مۇعالىمدەردەن ەكى قۇجاتتان ارتىق تالاپ ەتكەن مەكتەپ باسشىلىعى جاۋاپقا تارتىلادى. بۇل تۋرالى وقۋ-اعارتۋ ءمينيسترى اسحات ايماعامبەتوۆ ۆەدومستۆونىڭ اپپارات جينالىسىندا ايتتى، دەپ حابارلادى “ادىرنا” ءتىلشىسى.
ءمينيستردىڭ ايتۋىنشا، مۇعالىم كۇنىنە تەك ەكى قۇجاتتى تولتىرۋى كەرەك: بالانىڭ باعاسىن قوياتىن ەلەكتروندى جۋرنال جانە ەكىنشى – مۇعالىمنىڭ كۇندەلىكتى وقۋ جوسپارى.
“بولدى، باسقا ەشقانداي قوسىمشا قۇجات بولماۋى ءتيىس. بۇدان ارتىق قۇجاتتى تالاپ ەتۋ – زاڭبۇزۋشىلىق. بۇل ءۇشىن ءبىز جاۋاپكەرشىلىكتى قاراستىردىق. قاتاڭ جاۋاپكەرشىلىك بار. جالپى، ءبىز قازىر زاڭناماعا وزگەرىس ەنگىزدىك. ەندى ديرەكتوردىڭ اتتەستاتسياسى، روتاتسياسى، ونى تاعايىنداۋ كەزىندە ءبىز ارنايى بازادان وسى باسشىنىڭ مۇعالىمدەردىڭ قۇقىعىن بۇزۋ ماسەلەلەرى تىركەلدى مە، تىركەلمەدى مە، سول اقپاراتتى قارايتىن بولامىز. ياعني، ءبىزدىڭ ارىپتەسىمىز وسى زاڭنامانى بۇزعان بولسا، وندا ول تەك قانا اكىمشىلىك جاۋاپكەرشىلىككە تارتىلىپ قانا قويمايدى. ەرتەڭ باسقا جۇمىسقا اۋىسقاندا نەمەسە اتتەستاتسيادان وتكەن كەزدە بۇل ماسەلە ەرەكشە قارالاتىن بولادى. وسىنى دا ەستەرىڭىزدە ساقتاڭىزدار”، – دەدى اسحات ايماعامبەتوۆ.
سونداي-اق مينيستر قابىلدانعان زاڭناما مۇعالىمدەردىڭ قۇقىعىن بۇزۋ ماسەلەسىن تۇبەگەيلى شەشۋگە مۇمكىندىك بەرگەنىن اتاپ ءوتىپ، بۇدان بىلاي ونى تولىعىمەن جويۋعا ارەكەت ەتۋ قاجەتتىگىن جەتكىزدى.
