تورعايدىڭ قالاي ۇشقانىنا، قىرعيدىڭ قالاي قونعانىنا دەيىن قاداعالاپ وتىراتىن قىراعى كوزدەرى كوپ كەڭەستىك ءداۋىردىڭ وزىندە دە ۇلتتىق داستۇرلەر ءىزىم-قايىم جوعالىپ كەتكەن جوق-تى. ماسەلەن، قىپ-قىزىل كومسومولدىڭ باستى باسىلىمى – «لەنينشىل جاس» جىل سايىن «كوكتەم ءنومىرى» دەگەن جەلەۋمەن ناۋرىزدى كادىمگىدەي اتاپ وتەتىن.
ناۋرىز دەپ رەسمي تۇردە ايتىلا قويمايدى، ارينە. ونىڭ ەسەسىنە، رەداكتسيامىزدىڭ قۇت-بەرەكەسى – ءبيبىحان اپاي ۇيىنەن الا كەلگەن ناۋرىز كوجەنى بارىمىزگە مولىنان جەتكىزەدى. سول كۇنى گازەت جاسىل تۇسكە ەنەدى. كوكتەمنىڭ تىنىسىنان، تابيعاتتىڭ تۇلەۋىنەن سىر ساباقتايتىن ماڭىزدى ماقالالار جارىق كورەدى. باسىلىم بەتىندە جاڭارۋ مەن جاسارۋدىڭ بەلگىسى بايقالادى. جەتىنشى قاباتتا جىلى جەل ەسكەندەي بولادى.
ون التى جىل باس رەداكتورلىق قىزمەت اتقارعان سەيداحمەت بەردىقۇلوۆ بۇل ءداستۇردى بۇلجىتپاي ساقتادى. الايدا، بەيرەسمي سالتتىڭ توركىنى ارىرەكتە جاتقان سياقتى. ءسىرا، شەراعاڭداردىڭ داۋىرىنەن تامىر تارتادى-اۋ دەيمىن.
مىناۋ – كەڭەستىك كەزەڭدەگى گازەتتىڭ سوڭعى «كوكتەم ءنومىرى». سول كۇنى شىعا باستاعانىنا 70 جىل تولعان «لەنينشىل جاس»... 1991 جىلعى 22 ناۋرىز... باسىلىمدا قىزمەت ىستەيتىن بارلىق جۋرناليستەر ءسوز العان-دى. ءبارىنىڭ دە سۋرەتى جاريالاندى... سودان بەرى 30 جىل ءوتتى...
ال بۇگىن العاشقى نومىرىنە نەبارى 19 جاستاعى عاني مۇراتباەۆ قول قويعان «جاس الاش» گازەتىنىڭ جارىققا شىققانىنا 100 جىل تولدى! ءبارىمىزدى تۇلەتىپ ۇشىرعان بەرەكەلى باسىلىمنىڭ عاسىرلىق مەرەيتويى قۇتتى بولسىن!
باۋىرجان ومارۇلى
