مەملەكەت باسشىسى قاسىم-جومارت توقاەۆتىڭ «تاۋەلسىزدىك بارىنەن قىمبات» اتتى ماقالاسى وتانداستارىمىزدى وتىز جىلدا ءجۇرىپ وتكەن كۇردەلى تاريحي جولىمىزعا ناقتى تالداۋ جاساۋعا، كەلەشەك باعىت-باعدارىمىزدى پايىمداۋعا جاردەمدەسكەن اسا ماڭىزدى قۇجات بولدى.
«تاۋەلسىزدىك بارىنەن قىمبات!» دەيتىن وتانداستارىمىز قازاق حالقىنا نەنىڭ قىمبات ەكەنىن تەرەڭ ءتۇسىندى. ازاماتتىق تانىتۋدا، ادىلەتتىلىك ورناتۋدا، ساباقتاستىقتى قۇرمەتتەۋدە مەملەكەتتىك ءداستۇر وسىلاي قالىپتاسادى. عاسىرعا تاتيتىن وتىز جىل ىشىندە وركەندەۋ جولىمىزدى ءۇش كەزەڭگە ءبولىپ قاراعان پرەزيدەنت ءبىزدىڭ ۇرپاقتىڭ ەنشىسىنە تيگەن كەزەڭنىڭ باقىتتى كۇندەرى مەن ۇيقىسىز تۇندەرىن، مىڭ تولعاندىرعان مازاسىز ساتتەرىن تاپ باسىپ ايتقانى قانداي عانيبەت. ءيا، بۇل – وزگەنى قايتالاعان باسقانىڭ سوقپاعى، بىرەۋدىڭ سۇرلەۋى ەمەس، بۇل – قازاقستاندىق جول، ياعني ءسىز بەن ءبىزدىڭ تاريحىمىز، ءوز داستانىمىز.
ارينە، تاۋەلسىز ەل اتانۋدىڭ ءوزى ادامداردىڭ بويىندا ازات سانا-سەزىمدى بىردەن قالىپتاستىرا المايدى. ونىڭ جۇگى باتپانداي اۋىر، قىسقا-ۇزاقتىعى ۋاقىتپەن شەكتەلمەيدى. تىرشىلىك ءۇشىن قاجەتتىگى اۋا ءتارىزدى. قىسقاسى، مۇنداي وتپەلى ءداۋىردى باستان كەشىرۋ ءتوزىمدى جۇيكەنى، وراسان زور ەڭبەكتى، سابىر مەن شىدامدىلىقتى تالاپ ەتەدى. سوندىقتان سوڭعى وتىز جىلدىڭ بارىسىندا قازاق حالقىنىڭ ارمانى كوركەيىپ، كەلەشەككە دەگەن ءۇمىتى بەكىگەنى ايان. دەسەك تە، ءالى دە تياناقتالماعان شارۋا شاش-ەتەكتەن، بۇيىرتسا رەت-رەتىمەن جوعىمىز تابىلار، بارىمىز باعالانار.
تاۋەلسىزدىك بارىنەن قىمبات، بارىنەن جوعارى ەكەنىن جاستاردىڭ ساناسىنا ورنىقتىرۋ – مەملەكەت ءۇشىن دە، ءاربىر وتباسى ءۇشىن دە اسا جاۋاپتى مىندەت. تاۋەلسىزدىك يدەيالارىن حالىق اراسىندا قۋاتتاندىرۋعا زور ەڭبەك ءسىڭىرىپ، وسى جولدا شەيىت بولعان ءبىرتۋار تۇلعالار قانشاما؟ اشارشىلىق پەن ساياسي قۋعىن-سۇرگىن قۇرباندارىن دا بۇگىنگى جاستار بىلۋگە ءتيىس.
«بيىل جەلتوقسان وقيعاسىنا 35 جىل تولادى. 1986 جىلى ورىمدەي ۇل-قىزدارىمىز كەڭەس وداعىنىڭ قاھارىنان قايمىقپاي، ۇلت نامىسى ءۇشىن الاڭعا شىقتى. وسى كۇننەن سوڭ تۋرا بەس جىل وتكەندە تاۋەلسىزدىگىمىزدى جاريالاۋىمىزدىڭ سيمۆولدىق ءمانى زور. بۇل ورايدا، ازاتتىقتىڭ العاشقى قارلىعاشتارى – جەلتوقسان قاھارماندارىنىڭ ازاماتتىق ەرلىگى لايىقتى باعاسىن الىپ، جوسپارلى تۇردە ناسيحاتتالۋى كەرەك» دەپ جازدى مەملەكەت باسشىسى اتالمىش ماقالاسىندا.
سونىمەن قاتار ماقالادا 1991 جىلى سەمەي پوليگونىنىڭ جابىلعانىنا، ەلباسى قول قويعان جارلىقتىڭ ارقاسىندا قازاقستان بۇكىل دۇنيە جۇزىنە يادرولىق قارۋ-جاراققا قارسى الەمدىك قوزعالىستىڭ كوشباسشىسى بولىپ تانىلعانىنا، الىپ مەملەكەتتەردىڭ سەنىمىنە يە بولىپ، حالىقارالىق قوعامداستىقتا جاۋاپكەرشىلىگى جوعارى ەل رەتىندە مويىندالعانىنا دا ەرەكشە ءمان بەرىلگەن.
وتىز جىلداعى جاسامپازدىق جولىمىزدى ەڭ الدىمەن ءوزىمىز قۇرمەتتەۋگە ءتيىسپىز. سوندا وزگەلەر دە بىزبەن ساناساتىن بولادى.
ايگۇل اشتاەۆا،
س.بەردىقۇلوۆ اتىنداعى ورتا مەكتەپ ديرەكتورىنىڭ
وقۋ-تاربيە ءىسى جونىندەگى ورىنباسارى.
