بۇگىن، 14 شىلدەدە استاناداعى مامانداندىرىلعان اۋدانارالىق تەرگەۋ سوتىندا پەريزات قايرات پەن ونىڭ اناسى عايني الاشباەۆانىڭ ءىسى بويىنشا باستى سوت تالقىلاۋى باستالدى، دەپ حابارلايدى «ادىرنا» ءتىلشىسى.
قىلمىستىق ءىستى قاراپ جاتقان سۋديا سابىرجان كارىموۆ باق وكىلدەرىن سوت زالىنان شىعارۋ تۋرالى شەشىم قابىلدادى. ول كەز كەلگەن ۋاقىتتا قۇپيا اقپارات جاريالانۋى مۇمكىن ەكەنىن اتاپ ءوتتى.
«بۇگىنگى كۇنگە دەيىن باق-تىڭ 70-تەن استام وكىلى پروتسەسسكە قاتىسۋعا ءوتىنىش بەردى. الايدا سوت سوتتالۋشىلاردىڭ ءوتىنىشى بويىنشا ولاردان جاۋاپ الۋ كەزىندە، سونىڭ ىشىندە تۇسىنىكتەمەلەر بەرۋ بارىسىندا جانە دالەلدەمەلەردى زەرتتەۋ كەزىندە جاريالىلىقتى شەكتەۋ تۋرالى شەشىم قابىلدادى. سەبەبى بۇل مالىمەتتەر قۇپيا اقپاراتتى جاريالاۋعا اكەپ سوعۋى مۇمكىن»،—دەدى ول.
ايتا كەتەيىك، ءدال قازىر باق وكىلدەرى سوتتا ۇيىمداستىرىلعان ءباسپاسوز ورتالىعىندا وتىرىستى ZOOM ارقىلى تىكەلەي ەفيردەن قاراپ وتىر.
