Tarıh qatparyna kóz júgirtsek, qazaq halqy nebir zulmat zamandy basynan keshirdi. Birinshi, Ekinshi dúnıejúzilik soǵystar, asharshylyq, repressııa jyǵylǵan jurtqa judyryq boldy. Jyldar boıy júrgizilgen otarlaý saıasaty ulttyq sanamyzǵa soqqy jasap, ata-baba dástúrinen alshaqtatýǵa tyrysty. Biraq elimiz qandaı synǵa kezikse de ulttyq muratty bıik tutty. Ol eldiń erkindigi, rýhymyzdyń táýelsizdigi edi.
Qaısarlyqty tý etken halqymyz úshin talaı jyl armanǵa aınalǵan táýelsizdik tańy araılap atty. Egemendik ońaı kelmedi. Tógilgen qan men terdiń óteýine berilgen Táńir syıy - mańdaıymyzǵa basylǵan baq. Ushsa qyrannyń qanaty talatyn, shapsa tulpardyń tuıaǵy tozatyn ulan-ǵaıyr jerdi mekendep, shekaramyzdy bekitip, aty álemge áıgili el retinde eńse tikteýimiz bereke-birligimizdiń arqasy.
Qazaqstan Respýblıkasynyń Prezıdenti Qasym-Jomart Toqaevtyń «Táýelsizdik bárinen qymbat» atty maqalasyndaǵy:
«Tarıhqa kóz júgirtsek, ár býyn belgili bir synaqty basynan ótkeredi. Bizdiń babalarymyz «Aqtaban shubyryndy, Alqakól sulamany», atalarymyz alapat asharshylyqty, qýǵyn-súrgindi, dúnıejúzilik soǵysty kórdi. Totalıtarlyq kezeńde ulttyq qundylyqtarymyzdan, tilimizden, dilimiz ben dinimizden aıyrylyp qala jazdadyq. Onyń bári Táýelsizdiktiń arqasynda halqymyzǵa qaıta oraldy. Biraq ult pen el retinde saqtalyp qalý úshin búgingi jáne bolashaq urpaq jańa syn-qaterlerge daıyn bolýy kerek», – degen sózi táýelsizdikke jetý qıyn da, ony saqtap qalý odan da aýyr ekenin aıqyndaıdy.
Máni tereń maqalada aıtylǵan taǵylymdy árqaısymyz jete túsinip, erteńgi kúnge baǵdar etýimiz kerek. Kúni keshe kúlli túrki jurtynyń astanasy retinde jarııalanǵan Túrkistan qalasy tereń tarıhtyń kýágeri ispettes. Sonaý saq, ǵundardan bastaý alǵan baba joly búginge jalǵasyp, Máńgilik Eldiń erteńine jol ashty. Barlyǵymyz sol keleshek úshin aıanbaı eńbek etip kelemiz. Joǵymyz túgendelip, óshkenimiz janǵan mezettegi ár jyl, ár kún, ár aı, ár saǵat teńdessiz, qadir-qasıetimiz ispettes. Otyz jyldyń ishinde oryn alǵan barlyq aıtýly oqıǵa tarıh paraǵyna altyn árippen jazyldy. Keler urpaq úshin táýelsizdiktiń qadir-qasıetin uǵynýǵa, ony tereń túsinýge, salt-dástúrin sanasyna sińirip ósýine sol tarıh jol ashpaq. Olaı bolsa, búgingi kúnimizge erteńgi tarıh retinde qarap, keleshekke abyroımen usynaıyq.
Nurbaqyt TEŃIZBAEV,
Almaty oblystyq dene shynyqtyrý
jáne sport basqarmasynyń basshysy
