استانادا LRT قۇرىلىس الاڭىنداعى جۇمىسشىلاردىڭ قاۋىپسىزدىك ەرەجەلەرىن ورەسكەل بۇزعانى انىقتالدى. قىتايلىق كومپانيا قاتاڭ سوگىس الدى، دەپ حابارلايدى "ادىرنا" ۇلتتىق پورتالى.
ءبىر كۇن بۇرىن جەلىدە جۇمىسشىلاردىڭ تەمىر بلوكتى بوس جولدىڭ ۇستىنەن كابەلدەرمەن تاسىمالداپ جاتقانىن كورسەتەتىن ۆيدەو تارادى. بۇل جاعدايعا قاتىستى استانا قالالىق كولىك باسقارماسى تۇسىنىكتەمە بەردى. باسقارما مالىمەتىنشە، قاۋىپسىزدىك ەرەجەلەرىن ورەسكەل بۇزعانى ءۇشىن كومپانيانىڭ ەكى باسشىسى قىزمەتىنەن شەتتەتىلگەن.
"ۇلى دالا داڭعىلى مەن قابانباي باتىر داڭعىلىنىڭ قيىلىسىندا باسقالاردىڭ قاۋىپسىزدىگىنە قاۋىپ توندىرەتىن LRT قۇرىلىس الاڭىندا مەردىگەردىڭ قاۋىپسىزدىك ەرەجەلەرىن ورەسكەل بۇزۋى تىركەلدى. مەتالل اركا قۇرىلىسىنا CTS كومپانياسى رۇقسات بەرمەدى، وسىعان بايلانىستى ۋاقىتشا توقتاتىلدى", – دەلىنگەن حابارلامادا.
LRT قۇرىلىسىمەن اينالىسىپ جاتقان قىتايلىق CTS كومپانياسى جوبا جەتەكشىسى مەن قاۋىپسىزدىك جونىندەگى باسشىسى قاۋىپسىزدىك ەرەجەلەرىن ورەسكەل بۇزعانى ءۇشىن قىزمەتىنەن شەتتەتىلگەنىن ءمالىم ەتتى. ال جوبانىڭ باس ينجەنەرىنە تەحنيكالىق قاداعالاۋمەن دۇرىس باقىلاۋ جۇرگىزبەگەنى ءۇشىن قاتاڭ سوگىس بەرىلگەن.
"بولاشاقتا بلوكتاردى اۋە كولىگىمەن تاسىمالداۋ جۇمىستارى كەشكى ۋاقىتتا ەكى ساعاتقا دەيىن قوزعالىستى تولىق شەكتەۋدى ۇيىمداستىرۋ اياسىندا جۇرگىزىلەدى", – دەپ سەندىردى كومپانيا.
