اق حالاتتى ابزال جان

2718
Adyrna.kz Telegram

1991 جىلى قازاقستان جەكە مەملەكەت بولىپ، ەڭسەلى ەلدىگىمىز تانىلعان بولاتىن. سودان بەرى ءبىراز ۋاقىت ءوتىپ، وتانىمىزدا كوپتەگەن جاقسى وزگەرىستەر ورىن الدى. ءتىپتى، ەلىمىز ەگەمەندىك العان تۇستا دۇنيەگە كەلگەن بالالار قازىرگى كۇنى وتىزدى ەڭسەرگەن ازاماتتار بولىپ، مەملەكەتىمىزدىڭ ءوسىپ-وركەندەۋىنە وزدەرىنىڭ سۇبەلى ۇلەستەرىن قوسۋدا. سونداي جاستاردىڭ قاتارىندا قاراساي اۋداندىق كوپسالالى اۋرۋحاناسىندا ەڭبەك ەتىپ جۇرگەن دارىگەر-ماممولوگ سانيا نۇراحانقىزى دا بار. وسى رەتتە ەلىمىزدىڭ مەرەيتويى اياسىندا جانە دە الدا كەلە جاتقان مەديتسينا قىزمەتكەرىنىڭ مەرەكەسى قارساڭىندا سانيانىڭ ءومىرى، قىزمەتىندەگى قىزىعى مەن قيىندىعى جايلى سىزدەرگە جاقىنىراق تانىستىرىپ ءوتۋدى ءجون كوردىك.

توعىز جىل بويى مەديتسينا سالاسىندا ءبىلىم نارىمەن سۋسىنداعان تاۋەلسىزدىكتىڭ قۇرداسى سانيا نۇراحانقىزى بۇگىندە اۋدانارالىق كوپسالالى اۋرۋحانادا دارىگەر-ماممولوگ قىزمەتىن اتقارادى. جارقىن جۇزىنەن قاراپايىمدىلىق نىشانى انىق اڭعارىلىپ تۇراتىن جاس مامان 1991 جىلى وڭتۇستىك قازاقستان وبلىسى، تۇلكىباس اۋدانى، ماشات اۋىلىندا دۇنيەگە كەلگەن. ءۇيدىڭ كەنجەسى سانيا كوپتەگەن جىلدار بويى ۇستازدىق جولىندا ادال ەڭبەك ەتىپ كەلە جاتقان انالارىن ۇلگى تۇتىپ، ۇستازدىقتى قالاعان اعاسى مەن اپكەسىنەن باسقا جول تانداپ، بالا كەزىنەن دارىگەر بولۋدى عانا ارمانداعان ەكەن.

– اق جەلەڭدى ابزال جانداردىڭ قاتارىندا بولۋ مەنىڭ بالا كۇنگى ارمانىم ەدى. كىشكەنتاي كەزىمدە ۇنەمى ءوزىمنىڭ ويىنشىقتارىمنىڭ «جۇرەك قاعىسىن، دەمىن تەكسەرىپ» وينايتىن ەدىم. دارىگەرلەر قاتارىندا ىستەيتىن انامنىڭ ىنىسىنە، ناعاشى اعاما قىزىعا قاراپ، ءوزىمدى بولاشاقتا مىقتى كارديولوگ رەتىندە كوپ ەلەستەتەتىنمىن. مەنىڭ وسىنداي قىزىعۋشىلىعىمدى بايقاعان انام ءوزى مۇعالىم بولعانىنا قاراماستان، ماعان ىلعي دا سەن بولاشاقتا دارىگەر بولاسىڭ، دەپ كوپ ايتاتىن. ءتىپتى، مەكتەپتى اياقتاعاننان كەيىن دە ماعان كوپ قولداۋ كورسەتىپ، مەنى الماتى قالاسىنداعى مەديتسينا ۋنيۆەرسيتەتىنە وقۋعا ءتۇسىردى، – دەپ ءوزىنىڭ بالالىق شاعىن ەسكە الدى كەيىپكەرىمىز.

ءوز ارمانىنا جەتۋ ءۇشىن ول تۋعان اۋىلىندا اناسى ساباق بەرەتىن ورتا مەكتەپتى ءتامامداپ، ەلىمىزدىڭ كوپتەگەن مىقتى دارىگەرلەرىن وقىتقان س.اسفەندياروۆ اتىنداعى قازاق ۇلتتىق مەديتسينا ۋنيۆەرسيتەتىنە تۇسەدى. اتالعان وقۋ ورنىندا 2008-2013 جىلدارى «جالپى مەديتسينا» ماماندىعى بويىنشا باكالاۆردى اياقتايدى. 2013 جىل سانيا ءۇشىن تەك وقۋىنىڭ العاشقى ساتىسىنىڭ اياقتالۋىمەن عانا ەمەس، سونداي-اق، باسقا دا ماڭىزدى وقيعامەن ەستە قالعان. بۇل جىلى ول بولاشاق جارى مۇحتارمەن تانىسادى. ءبىر جىلدان كەيىن وعان تۇرمىسقا شىعىپ، ءوزىنىڭ وتاۋلارىن قۇرعان ولار بۇگىندە قاراساي اۋدانىندا تۇرىپ جاتىر. 2013 جىلى سانيا ءوزىنىڭ بىلىكتىلىگىن ءارى قاراي جەتىلدىرۋ ءۇشىن اتالمىش جوعارعى وقۋ ورنىنىڭ ينتەرناتۋراسىنا ءتۇسىپ، 2015 جىلى «تەراپەۆت» ماماندىعىن مەڭگەردى. 2015 جىل دا سانيا ءۇشىن ەرەكشە قۋانىشتى ساتپەن ەستە قالعان. سەبەبى، ول وسى جىلى ءوزىنىڭ تۇڭعىش بالاسىن دۇنيەگە اكەلدى. وسىعان بايلانىستى ءبىر جىلعا دەمالىس العان ول ۇيىندە بوس وتىرعىسى كەلمەي، اۋدانىمىزداعى اۋرۋحاناعا ۋچاسكەلىك تەراپەۆت رەتىندە جۇمىسقا كىرەدى. مۇندا ءبىراز ۋاقىت ەڭبەك ەتىپ، 2016 جىلى قازاق ونكولوگيا جانە راديولوگيا ينستيتۋتىنىڭ رەزيدەنتۋراسىنا ءتۇسىپ، ونى 2019 جىلى ءتامامداپ، ونكولوگ مامانى بولىپ شىعادى.«جاس كەلسە – ىسكە» دەگەندەي، جاس مامان كەيىن اۋدانارالىق كوپسالالى اۋرۋحاناعا دارىگەر-ونكولوگ رەتىندە جۇمىسقا كىرەدى. كەيىننەن ءوزىنىڭ سالاسىنداعى باعىتىن ءبىراز وزگەرتىپ، 2020 جىلدان دارىگەر-ماممولوگ بولىپ ەڭبەك ەتە باستايدى. بۇگىندە ول سوڭعى جىلدارى ايەلدەر اراسىندا كوبەيىپ كەلە جاتقان قاتەرلى ىسىكتى ەمدەۋمەن جانە دە ونىڭ الدىن الۋمەن اينالىسادى.

– ءبىز ەكى جىلدا ءبىر رەت اۋدانىمىزداعى 40-70 جاس ارالىعىنداعى ايەلدەردى سكرينينگتەن وتكىزىپ وتىرامىز. ويتكەنى، بۇگىندە كوپتەگەن ايەلدەر وزدەرىنىڭ قاتەرلى ىسىكپەن نەمەسە وعان الىپ كەلەتىن وزگە دە اۋرۋلارمەن اۋىراتىندىقتارىن بىلمەيدى. وتكەن جىلدىڭ وزىندە اۋدانىمىزدىڭ 53 تۇرعىنى وسى اۋرۋمەن تىركەلگەن. ولاردىڭ 23-ءىن سكرينينگ ارقىلى انىقتاپ، ۋاقىتىلى ەمدەلۋگە جىبەردىك. بۇگىندە ءبىز بۇل ەمدەلۋشىلەردىڭ بارلىعىن تىزىمگە كىرگىزىپ، ولاردىڭ ۋاقىتىندا ەم الىپ، اۋرۋىن اسقىندىرىپ الماۋىن قاداعالاپ وتىرمىز. بۇل سالادى ىستەگەنىمە كوپ بولماسا دا ءبىراز نارسەنى كورىپ ۇلگەردىم. ادامداردىڭ وسى اۋرۋمەن كۇرەسىپ، ونى جەنگەندەردىڭ قۋانىشتى كۇلكىلەرىن، اۋرۋعا توتەپ بەرە الماي كەتكەن ادامداردىڭ ارتىندا قالعان جاقىندارىنىڭ كوز جاستارىن كوردىم… ارقايسىمىز ەڭ ءبىرىنشى كەزەكتە ادام بالاسى بولعاندىقتان، بۇنىڭ ءبارى مەنىڭ تەك ەسىمدە عانا ەمەس، سونداي-اق، جۇرەگىمدە دە ءوز ءىزىن قالدىردى… سوندىقتان دا دارىگەر مامان، ادام رەتىندە باسقالارعا ايتارىم، ءوز دەنساۋلىقتارىڭىزعا باسا دەن قويىپ، ءبىراز ۋاقىتتارىڭىزدى دارىگەرگە قارالۋعا جۇمساعاندارىڭىز ءجون. سەبەبى، جاقسى دەنساۋلىق ادام ومىرىندەگى ەڭ ماڭىزدى قاجەتتىلىكتەردىڭ ءبىرى، – دەيدى دارىگەر.

ماماندىعىنىڭ قيىندىعىنا قاراماي ءوزىنىڭ جۇمىسىنا بارشا بەرىلىپ ىستەپ جۇرگەن سانيا بۇگىندە مەديتسينا قىزمەتكەرى رەتىندە مىندەتىن ادال، ابىرويمەن اتقارىپ كەلەدى.ءوزىنىڭ جۇمىسىنا جاۋاپتى، جىلى جۇزىمەن، سابىرلى دا سالماقتى مىنەزىمەن ارىپتەستەرىنىڭ ورتاسىندا سىيلى سانيا تەك جاقسى مامان عانا ەمەس، سونداي-اق، بۇگىندە ءبىر اۋلەتتىڭ بەرەكەسىن ايرانداي ۇيىتىپ وتىرعان يبالى كەلىن، ادال جار، اياۋلى انا. جۇبايى مۇحتار ەكەۋى ءۇرىپ اۋىزعا سالعانداي ەكى بالا تاربيەلەپ، وتە جاۋاپتى جۇمىسىنا قاراماستان وتباسى مۇشەلەرىنىڭ بابىن جاساپ، العا قادام باسىپ كەلەدى. «مۇنىن بارلىعى دا ەڭ ءبىرىنشى كەزەكتە مەنىڭ ەنەمنىڭ ارقاسى!» دەيدى كەيىپكەرىمىز.– مەنىڭ ەنەم تاماشا ادام، – دەپ اڭگىمەسىن باستادى تاعى دا. – ول كىسى كۇيەۋىم سياقتى ماعان ارقاشان قولداۋ كورسەتىپ وتىرادى. العاشقى بالامدى دۇنيەگە اكەلگەندە دە، وقۋىمدى جالعاستىرامىن دەگەندە دە مەنىڭ ءبىر جاعىما شىعىپ، بالالارىما قاراۋ، ولاردى بالاباقشاعا اپارۋ دەگەن سياقتى ىستەردى ءوز مويىنىنا الىپ، كوپ كومەكتەسەتىن. بۇگىننىڭ وزىندە جۇمىسىم بولسىن، نە باسقا دا جاعداي بولسىن ءاردايىم مەنى بارىنشا قولداپ جۇرەدى. سوندىقتان مەنىڭ اتا-ەنەمە ايتار العىسىم شەكسىز.ازات ەلدىڭ قۇرداسى بولۋدىڭ ءوزىن زور قۇرمەت، ۇلكەن ابىروي دەپ سانايتىن جاس دارىگەردىڭ بولاشاقتا ءوز سالاسى بويىنشا بىلىكتى مامان بولۋدان باسقا دا الدىنا قويعان ماقساتتارى، بىلگىسى، ۇيرەنگىسى ءارى كورگىسى كەلەتىن نارسەلەرى جەتەرلىك. ولاي بولسا كەلەشەكتىڭ كەمەل كۇندەرىنە قول سوزىپ، باياندى بولاشاققا جول باستاعان قازاق ەلىنىڭ تاۋەلسىزدىگىن تۇعىرلى ەتۋ جولىندا جۇرگەن وزگە جاستار سىندى سانياعا دا تەك ساتتىلىك تىلەيمىز!

 

اقتوتى مىرزابەكقىزى

پىكىرلەر