بولشەگى.

جالپى ەلدە ساياسي رەفورما جاسالماسا، جەكەلەگەن ءبىر سالادا جۇرگىزگەن رەفورما جەمىستى بولادى دەپ ايتا المايمىن.

-ء“شوپ شاۋىپ جىلاپ جۇرگەن ارىپتەستەرىم” دەدىڭىز. الدىڭعى جىلى “مۇعالىمدەر وزدەرىنە تيەسىلى ەمەس جۇمىستى اتقارمايدى” دەگەن زاڭ قابىلدانعان ەدى. قاعاز دا جازىلعانىمەن، زاڭ جۇزىندە كۇشىنە ەنبەگەنى ءۇشىن ءبىز مينيسترلىككە قانداي ارەكەت جاساي الامىز؟

«پەداگوگ مارتەبەسى تۋرالى» زاڭدا پەداگوگتى مىندەتىنە جاتپايتىن جۇمىستارعا جەگۋگە تىيىم سالىناتىنى انىق ايتىلسا دا جەرگىلىكتى جەردەگى كەيبىر اپەرباقان باسشىلار ولاردى قۇلداي جۇمساۋىن دوعارار ەمەس.

-كەشەگى پوستىڭىزدان كەيىن الدەكىمدەردەن قوڭىراۋ ءتۇسىپ، قىسىم كورسەتىلدى مە؟

ءيا، ءبىراز ادام قوڭىراۋ شالدى. قىسىم دەۋگە بولماس، پوستىمدى الىپ تاستاۋعا وتىنىشتەر بولدى..

پوستىم ورنىندا ءتۇر..

سۇحباتىڭىزعا راقمەت!

ءىنجۋ ومىرزاق،

«ادىرنا» ۇلتتىق پورتالى

پىكىرلەر