استانادا قۇرىلىس الاڭىندا مۇنارالى كراندى بولشەكتەۋ كەزىندە كران ءماشينيسى بيىكتىكتەن قۇلاپ كەتتى، دەپ حابارلايدى “ادىرنا” ءتىلشىسى.
كتك مالىمەتىنشە، ايەلدىڭ وڭ اياعىن امپۋتاتسيالاۋعا تۋرا كەلگەن. قايعىلى وقيعا 31 تامىزدا بولعان. قۇرىلىس نىسانىندا مۇنارالى كراندى بولشەكتەۋ جۇمىستارى جۇرگىزىلگەن كەزدە كران قۇلاعان. تاعى ءبىر جۇمىسشى وقيعا ورنىندا قازا تاپقان. ال كران ءماشينيسى ەس-ءتۇسسىز كۇيدە جەدەل جاردەممەن اۋرۋحاناعا جەتكىزىلگەن.
زارداپ شەككەن اقمارال قاراليەۆانىڭ ايتۋىنشا، جۇمىسشىلار كراننىڭ ءبىر سەكتسياسىن شەشكەننەن كەيىن راتسيا ارقىلى بىرنەشە سەكتسيانى قاتارىنان بولشەكتەۋ تۋرالى نۇسقاۋ بەرىلگەن. وسىدان كەيىن كران قاتتى شايقالىپ، ايەل بيىكتىكتەن قۇلاپ كەتكەن.
قازىر اقمارال قاراليەۆا اۋرۋحانادا ەم قابىلداپ جاتىر. ول ءۇش بالانى جالعىز تاربيەلەپ وتىرعانىن ايتادى.
جۇمىس بەرۋشى زارداپ شەككەن ايەلگە مۇگەدەكتەر ارباسىن الىپ بەرگەن. كومپانيا ءۇش ايلىق جالاقى كولەمىندە وتەماقى تولەۋگە ۋادە ەتكەن. الايدا ايەل ەڭبەككە قابىلەتتىلىگىنەن ايىرىلعانىنا بايلانىستى ۇزاق مەرزىمدى قارجىلىق قولداۋ كورسەتىلۋىن تالاپ ەتىپ وتىر.
زارداپ شەككەن ايەلدىڭ پاتەر بويىنشا 19 ميلليون تەڭگەدەن استام قارىزى بار ەكەنى حابارلاندى.
قۇرىلىس كومپانياسى وقيعا مەن ەڭبەك داۋىنا قاتىستى تۇسىنىكتەمە بەرۋدەن باس تارتقان.
قازىر وقيعانىڭ ءمان-جايىن ارنايى كوميسسيا انىقتاپ جاتىر.
