الماتى وبلىسىندا رەسپۋبليكا كۇنىنە وراي زياتكەرلىك ويىندار جانە اۋىل شارۋاشىلىعى جارمەڭكەلەرى، سپورتتىق جارىستار مەن تۋرنيرلەر، كونتسەرتتەر مەن كورمەلەر، سەنبىلىكتەر مەن قايىرىمدىلىق ءىس-شارالارى، جالپى بارلىعى 200-دەن استام ءىس-شارا وتەدى. مەرەكە قارساڭىندا بىرقاتار ەلدى مەكەندە جاڭا الەۋمەتتىك نىساندار اشىلىپ، تۇرعىنداردىڭ يگىلىگىنە باعىتتالعان جوبالار ىسكە قوسىلادى.
جاڭا الەۋمەتتىك نىساندار اشىلادى
بۇگىن 22 قازاندا قاراساي اۋدانىنىڭ قاسكەلەڭ قالاسىندا 20 وتباسى باسپانالى بولدى. جىل سوڭىنا دەيىن تاعى 46 وتباسىن تۇرعىن ۇيمەن قامتۋ جوسپارلانعان. سونداي-اق جارمۇحامبەت اۋىلىندا تۇرعىنداردى ساپالى تىرشىلىك نارىمەن قامتاماسىز ەتەتىن جاڭا سۋ جۇيەسى ىسكە قوسىلدى.
23 قازاندا جامبىل اۋدانىنىڭ قارعالى اۋىلىندا 350 ورىندىق جاڭا مادەنيەت ءۇيى اشىلادى. ەكى قاباتتى عيماراتتا كورەرمەن زالى، كىتاپحانا، حورەوگرافياعا ارنالعان زال جانە شىعارماشىلىق ۇيىرمەلەرگە قاجەتتى ورىندار قاراستىرىلعان.
ال 27 قازاندا رايىمبەك اۋدانىنىڭ نارىنقول اۋىلىندا جاڭا ەمحانا پايدالانۋعا بەرىلەدى. ءتورت قاباتتى مەديتسينالىق مەكەمە ءبىر اۋىسىمدا 250 ادامدى قابىلداي الادى. مۇندا تۇرعىندارعا كۇندىزگى ستاتسيونار مەن وڭالتۋ بولىمشەسىنىڭ قىزمەتتەرى دە قولجەتىمدى بولادى.
سپورت دودالارى ۇيىمداستىرىلادى
22 قازاندا ۇيعىر اۋدانىنىڭ ورتالىعى شونجى اۋىلىندا ۆەلوجارىس ءوتتى. وعان اۋدان تۇرعىندارى مەن مەكەمە قىزمەتكەرلەرىنەن 200-دەن استام ادام قاتىستى. جارىس سوڭىندا ەڭ جاس جانە ەڭ ۇلكەن جاستاعى قاتىسۋشىلار ماراپاتتالدى.
ال 22-24 قازان ارالىعىندا ىلە اۋدانىنىڭ وتەگەن باتىر كەنتىندە المەرەك بابا جۇلدەسىنە ارنالعان رەسپۋبليكالىق سامبو ءتۋرنيرى وتەدى. بوزكىلەمدە قازاقستاننىڭ 13 وڭىرىنەن، سونداي-اق وزبەكستان مەن قىرعىزستاننان كەلگەن 250-گە جۋىق جاس سپورتشى باق سىنايدى.
سەنبىلىك، جارمەڭكە جانە مەرەكەلىك جەڭىلدىكتەر
17-29 قازان ارالىعىندا الاتاۋ قالاسىنداعى «ەۆرازيا»، «جەتىسۋ» جانە «تويمارت» ساۋدا ورىندارىندا «Republic Day» اكتسياسى وتەدى. وسى كۇندەرى تۇرعىندار ءتۇرلى تاۋارلاردى جەڭىلدىكپەن ساتىپ الا الادى.
23 قازاندا قاراساي اۋدانىنىڭ ەلتاي اۋىلىندا «تازا قازاقستان» باستاماسى اياسىندا 200 ءتۇپ اعاش وتىرعىزىلادى. يگى شارا اۋىلدىڭ كوركىن ارتتىرىپ، جاسىل جەلەك كولەمىن كوبەيتۋگە جانە قورشاعان ورتانى تازا ۇستاۋعا باعىتتالعان.
ال 24 قازاندا قوناەۆ قالاسىنداعى «ايشا سيتي» بازارىندا «دالا ءدامى» اۋىل شارۋاشىلىعى جارمەڭكەسى وتەدى. مۇندا جەرگىلىكتى شارۋالاردىڭ ونىمدەرى قولجەتىمدى باعامەن ۇسىنىلادى.
مەملەكەتتىك تۋ كوتەرىلىپ، مەرەكەلىك كونتسەرتتەر وتەدى
23 قازاندا وبلىس ورتالىعى قوناەۆ قالاسىنداعى مادەنيەت ۇيىندە ساعات 12:00-دە مەرەكەلىك كونتسەرت وتەدى. كورەرمەندەر الدىندا قازاقستاننىڭ حالىق ءارتىسى ماقپال ءجۇنىسوۆا، بولات ءابدىلمانوۆ، قازاقستاننىڭ ەڭبەك سىڭىرگەن قايراتكەرى بەكجان تۇرىس، شاكارىم الماسبەك، ۇلجان اعلاقوۆا، نۇرلان ءاشىموۆ جانە باسقا دا ونەرپازدار ونەر كورسەتەدى. سونداي-اق «ۇلىتاۋ» توبى، «التىناي» بي ءانسامبلى، ءسۇيىنباي اتىنداعى الماتى وبلىستىق فيلارمونياسىنىڭ ىشەكتى-سيمفونيالىق كامەرالىق وركەسترى، «قۇلانساز» بي توبى مەن «الاتاۋ اۋەندەرى» كونتسەرتتىك ۇيىمىنىڭ ونەرپازدارى قاتىسادى.
مەرەكەلىك باعدارلامادا «اتامەكەن» بەينە-حورەوگرافيالىق پرولوگى مەن «جەرۇيىق» تەاترلاندىرىلعان قويىلىمى ۇسىنىلادى.
بۇل كۇنى مەرەكەلىك كونتسەرتتەر مەن سالتاناتتى جيىندار قوناەۆ قالاسىنان بولەك الاتاۋ قالاسىندا، سونداي-اق بارلىق اۋداندا ۇيىمداستىرىلادى.
ال 25 قازاندا ورتالىق الاڭدا مەملەكەتتىك تۋ كوتەرىلىپ، ءانۇران ورىندالادى. سالتاناتتى راسىمنەن كەيىن كونتسەرت وتەدى.
ءىرى ينۆەستيتسيالىق جوبالار ىسكە قوسىلادى
مەرەكەلىك شارالار 27 قازاندا دا جالعاسادى. بۇل كۇنى كەگەن اۋدانىندا ەكى ءىرى ينۆەستيتسيالىق جوبا ىسكە قوسىلادى.
ءبىرىنشىسى – قۇنى 2,5 ملرد تەڭگە بولاتىن ەت وڭدەۋ كومبيناتى. كاسىپورىن ءبىر اۋىسىمدا 15 توننا ەت وڭدەپ، 1,5 مىڭ كەلى شۇجىق جانە 1 مىڭ بانكا كونسەرۆى وندىرە الادى. كەشەن قۇرامىنداعى مال سويۋ تسەحىندا تاۋلىگىنە 50 باسقا دەيىن ءىرى قارا، 150 باسقا دەيىن قوي-ەشكى جانە 10 جىلقى سويۋعا مۇمكىندىك بار. جاڭا كاسىپورىندا 115 جۇمىس ورنى اشىلادى.
سول كۇنى قۇنى 2,8 ملرد تەڭگە بولاتىن «Compass Group» اۆتوجانارماي قۇيۋ ستانتسياسى مەن سەرۆيستىك كەشەنى دە پايدالانۋعا بەرىلەدى. مۇندا 80 ادام جۇمىسپەن قامتىلادى. كەشەن حالىقارالىق جانە رەسپۋبليكالىق ماڭىزى بار جولدارمەن قاتىنايتىن جولاۋشىلار مەن تۋريستەرگە قىزمەت كورسەتەدى. جوباعا سايكەس، نىسان جىلىنا 800 مىڭعا دەيىن كەلۋشىنى قابىلداي الادى دەپ كۇتىلۋدە.
