ەل تاۋەلسىزدىگىنىڭ 30 جىلدىعى مەن جەرۇيىق مەكەن الماتى وبلىسىندا "جەتىسۋ" فۋتبول كلۋبىنىڭ قۇرىلعانىنا 40 جىل تولۋىنا وراي وبلىستىق دەنە شىنىقتىرۋ جانە سپورت باسقارماسىنىڭ وكىلدەرى كلۋب ارداگەرلەرى مەن ۇزدىكتەرىن ماراپاتتادى.
سالتاناتتى شارا بارىسىندا ءسوز العان وبلىستىق دەنە شىنىقتىرۋ جانە سپورت باسقارماسىنىڭ نۇرباقىت تەڭىزباەۆ "جەتىسۋ" فۋتبول كلۋبىنىڭ ءوڭىر سپورتىن العا سۇيرەۋدە، جاسوسپىرىمدەردىڭ سالاۋاتتى ءومىر سالتىن قالىپتاستىرىپ، سپورتقا دەگەن ىقىلاسىن وياتۋدا وزىندىك ماڭىزدى ءرول ويناعانىن تىلگە تيەك ەتتى. سونداي-اق ەل ەگەمەندىگىمەن تۇسپا-تۇس كەلگەن ايتۋلى "داتانىڭ دا" تەگىن ەمەسىن، "جەتىسۋ" كومانداسى تاۋەلسىزدىكپەن ءبىر جاساسىپ، ءالى دە بيىك بەلەستەردى باعىندىراتىنىنا سەنىمدى ەكەنىن جەتكىزدى.
مەرەيلى مەرەكە كەزىندە باسقارما باسشىسى فۋتبول كلۋبىنىڭ ارداگەر-اقساقالى، "جەتىسۋدىڭ" ءار ويىنىن كورەرمەنگە تامپىشتەپ جەتكىزگەن ديكتور، ساتيدوننىڭ ەكس-ديرەكتورى گەننادي ميشەنكونى "الماتى وبلىسى سپورت سالاسىنىڭ ۇزدىگى" توسبەلگىسىمەن، وزگە فۋتبول كلۋبى ارداگەرلەرىن قۇرمەت گراموتاسىمەن ماراپاتتادى.
مۇنداي قۇرمەتتە سالا ارداگەرلەرى باسقارما باسشىلىعىنا العاۋسىز العىسىن ءبىلدىرىپ، ءوڭىر سپورتىن العا ىلگەرىلەتۋدە ءالى دە ەلەۋلى ەڭبەك ەتىپ، جاس سپورتشىلاردى بيىك بەلەستەرگە شىعارۋدا ايانىپ قالمايتىنىن جەتكىزدى.
