قازاق تەلەۆيزياسىنىڭ ارداگەرى، تانىمال جۋرناليست نۇرتىلەۋ يمانعاليۇلى ومىردەن ءوتتى، دەپ حابارلايدى "ادىرنا" ۇلتتىق پورتالى.
قارالى حاباردى Qazaqstan ۇلتتىق تەلەارناسىنىڭ ءباسپاسوز قىزمەتى تاراتتى.
اتالعان حابارلامادا: «بۇگىن تاڭەرتەڭ 70 جاسقا قاراعان شاعىندا قازاق تەلەۆيزياسىندا 45 جىل قىزمەت اتقارعان جۋرناليستيكا ارداگەرى نۇرتىلەۋ يمانعاليۇلى ومىردەن ءوتتى. نۇرتىلەۋ يمانعاليۇلى «قۇرداستار»، «جاستار داۋىسى»، «اراي»، «جادىڭدا ما، جولداس»، «اينا»، «جاس جىگەر»،«بەتپە-بەت»، «قولتاڭبا»، «دىڭگەك»، «كورشىلەر»، «زاڭ سويلەسىن»، «Nur-Tiley» اۆتورلىق باعدارلامالارى ارقىلى قالىڭ كورەرمەن ەسىندە قالدى» دەلىنگەن.
نۇرتىلەۋ يمانعاليۇلى 1952 جىلى الماتى وبلىسى اقسۋ اۋدانى دىڭگەك اۋىلىندا دۇنيەگە كەلگەن. ۇيدەگى 14 بالانىڭ كەنجەسى.
"قازاقستان رترك"اق باسقارما توراعاسىنىڭ كەڭەسشىسى، قازاقستان جۋرناليستەر وداعى سىيلىعىنىڭ ەكى مارتە لاۋرەاتى، «التىن جۇلدىز» سىيلىعىنىڭ يەگەرى، قر مادەنيەتىنە ەڭبەگى سىڭگەن قايراتكەر، قازاق ۇلتتىق ونەر اكادەمياسىنىڭ كۇرمەتتى پروفەسسورى، اقسۋ اۋدانىنىڭ «قۇرمەتتى ازاماتى».
