تاۋەلسىز ەلىمىزدىڭ تىرەگى، بولاشاعى – جاس ۇرپاق. بۇل ورايدا وقۋشىلارعا ساپالى ءبىلىم، سانالى تاربيە بەرۋدىڭ ماڭىزى زور. ءدال قازىرگى ۋاقىتتا بالالاردىڭ پاندەميا كەزىندە ءبىلىم الۋلارىنداعى ولقىلىقتارىن تولىقتىرۋ ماقساتىندا جازعى مەكتەپ جۇمىسىن جۇرگىزۋدە.
كەگەن اۋدانىنداعى ۇلاعاتتى ۇستاز، بىلىكتى باسشى لارا نۇسىپقوجاەۆا جەتەكشىلىك جاسايتىن س. سەركەباەۆ اتىنداعى مەكتەپ-گيمنازياسىنداعى جازعى وقىتۋعا 1 جانە 8-سىنىپ ارالىعىنداعى 250 بالا تارتىلعان. ولاردىڭ ءبارى «قىران»، «جاس ۇلان»، «پاتريوت» سەكىلدى 17 توپقا بولىنگەن. مەكتەپتە 1 ماۋسىم مەن 19 ماۋسىم ارالىعىنداعى ءدارىس كۇندەرىنىڭ ءبارى اتاۋلى ءىس-شارالارىنا تولى. اتاپ ايتساق، «جاس بلوگەرلەر كۇنى»، «ەكو كۇنى»، «وقۋعا قۇشتار مەكتەپ كۇنى»، «پوەزيا كۇنى»، «دەباتتىق كۇنى»، «جاس كوشباسشىلار كۇنى» سەكىلدى كۇندەردىڭ بەرەرى كوپ، تارتار سىيى از ەمەس. جازعى مەكتەپ تۇسىندا وقۋشىلارعا اسىرەسە، ماتەماتيكا، اعىلشىن ءتىلى، تاريح، دۇنيەتانۋ سەكىلدى ەڭ نەگىزگى كۇردەلى پاندەر بويىنشا جەتكىلىكتى دارەجەدە ءدارىس بەرىلەدى. ساباقتان كەيىن شاكىرتتەر ار كۇنى ءدامدى تاعامداردان، سۋسىنداردان ءدام تاتادى، ويىن وينايدى، ۋاقىتتارىن كوڭىلدى وتكىزەدى. بۇعان «بالداۋرەن» ساۋىقتىرۋ لاگەرىندە دەمالىپ قايتقان شاكىرتتەر دە ۇلەستەرىن قوسۋدا.لارا نۇسىپقوجاەۆا باستاعان مەكتەپ ۇجىمى بالالاردى قورعاۋ كۇنىن ەستە قالارلىقتاي ەتىپ وتكىزدى. بۇل كۇنى بالالار اسىق اتۋ، ارقان تارتۋ سەكىلدى ۇلتتىق ويىن تۇرلەرىمەن اينالىستى. سۋرەت سالدى، مەكتەپ الدىنا توسەلگەن ويۋلى تاستاردىڭ بەتىنە ايشىقتى قولتاڭبالارىن قالدىردى. ۇلاعاتتى ۇستازدارى گۇلعاسىن شورانوۆا مەرەكەگە وراي ۇستازدىق، انالىق اق جۇرەگىمەن قولداۋشىلىعىن كورسەتىپ، ءار توپتىڭ بالاپاندارىنا بالمۇزداق سىيعا تارتتى. وسى كۇنى بالالار اسەم ساز اياسىندا ءتۇرلى ويىن ويناپ، شات-شادىمان قۋانىشقا كەنەلدى. بالاپانداردى قۋانتقان، ولاردىڭ ءتول مەرەكەلەرىن تاماشا ەتىپ وتكىزگەن مەكتەپ باسشىلىعىنا اتا-انالاردىڭ العىستان باسقا ايتارى جوق.
قانات ءبىرجانسال
كەگەن اۋدانى
