قازاقستان حالىق كەڭەسىنىڭ مۇشەلەرى نۇرسۇلتان ورىنباساروۆ، جانۇزاق مۋساپيروۆ جانە باقىت اتايبەكوۆ الماتى وبلىسىنا جۇمىس ساپارى اياسىندا قاسكەلەڭ قالاسىندا ءبىلىم جانە الەۋمەتتىك سالا قىزمەتكەرلەرىمەن، شامالعان اۋىلىندا مەديتسينا ماماندارىمەن، سونداي-اق شالقار اۋىلىندا جەرگىلىكتى تۇرعىندارمەن كەزدەسىپ، مەملەكەت باسشىسىنىڭ جولداۋىندا كوتەرىلگەن وزەكتى ماسەلەلەردى تالقىلادى.
قاسكەلەڭ قالاسىنىڭ مادەنيەت ۇيىندە وتكەن كەزدەسۋدە ءبىلىم بەرۋ سالاسىن دامىتۋ، ينكليۋزيۆتى ءبىلىم بەرۋدى جەتىلدىرۋ، ەرەكشە ءبىلىم بەرۋ قاجەتتىلىكتەرى بار بالالارعا قولايلى جاعداي جاساۋ، ءبىلىم بەرۋ ينفراقۇرىلىمىن جاڭعىرتۋ جانە پەداگوگتەردىڭ جۇمىس جۇكتەمەسىن وڭتايلاندىرۋ ماسەلەلەرى كەڭىنەن كوتەرىلدى.
كەزدەسۋ بارىسىندا كەڭەس مۇشەسى نۇرسۇلتان ورىنباساروۆ پرەزيدەنت جولداۋىندا ايقىندالعان نەگىزگى باسىمدىقتارعا توقتالدى.
اتاپ ايتقاندا، «حالىقتىق قۇرىلىس» باعدارلاماسى اياسىندا ۇلتتىق قور قاراجاتى ەسەبىنەن اۋقىمدى ينفراقۇرىلىمدىق جوبالاردى جۇزەگە اسىرۋ، جاڭا مەكتەپتەر، بالالار اۋرۋحانالارى، پەرزەنتحانالار مەن الەۋمەتتىك نىساندار سالۋ كوزدەلگەن. سونىمەن قاتار اۋىل شارۋاشىلىعىن قولداۋ، فەرمەرلەرگە ۇزاق مەرزىمدى ينۆەستيتسيالىق قارجى ءبولۋ، اۋىلداردى گازداندىرۋ، سۋمەن قامتاماسىز ەتۋ جانە اگرولوگيستيكانى دامىتۋ ماسەلەلەرىنە باسىمدىق بەرىلەتىنى ايتىلدى.
سونداي-اق الەۋمەتتىك ادىلدىكتى قامتاماسىز ەتۋ، ازاماتتاردىڭ تابىسىن ارتتىرۋ، دارىگەرلەر مەن پەداگوگتەردىڭ ەڭبەگىن قولداۋ جانە مەملەكەتتىك كومەكتى شىن مانىندە مۇقتاج ازاماتتارعا باعىتتاۋ ماسەلەلەرى دە نازاردان تىس قالعان جوق.
الەۋمەتتىك سالا قىزمەتكەرلەرىمەن وتكەن باسقوسۋدا كەڭەس مۇشەلەرى مەملەكەتتىك الەۋمەتتىك قولداۋ جۇيەسىن جەتىلدىرۋدىڭ ماڭىزىن اتاپ ءوتتى. مەملەكەت باسشىسى قاسىم-جومارت توقاەۆتىڭ «مەملەكەتتىك كومەك شىن مۇقتاج ادامدارعا عانا بەرىلۋگە ءتيىس» دەگەن ۇستانىمىن نەگىزگە الا وتىرىپ، الەۋمەتتىك ساياساتتاعى ءاربىر رەفورمانىڭ ازاماتتاردىڭ تۇرمىس ساپاسىنا ىقپالىن ەسكەرۋ قاجەتتىگى ايتىلدى.
ال شامالعان اۋىلىندا مەديتسينا قىزمەتكەرلەرىمەن وتكەن كەزدەسۋدە كەڭەس مۇشەسى جانۇزاق مۋساپيروۆ دەنساۋلىق ساقتاۋ سالاسىن دامىتۋ باعىتىنداعى مىندەتتەرگە توقتالدى.
پرەزيدەنت جولداۋىندا ەلىمىزدە سەگىز زاماناۋي پەريناتالدىق ورتالىق پەن جەتى كوپبەيىندى بالالار اۋرۋحاناسىن سالۋ جوسپارلانعانى اتاپ ءوتىلدى. جاڭا مەديتسينالىق نىسانداردىڭ قاتارىندا قاسكەلەڭ قالاسىنىڭ دا بولۋى اۋدان تۇرعىندارى ءۇشىن ماڭىزدى جاڭالىق ەكەنى ايتىلدى. بۇل باستاما بالالارعا كورسەتىلەتىن مەديتسينالىق كومەكتىڭ قولجەتىمدىلىگىن ارتتىرىپ، ءوڭىردىڭ دەنساۋلىق ساقتاۋ ينفراقۇرىلىمىن دامىتۋعا مۇمكىندىك بەرەدى.
سونىمەن قاتار العاشقى مەديتسينالىق-سانيتارلىق كومەك جۇيەسىن جاڭعىرتۋ، مەديتسينا قىزمەتكەرلەرىن قولداۋ، مەديتسينالىق قىزمەت ساپاسىن ارتتىرۋ جانە ەرەكشە قاجەتتىلىكتەرى بار بالالارعا ارنالعان ينفراقۇرىلىمدى جەتىلدىرۋ ماسەلەلەرى تالقىلاندى.
جۇمىس ساپارى شالقار اۋىلىنىڭ تۇرعىندارىمەن وتەتىن كەزدەسۋمەن جالعاستى. باسقوسۋ بارىسىندا جولداۋدا بەلگىلەنگەن ەلدىڭ الەۋمەتتىك-ەكونوميكالىق دامۋ باسىمدىقتارى، ەنەرگەتيكا سالاسىن جەتىلدىرۋ، حالىقتىڭ ءال-اۋقاتىن ارتتىرۋ جانە وڭىرلەردەگى وزەكتى ماسەلەلەردى شەشۋ جولدارى ءسوز بولدى.
