جەتىسۋ وبلىسىندا بالىق شارۋاشىلىعى كەشەنىنىڭ قۇرىلىسى ءجۇرىپ جاتىر. بۇل جوباعا جەكە ينۆەستور 1 ملرد. تەڭگەگە جۋىق ينۆەستيتسيا سالۋدا. ەسكەلدى اۋدانىنا بارعان جۇمىس ساپارى بارىسىندا وبلىس اكىمى بەيبىت يساباەۆ اتالعان نىساننىڭ قۇرىلىسىمەن تانىستى، دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.
شارۋاشىلىق ديرەكتورى رۋسلان سافارگاليەۆ ءوڭىر باسشىسىنا جوبانىڭ ىسكە اسىرۋ بارىسى تۋرالى بايانداپ بەردى. ونىڭ ايتۋىنشا، شارۋاشىلىق بالىقتىڭ باعالى تۇرلەرىن جاساندى وسىرۋمەن اينالىسادى. مۇندا تولىق وندىرىستىك–ينكۋباتسيالىق تسيكل اتقارىلادى، ياعني ۋىلدىرىقتان نەمەسە شاباقتان باستاپ دايىن تاۋار تۇرىندەگى بالىققا دەيىن ءوسىرىلىپ شىعارىلادى. نىساننىڭ قۇرىلىسى وتكەن جىلدان باستالعان، بيىل كۇزدە اياقتالادى دەپ جوسپارلانىپ وتىر.
- ۋىلدىرىقتى ارنايى پولشادان اكەلدىك. شارۋاشىلىقتا ۋىلدىرىقتان باستاپ ءوزىمىز ءوسىرىپ دايىن بالىقتى تاۋار تۇرىندە ۇسىنامىز. مۇنان سوڭ كونسەرۆىلەۋمەن دە، قاقتاۋمەن دە اينالىساتىن بولامىز. ءبىر سوزبەن ايتقاندا، بارلىق وندىرىستىك پروتسەستى ءوزىمىز اتقارامىز. قازىرگى كەزدە ءبىر عيماراتتى سالىپ، ىسكە قوستىق، مۇندا بىركەلكى تەمپەراتۋرادا حانبالىق ۋىلدىرىقتارىنان شاباق ءوسىرىلىپ وتىر. مۇنداعى 1 ملن 200 مىڭ دانا شاباق كۇزگە قاراي تاۋارلى سالماعىن جيناپ ۇلگەرەدى. جۋىردا باسقا دا عيماراتتاردى سالىپ، تۇقى مەن بەكىرە تۇقىمداس بالىقتاردى وسىرۋگە كىرىسەمىز، - دەدى ر.سافارگاليەۆ.
اتالعان شارۋاشىلىقتا بالىققا ارنالعان 93 باسسەين، سول سياقتى 63 سوتىق جەردە توعان جاسالادى. مۇندا جىلىنا 80 توننادان 1 مىڭ تونناعا دەيىن ءونىم شىعارىلادى دەپ كۇتىلۋدە. دايىن ءونىمدى الدىمەن وبلىس كولەمىندە، كەيىن ەلدىڭ باسقا وڭىرلەرىنە دە شىعارۋ جوسپارلانعان.
شارۋاشىلىقتا قازىر ون ەكى ادام جۇمىسقا قابىلدانعان، سونىڭ 3-ەۋى يحتيولوگ، 2-ەۋى تەحنولوگ مامان. نىسان تولىق ىسكە قوسىلعاندا جۇمىسپەن قامتىلعاندار سانى 30-عا جەتەدى. سولاردىڭ ءبىرى دياس رۋسلانۇلى اكەسىنە شارۋاشىلىقتا قولعابىس ەتۋ ءۇشىن يحتيولوگ ماماندىعىنا وقىپ كەلگەن.
- بالىق شارۋاشىلىعىندا جۇمىس ىستەۋدى ماقسات ەتىپ، وسى ماماندىقتا ارنايى وقىدىم. مۇندا قازىر سۋدىڭ تازالىعىن، تەمپەراتۋراسىن، كيسلورودىن باقىلايمىز. ودان بولەك بالىقتىڭ ازىقتىق كوەفيتسەنتىن قاداعالاپ، كۇندەلىكتى جەم بەرەمىز، - دەدى د. رۋسلانۇلى.
جالپى جەتىسۋ وبلىسىندا 20-دان استام بالىق وسىرەتىن شارۋاشىلىق جۇمىس ىستەيدى. بۇل شارۋاشىلىقتار وتكەن جىلى جالپى كولەمى 700 توننادان استام ءونىم شىعارعان.
