مەن قازاقتىڭ ۇلتتىق بىرەگەيلىگىن، ۇلتتىق بولمىسىن، رۋحاني ەرەكشەلىگىن ساقتاپ قالۋعا مول مۇمكىندك بەرىپ وتىرعان ەل تاۋەلسىزدىگىنەن 14 جىلدان كەيىن 2005 جىلى سول كەزدەگى استانا، قازىرگى نۇر-سۇلتان قالاسىندا دۇنيە ەسىگىن اشىپپىن. كوزىمدى اشىپ كورگەنىم - كوك اسپان، وسى اسپان تۇستەس كوگىلدىر تۋ. ەس ءبىلىپ، وڭ مەن سولىمدى تانىعاندا تاۋەلسىزدىك سيمۆولى - مەملەكەتتىك تۋىمىزدى، ءانۇرانىمىزدى، ەلتاڭبامىزدى جاقىنىراق ءبىلدىم. تۋى جىعىلعان ەلدىڭ رۋحى جىعىلاتىنىن، تۋىمىز ۇلتتىڭ بىرىگۋىنە ىقپال ەتەتىنىن، ۇلتتىق سانانى بيىك ەتەتىنىن بەرتىندە سەزىندىم. سپورتتا الەمدىك دەڭگەيدە جەڭىسكە جەتكەندەردىڭ قۇرمەتىنە مەملەكەتتىك تۋ كوتەرىلگەندە توبەم كوككە جەتكەندەي قۋانامىن.
بيىل تاۋەلسىزدىگىمىزگە 30 جىل تولدى. قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ «ەگەمەن قازاقستان» گازەتىندە جاريالانعان ەلىمىزدىڭ وتكەنى، قازىرگىسى جانە بولاشاعى تۋرالى ءسوز بولعان «تاۋەلسىزدىك بارىنەن قىمبات» دەپ اتالاتىن ماقالاسى جاستاردى جاڭا بەل-بەلەستەردى باعىندىرۋعا، جاڭا سەرپىندە دامۋعا جىگەرلەندىرەدى. مەملەكەت باسشىسى وسى ماقالاسىندا: «ادام بالاسى دۇنيەگە پاتريوت بولىپ كەلمەيدى. ول ءبىلىم مەن تاربيە الىپ، الەۋمەتتىك ورتامەن ارالاسىپ، ازاماتتىق بولمىسىن قالىپتاستىرۋ كەزىندە پاتريوتقا اينالادى. ءوزىنىڭ جەكە ماقسات-مۇددەلەرى قوعام يگىلىگىمەن ۇندەسىپ، ەلىنىڭ دامۋىنا ەلەۋلى ۇلەس قوسىپ جاتقانىن جان-جۇرەگىمەن سەزىنگەن ادام ناعىز باقىتقا كەنەلەدى»-دەي كەلە، جاستارعا ۇلكەن ءۇمىت ارتاتىنىن ءبىلدىردى.
قاسىم-جومارت كەمەلۇلى جوعارىدا اتالعان ەڭبەگىندە تاۋەلسىزدىكتىڭ ماڭگىلىك ۇشتاعانى رەتىندە كەڭ بايتاق جەرىمىزدى، قاستەرلى ءتىلىمىزدى، بەرەكە-بىرلىگىمىزدى اتادى. شىن مانىندە دە جەرىمىزدىڭ تۇتاستىعى، ءتىلىمىزدىڭ مارتەبەسى، ەلىمىزدىڭ بىرلىگى-ءبىزدىڭ ۇلتىمىزدىڭ بۇگىنى مەن بولاشاعى. ءبىزدىڭ ۇكىلى ءۇمىتىمىز دە، سالماقتى سەنىمىمىز دە، بارلىق ارمان-ماقستىمىز دا وسى ۇشەۋىنىڭ ۇستىندە. سوندىقتان مەن دە بۇل شىعارمامدا ۇشتاعان تۋرالى وي-پىكىرىمدى ورتاعا سالامىن.
ەجەلگى اڭىزدا كۇشى باسىم كورشىلەسى جۇيرىك اتىن، سۇلۋ ايەلىن قالاعاندا مەسەلىن قايتارماعان بابامىز جەرىن سۇراعاندا قاتۋلانىپ، قاسقايىپ، اتويلاپ قارسى شىعىپتى دا، ءبىر سۇيەم جەرىن بەرمەپتى. اتا-بابامىز بىزگە امانات ەتكەن اتاقونىسىمىز ۇستاعاننىڭ قولىندا، تىستەگەننىڭ اۋزىندا كەتپەۋى كەرەك. پرەزيدەنت ق.توقاەۆ ايتقانداي: «قازاقتىڭ جەرى شەتەلدىكتەرگە ساتىلمايدى، جالعا دا بەرىلمەيدى». بۇل-ءوزىن وسى جەردىڭ پەرزەنتىمىن، وسى ەلدىڭ پاتريوتىمىن دەپ ەسەپتەيتىن ءاربىر ازاماتتىڭ قۇلاعىنا دا، كوڭىلىنە دە مايداي جاعاتىن ءسوز. كۇنى ەرتەڭ زاڭ جۇزىندە بەكيتىن جەر-اناعا دەگەن قۇرمەتىمىز - تاۋەلسىزدىگىمىزدىڭ ناتيجەسىندە جۇزەگە اساتىن باستى قۇندىلىعىمىزدىڭ ءبىرى جانە بىرەگەيى.
كەزىندە الاش كوسەمى احمەت بايتۇرسىنۇلى «ءتىلى جوعالعان ەلدىڭ ءوزى دە جوعالادى» دەپ كەلەشەككە الاڭداعان بولاتىن. بۇگىنگى تاڭدا قازاق ءتىلى الەمنىڭ ەشبىر تىلىنەن كەم ەمەس. سوزدىك قورىنىڭ مولدىعىن عالىمدارىمىز سالىستىرمالى تۇردە دالەلدەپ كەلەدى. ءبىزدىڭ مىندەت-ونىڭ اياسىن كەڭەيتە وتىرىپ، مەمەلەكەتتىك ءتىلىمىزدى جەتىلدىرۋ. بۇل ءۇشىن باسقا تىلدە سويلەگەندى ارتىقشىلىق كورەتىن قانداستارىمىزدىڭ نامىسىن وياتىپ، تۋعان ءتىلدىڭ جىرتىسىن جىرتۋعا جۇمىلدىرۋىمىز كەرەك. تۋعاندا ءسابيدى انا تىلىمەن اۋىزداندىرىپ، ءوسىپ- ونەتىن ورتاسىن قازاقيلاندىرۋ ارقىلى ەڭبەكتەگەن سابيدەن ەڭكەيگەن قارتقا دەيىن انا تىلىمىزبەن جان دۇنيەسىن اقتارۋعا جول اشىلادى. مەملەكەتتىك ءتىلدى ءبىلۋ قاراپايىم قازاقتىڭ عانا ەمەس، شەندى-شەكپەندىلەردىڭ، مەملەكەتتىك قىزمەتكەرلەردىڭ پارىزى.
بي-باعلاندارىمىزدان قالعان اتالى سوزدەردىڭ ءبارى دە ءبىزدىڭ سانامىزدا ۇمىتىلماستاي جاتتالىپ كەلەدى.
-بەتەگە كەتسە-بەل قالادى،
بەكتەر كەتسە-ەل قالادى،
بەرەكەڭ كەتسە- نەڭ قالادى؟- دەيدى سونداي قاناتتى سوزدەردىڭ ءبىرى. حالىق ۇعىمىندا ىرىس-داۋلەت ىنتىماعى بار جەرگە بارادى. سوندىقتان دا ەلىمىزدەگى بۇكىل ۇلىستاردىڭ بەرەكە-بىرلىگى قازاق مەملەكەتىنىڭ تابىسىن تاسقىنداتادى. كوپشىلىكتىڭ پىكىرىنشە ءبىر تىلدە سويلەمەگەن قوعامدا بىرلىك بولمايدى. قازاقستاننىڭ تۇراقتىلىعىن ساقتاۋ ءۇشىن ەلىمىزدەگى بۇكىل ۇلتتار مەن ۇلىستار ءوزارا مەملەكەتتىك تىلدە ءتۇسىنىسۋى قاجەت. اتا-بابامىزدىڭ امانات ەتىپ قالدىرعان باستى قۇندىلىقتارىن، عاسىرلار بويى اڭساعان ارمان-مۇراتىنا اينالعان تاۋەلسىزدىگىن قورعاۋ - وسكەلەڭ ۇرپاقتىڭ ەنشىسىندە. اماناتقا ادال بولايىق!
ەرسايىن تۇرسىن،
ن.وستروۆسكي اتىنداعى
مەكتەپ-ليتسەيدىڭ 10-سىنىپ وقۋشىسى
