17 قىركۇيەكتە جەزقازعان قالاسىنىڭ اكىمى قايرات شايجانوۆ وتستاۆكاعا كەتكەنىن ايتتى، دەپ حابارلايدى «ادىرنا» ءتىلشىسى.
«بۇگىن مەن ءۇشىن ەرەكشە تولقىنىستى كۇن. قالا اكىمى لاۋازىمىنداعى قىزمەتىمدى اياقتاپ، سىزدەرمەن قوشتاساتىن ءسات تە كەلىپ جەتتى. ءتورت جىل ىشىندە سىزدەرمەن بىرگە قالانىڭ ىستىعىنا كۇيىپ، سۋىعىنا توڭىپ، تۋعان قالامىزدىڭ دامۋى ءۇشىن شامامىز كەلگەنشە ەڭبەك ەتتىك. بۇل كەزەڭ مەن ءۇشىن ۇلكەن جاۋاپكەرشىلىكپەن قاتار، ۇلكەن مەكتەپ، ومىرلىك تاجىريبە بولدى. وسى ۋاقىت ىشىندە تالاي ماسەلەنى بىرگە كوتەردىك، تالاي باستامانى بىرگە جۇزەگە اسىردىق. ءاربىر كەزدەسۋدىڭ، ءاربىر ۇسىنىس پەن پىكىردىڭ مەن ءۇشىن ءوز ورنى بار. قولداعان جەرلەرىڭىزدە قاناتتانىپ، سىناعان جەرلەرىڭىزدە شىڭدالا ءتۇستىم»، – دەپ جازدى اكىم.
ول جەزقازعاندىقتارعا كورسەتكەن قولداۋى مەن سەنىمى ءۇشىن ريزاشىلىعىن ءبىلدىرىپ، جەزقازعاننىڭ ءوزى ءۇشىن تەك قىزمەت اتقارعان مەكەن ەمەس، ءومىر جولى مەن ەڭبەك جولى ساباقتاسقان شاھار بولىپ قالاتىنىن اتاپ ءوتتى.
ەسكە سالايىق، قايرات شايجانوۆ جەزقازعان قالاسىنىڭ اكىمى قىزمەتىنە 2022 جىلدىڭ ماۋسىم ايىندا تاعايىندالعان بولاتىن.
