تاۋەلسىزدىك بەلەستەرى

3748
Adyrna.kz Telegram

تاۋەلسىزدىك - بارشا قازاق حالقىنىڭ باعا جەتپەس بايلىعى، اسىل قازىناسى. اتا-بابالارىمىز ارمانداپ وتكەن تاۋەلسىزدىككە بيىل 30 جىل تولعالى وتىر. اتاۋلى مەرەكە - بارشا قازاقستاندىقتاردىڭ ورتاق قۋانىشى. ەڭسەلى ەلىمىزدەگى تاۋەلسىزدىك مەرەيتويىنا وراي رەسپۋبليكا كولەمىندە ءتۇرلى مادەني ءىس-شارالار جىل باسىنان بەرى ۇيىمداستىرىلۋدا.

سونداي يگى شارالاردىڭ ءبىرى وتكەن اپتادا اۋداندىق مادەنيەت ۇيىندە ءوتتى. «تاۋەلسىزدىك بەلەستەرى» تاقىرىبىندا ۇيىمداستىرىلعان شارادا اۋدانعا تانىمال ءداستۇرلى ءانشى، "ساز" مەكتەبىنىڭ ديرەكتورى داۋىتباەۆا باقىت مەيرامبەكقىزى قوناق بولىپ، سىر-سۇحبات بارىسىندا تاۋەلسىزدىك جايلى اڭگىمە ءوربىتتى. اتالمىش سۇحباتتى جۇرگىزگەن اۋداندىق تاريحي-ولكەتانۋ مۋزەيىنىڭ ولكەتانۋشىسى، اۋداننىڭ قۇرمەتتى ازاماتى زاۋرەش دەمەۋقۇلوۆا. ول كىسى سىر-سۇحباتتى باستاماس بۇرىن مەملەكەتىمىزدىڭ تاۋەلسىزدىك العان جىلداردان بەرى جەتكەن تولاعاي جەتىستىكتەرىنە ەرەكشە توقتالىپ، وسى جىلدار ىشىندە ەلىمىزدە ۇلتتىق سالت-ءداستۇرىمىزدىڭ، مادەنيەتىمىزدىڭ جاڭعىرىپ، قايتا قالىپتاسقانىن تىلگە تيەك ەتتى.

شارا قوناعى باقىت مەيرامبەكقىزى تاۋەلسىزدىكتىڭ 30 جىلىندا ونەر سالاسىنىڭ قارقىندى دامىعانىن، سونىمەن قوسا ءداستۇرلى ءان-كۇي ونەرىنە اۋدان جاستارىنىڭ كوزقاراسىنىڭ ارتقانىن، بۇگىنگى كۇنگە دەيىن باقاناس ساز مەكتەبىنەن سانداعان تۇلەكتىڭ قانات قاققانىن دا ايتىپ ءوتتى. سونداي-اق، تۋعان جەر مەن تۋعان ەلگە ارنالىپ جازىلعان اندەردىڭ تاۋەلسىزدىكتىڭ جەمىسى جانە تارتۋى ەكەندىگىن دە ايتتى. باقىت داۋىتباەۆا دومبىراسىن قولىنا الىپ، بىرنەشە ءداستۇرلى اندەردى دە اۋەلەتە ورىندادى. ايتا كەتەتىن جايت، سىر-سۇحبات بارىسىندا كارانتين تالاپتارى تولىعىمەن ساقتالىپ، سۇحبات ونلاين رەجيمدە حالىقپەن تىكەلەي ەفيردە ءوتتى.

باقتىعالي داۋىتباەۆ

بالقاش اۋدانى

پىكىرلەر