اتا-بابامىزدىڭ بىلەكتىڭ كۇشىمەن، نايزانىڭ ۇشىمەن قورعاپ، بىزگە اماناتتاپ كەتكەن تاۋەلسىزدىگىن ءتاۋ ەتىپ، ۇرپاققا جەتكىزۋ – مىندەتىمىز. بيىل تاۋەلسىزدىكتىڭ 30 جىلدىعى قارساڭىندا رەسپۋبليكا كولەمىندە, اۋىل، اۋدان، وبلىس بويىنشا كوپتەگەن ءىس-شارا وتكىزىلۋدە. وعان ءۇشارال ورتا مەكتەبى ۇجىمى دا ءوز ۇلەسىن قوسۋدا. «تاۋەلسىزدىكتىڭ 30 جىلدىعىنا – 30 ءتۇپ اعاش» دەپ مەكتەپ ۇجىمى اعاش كوشەتتەرىن ەگىپ، كوگالداندىرۋ جۇمىسىن جالعاستىردى. قاشىقتىقتان وقۋشىلار اراسىندا تاربيە ساعاتتارى، سۋرەت كورمەسى، شىعارما بايقاۋى ۇيىمداستىرىلۋدا.
تاۋەلسىزدىكتىڭ 30 جىلىندا ەلىمىزدىڭ جەتكەن جەتىستىكتەرى، باعىندىرعان بەلەستەرى، قازاقستاندى الەم تانىپ مويىنداۋى، مىنە، وسى تاريحي شەجىرەنى بۇگىنگى ۇرپاق ءبىلىپ، سەزىنىپ ءوسۋى ءتيىس. تاۋەلسىزدىككە تارتۋ رەتىندە مەكتەبىمىزدەگى دارىندى وقۋشىلار ءوز جىر-تولعاۋلارىن ارناۋدا. سونداي وقۋشىلاردىڭ ءبىرى – 11-سىنىپ وقۋشىسى گۇلمارال جاڭاباي. تاۋەلسىزدىكتىڭ 30 جىلدىعىنا ارناعان مىنا ولەڭىن تەبىرەنبەي وقۋ مۇمكىن ەمەس:
وتىز جىل تاۋەلسىزدىك تورىندەمىز،
ءالى تالاي بيىكتەردەن كورىنەرمىز.
رۋحتى ەلىم، قازاعىم، ماڭگى جاساپ،
ۇرپاقتاردىڭ جىرى بوپ توگىلەرمىز.
قانشاما تاريح جاتىر قويناۋىڭدا،
ۇلى دالام، جازيرالى جايلاۋىڭدا.
سول تاريحتىڭ بەرىلگەن جەمىسى عوي،
بۇگىنگى تاۋەلسىزدىك تويلاۋىڭ دا.
ەگەمەندىك كەلمەدى عاجاپپەنەن،
كەلدى قيىن-قىستاۋمەن، ازاپپەنەن.
ءورشىل رۋحتى اتا-بابام ارقاسىندا،
تانىلدى اتاۋىمىز «قازاق» دەگەن.
توگىلدى وسى جولدا قانشاما قان،
كورسەتتى باتىرلىعىن قانشاما جان؟!
اڭساۋمەنەن ەگەمەندى ەل بولۋدى،
ءوتتى قانشا ءتۇن مەن قانشاما تاڭ؟!
وتكەن تالاي تاريحتىڭ ساعاسىنان،
بوي كوتەرگەن ەسىلدىڭ جاعاسىنان.
سالىندى باس قالامىز سارىارقاداي،
كەڭ-بايتاق قازاعىمنىڭ دالاسىنان.
بۇل كۇندەرى نۇر-سۇلتان استانامىز،
اسەم، سۇلۋ كوركىڭە شاتتانامىز.
تاتۋ-ءتاتتى، بەيبىت تىنىش، كوركەم سۇلۋ،
باس قالامىز وزىڭمەن ماقتانامىز.
تىك ۇستاعان تورتكۇل دۇنيە تەرەزەسىن،
بۇگىن ەلىم كەڭ جايادى كەرەگەسىن.
قۋانىشپەن، شاتتىقپەن، ماقتانىشپەن،
تويلاۋدامىز تاۋەلسىزدىك مەرەكەسىن.
ولەڭ اتتى ولكەگە وزىندىك ساپار شەگىپ جۇرگەن گۇلمارالدىڭ بولاشاعىنان زور ءۇمىت كۇتەمىن. مەكتەپتەگى «جاس قالام»، «جاس قاۋىرسىن» ۇيىرمەلەرىنەن شىڭدالعان شاكىرتىمنىڭ جەتىستىكتەرى اۋداندىق، وبلىستىق، رەسپۋبليكالىق باسىلىمداردا جارىق كوردى. اۋداندىق، وبلىستىق ءابىش كەكىلباەۆ وقۋلارىنىڭ جەڭىمپازى، «جاستارى بەلسەندى ەلدىڭ ەرتەڭى جارقىن» اتتى جازبا اقىندار ءمۇشايراسىندا جانە «ونەردى ۇلىقتاعان جاستار» اتتى بايقاۋدان العىس حات يەلەندى.
ا.قۇنانبايۇلىنىڭ 175 جىلدىعىنا بايلانىستى «التىن عاسىر» عىلىمي-پراكتيكالىق ورتالىعى ۇيىمداستىرعان جارىستا ماقتاۋ قاعازى مەن ارنايى مەدالمەن ماراپاتتالدى. «ەلى سۇيگەن، جەرىن سۇيگەن ەلباسى» رەسپۋبليكالىق شىعارمالار بايقاۋىنىڭ ءبىرىنشى ورىن يەگەرى. گۇلمارال ەرسىنقىزىنىڭ شىعارماشىلىق جولىنا تالماس تالاپ تىلەي وتىرىپ، الار اسۋلارى ءالى دە كوپ بولادى دەپ سەنەمىن.
گۇلنارا قوجاحانوۆا،
ءۇشارال ورتا مەكتەبىنىڭ مۇعالىمى
