تاريح قاتپارىنا كوز جۇگىرتسەك، قازاق حالقى نەبىر زۇلمات زاماندى باسىنان كەشىردى. ءبىرىنشى، ەكىنشى دۇنيەجۇزىلىك سوعىستار، اشارشىلىق، رەپرەسسيا جىعىلعان جۇرتقا جۇدىرىق بولدى. جىلدار بويى جۇرگىزىلگەن وتارلاۋ ساياساتى ۇلتتىق سانامىزعا سوققى جاساپ، اتا-بابا داستۇرىنەن الشاقتاتۋعا تىرىستى. بىراق ەلىمىز قانداي سىنعا كەزىكسە دە ۇلتتىق مۇراتتى بيىك تۇتتى. ول ەلدىڭ ەركىندىگى، رۋحىمىزدىڭ تاۋەلسىزدىگى ەدى.
قايسارلىقتى تۋ ەتكەن حالقىمىز ءۇشىن تالاي جىل ارمانعا اينالعان تاۋەلسىزدىك تاڭى ارايلاپ اتتى. ەگەمەندىك وڭاي كەلمەدى. توگىلگەن قان مەن تەردىڭ وتەۋىنە بەرىلگەن ءتاڭىر سىيى - ماڭدايىمىزعا باسىلعان باق. ۇشسا قىراننىڭ قاناتى تالاتىن، شاپسا تۇلپاردىڭ تۇياعى توزاتىن ۇلان-عايىر جەردى مەكەندەپ، شەكارامىزدى بەكىتىپ، اتى الەمگە ايگىلى ەل رەتىندە ەڭسە تىكتەۋىمىز بەرەكە-بىرلىگىمىزدىڭ ارقاسى.
قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ «تاۋەلسىزدىك بارىنەن قىمبات» اتتى ماقالاسىنداعى:
«تاريحقا كوز جۇگىرتسەك، ءار بۋىن بەلگىلى ءبىر سىناقتى باسىنان وتكەرەدى. ءبىزدىڭ بابالارىمىز «اقتابان شۇبىرىندى، القاكول سۇلامانى»، اتالارىمىز الاپات اشارشىلىقتى، قۋعىن-سۇرگىندى، دۇنيەجۇزىلىك سوعىستى كوردى. توتاليتارلىق كەزەڭدە ۇلتتىق قۇندىلىقتارىمىزدان، تىلىمىزدەن، ءدىلىمىز بەن دىنىمىزدەن ايىرىلىپ قالا جازدادىق. ونىڭ ءبارى تاۋەلسىزدىكتىڭ ارقاسىندا حالقىمىزعا قايتا ورالدى. بىراق ۇلت پەن ەل رەتىندە ساقتالىپ قالۋ ءۇشىن بۇگىنگى جانە بولاشاق ۇرپاق جاڭا سىن-قاتەرلەرگە دايىن بولۋى كەرەك»، – دەگەن ءسوزى تاۋەلسىزدىككە جەتۋ قيىن دا، ونى ساقتاپ قالۋ ودان دا اۋىر ەكەنىن ايقىندايدى.
ءمانى تەرەڭ ماقالادا ايتىلعان تاعىلىمدى ارقايسىمىز جەتە ءتۇسىنىپ، ەرتەڭگى كۇنگە باعدار ەتۋىمىز كەرەك. كۇنى كەشە كۇللى تۇركى جۇرتىنىڭ استاناسى رەتىندە جاريالانعان تۇركىستان قالاسى تەرەڭ تاريحتىڭ كۋاگەرى ىسپەتتەس. سوناۋ ساق، عۇنداردان باستاۋ العان بابا جولى بۇگىنگە جالعاسىپ، ماڭگىلىك ەلدىڭ ەرتەڭىنە جول اشتى. بارلىعىمىز سول كەلەشەك ءۇشىن ايانباي ەڭبەك ەتىپ كەلەمىز. جوعىمىز تۇگەندەلىپ، وشكەنىمىز جانعان مەزەتتەگى ءار جىل، ءار كۇن، ءار اي، ءار ساعات تەڭدەسسىز، قادىر-قاسيەتىمىز ىسپەتتەس. وتىز جىلدىڭ ىشىندە ورىن العان بارلىق ايتۋلى وقيعا تاريح پاراعىنا التىن ارىپپەن جازىلدى. كەلەر ۇرپاق ءۇشىن تاۋەلسىزدىكتىڭ قادىر-قاسيەتىن ۇعىنۋعا، ونى تەرەڭ تۇسىنۋگە، سالت-ءداستۇرىن ساناسىنا ءسىڭىرىپ وسۋىنە سول تاريح جول اشپاق. ولاي بولسا، بۇگىنگى كۇنىمىزگە ەرتەڭگى تاريح رەتىندە قاراپ، كەلەشەككە ابىرويمەن ۇسىنايىق.
نۇرباقىت تەڭىزباەۆ،
الماتى وبلىستىق دەنە شىنىقتىرۋ
جانە سپورت باسقارماسىنىڭ باسشىسى
