«نۇرلى جەر» تۇرعىن ءۇي-كوممۋنالدىق شارۋاشىلىعىن دامىتۋدىڭ مەملەكەتتىك باعدارلاماسى اياسىندا تەكەلى قالاسىندا 40 پاتەرلى جالدامالى ەكى تۇرعىن ءۇيدىڭ قۇرىلىسى باستالعالى ءبىر ايدىڭ ءجۇزى بولىپ قالدى.
وسى اپتادا الماتى وبلىسى قۇرىلىس باسقارماسى باسشىسىنىڭ ورىنباسارى ەركەبۇلان ۋسمانباەۆ «دوستىق» شاعىناۋدانىنداعى ءال-فارابي جانە سەيفۋللين كوشەسىندە ىرگەتاسى قالانىپ جاتقان ۇيلەردىڭ قۇرىلىس قارقىنىمەن تانىسىپ، جۇمىستىڭ ساپالى بولۋىن جانە ءتيىستى مەرزىمدە اياقتالۋىن باستى نازاردا ۇستاۋدى تاپسىردى. تاپسىرىس بەرۋشى قالالىق قۇرىلىس ءبولىمى مەن مەردىگەرلىك مىندەتتى موينىنا العان «شىمىر» جاۋاپكەرشىلىگى شەكتەۋلى سەرىكتەستىگى ەكى بىردەي بەس قاباتتى قىرىق پاتەرلى تۇرعىن ءۇيدى الداعى قاراشادا پايدالانۋعا بەرۋ ءۇشىن قىستىڭ ون كۇنىنە تاتيتىن جازدىڭ ءار كۇنىن ءتيىمدى وتكىزىپ، بارىنشا قيمىل شيراتقاندارى ءجون. قازىرگى تاڭدا ەكى قۇرىلىس الاڭىندا 30 شاقتى ادام جۇمىس ىستەپ جاتىر. جۇمىس كولەمى الدىن الا بەكىتىلگەن جوسپارعا سايكەس ورىندالۋدا.
تەكەلى قالاسىنىڭ اكىمى باتىر مولداحمەتوۆ:
«سەكسەن پاتەردىڭ تەڭ جارتىسى كوپ بالالى انالارعا، قالعانى جەتىم بالالارعا جانە ەرەكشە مۇقتاجدىقتارى بار بالالاردى تاربيەلەپ وتىرعان وتباسىلارعا بەرىلەدى. قۇرىلىس جۇمىستارىنىڭ توقتاۋسىز ءجۇرۋىن جانە پايدالانىلاتىن بارلىق ماتەريالدىڭ ساپالى بولۋىن قاتاڭ قاداعالاپ وتىرامىز»، – دەدى.
سوڭعى جىلداردا قالامىزدا باسپانالى بولىپ قۋانعان تۇرعىنداردىڭ قاتارى الداعى ۋاقىتتا تاعى تولىعاتىنى الەۋمەتتىك الەۋەتىمىزدى ايشىقتاپ، كوڭىلگە قۋانىش ۇيالاتادى.
تورعىن تۇرلىباەۆا
