«جەتىسۋ – وقىرماندار مەكەنى» جوباسىنىڭ رەسمي تۇساۋكەسەرى ءىلياس جانسۇگىروۆ اتىنداعى جەتىسۋ ۋنيۆەرسيتەتىنىڭ باس عيماراتىندا ءوتتى.
«رۋحاني جاڭعىرۋ» جوبالىق كەڭسەسى ديرەكتورى دانا ديۋسەنوۆا مەن جوبا جەتەكشىسى، وبلىستىق «رۋحاني جاڭعىرۋ» جوبالىق كەڭسەسى ديرەكتورىنىڭ ورىنباسارى ەرجان دارمىشەۆ بۇل جوبانى ىسكە اسىرۋ بارىسىنا، ماقساتتارى مەن مىندەتتەر تۋراسىندا ەگجەي-تەگجەيلى ايتىپ بەردى.
قازىرگى زاماناۋي قوعامدا اقپاراتتىق جانە تسيفرلىق تەحنولوگيالاردىڭ قارقىندى دامۋى جاعدايىندا ءداستۇرلى رۋحاني قۇندىلىقتاردىڭ جاندانۋى ەرەكشە مانگە جانە وزەكتىلىككە يە بولۋدا. سوندىقتان، قازاقستاندا اسىرەسە، جاس ۇرپاقتىڭ اراسىندا وقىرمان قوعامىن قالىپتاستىرۋعا باسىمدىق بەرىلۋدە، - دەيدى سپيكەرلەر.
ەلباسى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» باعدارلامالىق ماقالاسى اياسىندا كوپتەگەن جۇمىستار قولعا جۇزەگە اسۋدا.
بيىلعى تاۋەلسىزدىگىنىڭ 30 جىلدىعىن مەرەكەلەۋ قارساڭىندا الماتى وبلىسىنىڭ ىشكى ساياسات باسقارماسىمەن جانە «رۋحاني جاڭعىرۋ» جوبالىق كەڭسەسىمەن «VIP ZHETYSU» زياتكەرلىك كلۋبى، «ZHETYSU QUEST» جانە «IQ DODA» زياتكەرلىك ويىندارى، «زەردە» تەلەۆيزيالىق توك شوۋى سياقتى زياتكەرلىكتى دامىتۋعا باعىتتالعان بىرقاتار جوبالار ازىرلەندى.
بيىلعى جىلدىڭ باستى وقيعالارىنىڭ ءبىرى — وقىرمان ۇلتتىڭ ءيميدجىن قالىپتاستىرۋعا، سونداي-اق تاريحي-مادەني قۇندىلىقتاردى ناسيحاتتاۋعا باعىتتالعان «جەتىسۋ — وقىرماندار مەكەنى» ۆەندينگ اپپاراتتارىن ەنگىزۋ جوباسىنىڭ ازىرلەنۋى. جوبا — تسيفرلىق تەحنولوگيالار مەن ادەبي-رۋحاني مۇرالاردىڭ سينتەزى بولىپ تابىلادى.
جوبانىڭ ءمانى — ساندىق تەحنولوگيالاردى قولدانا وتىرىپ، كەز-كەلگەن ادامعا تاڭدالعان كىتاپتى ويىن ارقىلى جەڭىپ الۋعا مۇمكىندىك بەرەتىن كىتاپ وقۋدى تانىمال ەتۋ. سونىمەن قاتار بۇل كىتاپ ەلەكتروندى ەمەس، ءداستۇرلى قاعازعا باسىلعان كىتاپ. اۆتومات سەنسورلىق ەكرانمەن جابدىقتالعان جانە قاتىسۋشىلارعا تاۋەلسىز قازاقستاننىڭ تاريحىنا، مادەنيەتىنە، گەوگرافياسىنا بايلانىستى تانىمدىق سيپاتتاعى سۇراقتار قوياتىن بىرەگەي باعدارلامالىق جاساقتاما ورناتىلعان.
ۇسىنىلعان سۇراقتارعا دۇرىس جاۋاپ بەرگەن كەزدە ۆەندينگ-اپپارات اۆتوماتتى تۇردە الدىن-الا تاڭدالعان كىتاپتى شىعارادى. ويىندى باستاماس بۇرىن، قۇرىلعىدا بار ادەبيەتتەر ءتىزىمىن بىلۋگە مۇمكىندىكتەر جاسالعان.
ايتا كەتەرلىگى، جوبا «IT QUIZ» جانە «سكولكوۆو» تەحنوپاركىنىڭ دامۋىنا قاتىسىپ، ۇلەس قوسقان رەسەي مەن ۋكراينا ەلدەرىنىڭ IT ماماندارىنىڭ كومەگىمەن جاسالدى.
وسىلايشا، جوبانى ازىرلەۋشىلەر تسيفرلاندىرۋدى ەسكەرە وتىرىپ، زاماناۋي تسيفرلىق تەحنولوگيالاردى پايدالانۋ ەسەبىنەن وقىرماندار سانىن ارتتىرۋ مىندەتىن باسشىلىققا الادى.
