بەلگىلى قالامگەر، «اڭىز ادام» جانە «جۇلدىزدار وتباسى» جۋرنالدارىنىڭ نەگىزىن قالاۋشى ءارى باس رەداكتورى جارىلقاپ قالىباي اۋىر دەرتكە شالدىقتى. قوعام قايراتكەرى، جۋرناليست رىسبەك سارسەنباي Facebook جەلىسىندە قالامگەردىڭ جاعدايىنا قاتىستى جازبا جاريالاپ، ەل-جۇرتتى كومەكتەسۋگە ۇندەدى، دەپ حابارلايدى “ادىرنا».
جارىلقاپ قالىباي – ءبىر كەزدەرى تارالىمى ءجۇز مىڭنان اسقان، قوعامدا كەڭ رەزونانس تۋدىرعان تانىمال جۋرنالداردىڭ اۆتورى. ول ساياسي تاۋەلسىز وي مەن ەركىن ءباسپاسوزدى دامىتۋ جولىندا كۇرەسىپ، بيلىكتىڭ قىسىمىنا دا ءجيى ۇشىرادى.
رىسبەك سارسەنبايدىڭ ايتۋىنشا، قيىندىقتار 2014 جىلى باستالعان. «اڭىز ادام» جۋرنالىنىڭ سول جىلعى سانىندا رەسەي پرەزيدەنتى ۆلاديمير پۋتين مەن ادولف گيتلەردى سالىستىرۋعا بايلانىستى داۋ تۋىنداپ، باسىلىمعا قۋدالاۋ باستالعان.
«پالە 2014 جىلى ءپۋتيندى گيتلەرمەن سالىستىرىپ شىعارعان جۋرنال سانىنان باستالدى. ۇزاققا سوزىلعان سوتتاسۋلار، ودان كەيىن جۋرنالدى تاراتپاۋ ماقساتىنداعى ەكونوميكالىق قىسىمدار ونى قارجىلاي شىعىنعا باتىردى. سوعان قاراماستان، جۋرنالدار بەس جىل بويى شىعىپ تۇردى. اقىرى جابىلدى، تابىس كوزى ءۇزىلدى. بىراق ول قالامىن قولىنان تاستاعان جوق، الەۋمەتتىك جەلى ارقىلى حالىقتى ساياسي-اعارتۋ جۇمىستارىمەن شۇعىلداندى. نۇربيلىكتىڭ ادىلەتسىزدىكتەرىنە قارسى تۇردى. ادىلدىك پەن شىندىق ءۇشىن كۇرەستى»، – دەلىنگەن رىسبەك سارسەنبايدىڭ جازباسىندا.
وسى كەزەڭدە قالىباي اۋىر كۇيزەلىسكە ءتۇسىپ، كەيىن 2019 جىلى كوروناۆيرۋسپەن دە كۇرەسكەن. الايدا ەڭ اۋىر دياگنوز 2023 جىلى بەلگىلى بولدى. جارىلقاپ قالىبايعا گەپاتوتسەلليۋليارلى كارتسينوما – ياعني، باۋىر وبىرى دياگنوزى قويىلدى.
«وكىنىشكە قاراي، ونكولوگيالىق اۋرۋعا – باۋىر وبىرى (گتسك – گەپاتوتسەلليۋليارلى كارتسينوما) دەرتىنە ۇشىراعانىن بىلمەي قالدى. ءبىر جىلدان استام ۋاقىت ءارتۇرلى ەم الىپ كوردى. ەكى ميني-وپەراتسيا جاساتتى. ناتيجە بولىمسىز. قازاقستان، تۇركيا، ينديادا ەمدەلىپ كوردى. ەسەسىنە، دارىگەرلىك شەشىم انىقتالدى. جارىلقاپ قانشا قاشسا دا قۇتىلمادى. باۋىر ترانسپلانتاتسياسىن جاساتپاسا بولمايدى»، – دەپ جازادى ر.سارسەنباي.
كۇردەلى وپەراتسيانى وڭتۇستىك كورەيا دارىگەرلەرى جاساماق. بىراق ەمدەۋ جانە وڭالتۋ شىعىندارىنا 250 مىڭ اقش دوللارى كولەمىندە قاراجات قاجەت. بۇل – جارىلقاپ قالىبايدىڭ وتباسى ءۇشىن تىم اۋىر سوما. وسىعان دەيىنگى ەم-دومعا بار جيعان-تەرگەنى جۇمسالعان.
«ول حالىقتان قارجىلاي كومەك سۇراۋدى ۇيات ساناپ، ۇزاق ۋاقىت قارسى بوپ جۇرگەن. بىراق ولاي ەتپەسەك، قاۋىپتى اۋرۋدان امان قالۋ وڭايعا سوقپايىن دەپ تۇر»، – دەيدى ارىپتەسى.
سول سەبەپتى ارىپتەستەرى مەن تۋىستارى جۇرتتان قولداۋ سۇراپ، ارنايى بانك شوتتارىن جاريا ەتتى.
Kaspi Bank (تەڭگەمەن):
كارتا ءنومىرى: 4400 4302 2576 2233
الۋشى: قالىباي جارىلقاپ سەيدلاۇلى
Kaspi تەلەفونى: +7 701 441 02 44
BIC: CASPKZKA
اقش دوللارىمەن:
IBAN: KZ40722C000024985182
الۋشى: قالىباي جارىلقاپ سەيدلاۇلى
