مەملەكەت قايراتكەرى التىنبەك سارسەنبايۇلىنىڭ دوسى، جازۋشى جۇسىپبەك قورعاسبەك ونىڭ ولىمىنە، جاۋلارىنا، ۇستانىمدارىنا قاتىستى تىڭ دەرەكتەرمەن ءبولىستى. بۇل تۋرالى«قاسقا جول» يۋتۋب ارناسىنا بەرگەن سۇحباتىندا ايتتى، دەپ حابارلايدى “ادىرنا” ۇلتتىق پورتالى.
ايتۋىنشا، التىنبەك سارسەنبايۇلىنىڭ ماسسونداردىڭ قولىنان قازا تاپتى دەگەن اقپارات شىندىققا جاناسپايدى.
"التىنبەكتىڭ ولىمىنە قاتىستى ءبىزدىڭ قولىمىزدا زاڭ ورىندارىنىڭ تەرگەۋ تەكسەرۋىنەن باسقا ەشتەڭە جوق. بىراق ول تىكەلەي جۇيەنىڭ قۇربانى دەگەنگە كەلىسكىم كەلمەيدى. بىراق سول جۇيەنىڭ ىشىندەگى جەكەلەگەن ادامدارمەن اشىق جاۋ بولعانىن بىلەمىن. سولاردىڭ قولىنان بولعان قازا شىعار دەپ ويلايمىن. ال بەيبىت ءساپارالى بۇل حالىقارالىق كۇشتەردىڭ ماسسونداردىڭ قولىنان قازا بولدى دەگەن اڭگىمە اتقان ەكەن. ول اسىعىستاۋ ايتىلىپ كەتەن پىكىر دەپ ويلايمىن. قازىر ءبىزدىڭ قولىمىزدا مىنا ادام دەپ ۇستاپ بەرۋگە ەشقانداي دالەل جوق.»،- دەدى جۇسىپبەك قورعاسبەك.
سونداي-اق جۋرناليست وپپوزيتسيا اراسىنداعى جايتتاردى دا قوزعادى.
«ءبىر كۇنى وپپوزيتسياعا ىقپالى بار ادامداردىڭ ءبارى جينالدى. ونىڭ ىشىندە بانك باسشىلارى بار، قارجىلىق توپتاردىڭ دا ادامدارى بار. ءبارى جينالىپ، سونداعى اينالدىرعانى «جاس الاش» گازەتى جانە مەنى قىزمەتتەن كەتىرۋ تۋرالى ماسەلە قويعان. سونداي بىلاي دەگەن: مىنا جۇسىپبەك قورعاسبەك قايتا-قايتا مۇحتار شاحانوۆتى شىعارا بەرەدى دەگەن. وپپوزيتسيانىڭ جىگىتتەرىنىڭ ايتىپ وتىرعانى. ال شاحنوۆتى نەگە ايتىپ وتىر؟ شاحانوۆ تىم قازاققى، قازاقشىل، وزدەرىنىڭ دەڭگەيىنەن تومەن ساناپ وتىر عوي. سونى «جاس الاش» ۇنەمى باسادى، ءبىز ايتساق كونبەيدى. ەندى ءوزىن جۇمىستان الۋ كەرەك دەگەن ماسەلە قويعان عوي. سوندا التىنبەك قارسى شىعىپتى. ول مەنىڭ ويلاعانىمداي گازەت شىعارىپ وتىر، جۇمىسىنا رازىمىن جانە وعان انانى بەر، مىنانى بەرمە دەپ ايتا المايمىن دەگەن. سوندا نۇرجان سۇبحانبەردين: التىنبەك بىزدەن گورى وسى سالانىڭ ادامى، سوندىقتان ءوز قالاۋى شىعار، سەندەردىڭ نە شارۋالارىڭ بار، دەپ قورعاپ قالعان.
ارادا ءبىر-ەكى جىل وتكەندە وپپوزيتسيانىڭ جىگىتتەرى، سەركەلەرى حابارلاستى.ءسىز انا شاحانوۆقا ايتىڭىزشى، ءبىز الاڭدا تاۋەلسىزدىك مونۋمەنتىنە گۇل شوقتارىن قويايق دەپ ەدىك. ءبىزدى باستاپ بارسىن دەيدى. سەندەر ونى جاقتىرماۋشى ەدىڭدەر عوي، ەندى مەن نەگە ايتۋىم كەرەك دەسەم، سەن تۇسىنەسىڭ عوي، ءبىز بارساق حالىق جينالمايدى. شاحانوۆ بارسا حالىق جينالادى دەگەندى ايتتى", - دەدى جۇسىپبەك قورعاسبەك.
