Táýelsiz elimizdiń tiregi, bolashaǵy – jas urpaq. Bul oraıda oqýshylarǵa sapaly bilim, sanaly tárbıe berýdiń mańyzy zor. Dál qazirgi ýaqytta balalardyń pandemııa kezinde bilim alýlaryndaǵy olqylyqtaryn tolyqtyrý maqsatynda jazǵy mektep jumysyn júrgizýde.
Kegen aýdanyndaǵy ulaǵatty ustaz, bilikti basshy Lara Núsipqojaeva jetekshilik jasaıtyn S. Serkebaev atyndaǵy mektep-gımnazııasyndaǵy jazǵy oqytýǵa 1 jáne 8-synyp aralyǵyndaǵy 250 bala tartylǵan. Olardyń bári «Qyran», «Jas Ulan», «Patrıot» sekildi 17 topqa bólingen. Mektepte 1 maýsym men 19 maýsym aralyǵyndaǵy dáris kúnderiniń bári ataýly is-sharalaryna toly. Atap aıtsaq, «Jas blogerler kúni», «Eko kúni», «Oqýǵa qushtar mektep kúni», «Poezııa kúni», «Debattyq kúni», «Jas kóshbasshylar kúni» sekildi kúnderdiń bereri kóp, tartar syıy az emes. Jazǵy mektep tusynda oqýshylarǵa ásirese, matematıka, aǵylshyn tili, tarıh, dúnıetaný sekildi eń negizgi kúrdeli pánder boıynsha jetkilikti dárejede dáris beriledi. Sabaqtan keıin shákirtter ár kúni dámdi taǵamdardan, sýsyndardan dám tatady, oıyn oınaıdy, ýaqyttaryn kóńildi ótkizedi. Buǵan «Baldáýren» saýyqtyrý lagerinde demalyp qaıtqan shákirtter de úlesterin qosýda.Lara Núsipqojaeva bastaǵan mektep ujymy balalardy qorǵaý kúnin este qalarlyqtaı etip ótkizdi. Bul kúni balalar asyq atý, arqan tartý sekildi ulttyq oıyn túrlerimen aınalysty. Sýret saldy, mektep aldyna tóselgen oıýly tastardyń betine aıshyqty qoltańbalaryn qaldyrdy. Ulaǵatty ustazdary Gúlǵasyn Shoranova merekege oraı ustazdyq, analyq aq júregimen qoldaýshylyǵyn kórsetip, ár toptyń balapandaryna balmuzdaq syıǵa tartty. Osy kúni balalar ásem saz aıasynda túrli oıyn oınap, shat-shadyman qýanyshqa keneldi. Balapandardy qýantqan, olardyń tól merekelerin tamasha etip ótkizgen mektep basshylyǵyna ata-analardyń alǵystan basqa aıtary joq.
Qanat BIRJANSAL
Kegen aýdany
