الماتى جاستارىنىڭ باسپانا ماسەلەسى قالاي شەشىلۋدە؟

529

ستاتيستيكالىق مالىمەتتەرگە سۇيەنسەك، الماتى قالاسى ەسكى ۇيلەردىڭ سانى جاعىنان ءبىرىنشى ورىندا. قازىر اپاتتى جاعدايداعى  81 ءۇيدى بۇزۋعا شەشىم قابىلدانعان. 25 533  ازامات باسپانا كەزەگىندە تۇر. قالا اكىمى باقىتجان ساعىنتاەۆتىڭ سوزىنشە،  بيىل 3800 وتباسى باسپانامەن قامتاماسىز ەتىلەدى. ونىڭ 1300-دەن استام پاتەرى «باقىتتى وتباسى» باعدارلاماسىمەن بەرىلسە، 1000-عا جۋىعى جالدامالى پاتەر بولادى. سونداي-اق 35 جاسقا دەيىنگى جاستارعا جەڭىلدەتىلگەن باعدارلاما ازىرلەنىپ وتىر.

قالا اكىمدىگى جاستاردى باسپانامەن قامتۋعا ارنايى باعدارلاما قابىلداپ، ونى «الماتى جاستارى 3.0» دەپ اتادى.

«الماتى جاستارى 3.0» تۇرعىن ءۇي باعدارلاماسىنىڭ باستى ەرەكشەلىگى – پايىزدىق مولشەرى تومەن. بۇعان بيۋدجەتتىك مەكەمەلەردە قىزمەت ىستەيتىن بارلىق مامان قاتىسا الادى. ولارعا قۇنى  13 ملن تەڭگەگە دەيىنگى ساتىپ الۋعا يپوتەكالىق نەسيە 5 پايىزبەن بەرىلەدى. ساتىپ الاتىن ءۇيدىڭ باستاپقى جارناسى – 10 پايىز. بەرىلەتىن نەسيەنى اركىم ءوز تولەم قابىلەتىنە قاراي 3 جىلدان 25 جىلعا دەيىن راسىمدەي الادى.

ايتا كەتەرلىگى، بيۋدجەتتىك سالا قىزمەتكەرلەرىنە – مۇعالىمدەر، دارىگەرلەر، ۋنيۆەرسيتەت وقىتۋشىلارى، مادەنيەت جانە سپورت سالاسىنىڭ وكىلدەرى ، جۋرناليستەر مەن عالىمدار، اكىمشىلىككە قاراستى مەكەمەلەردىڭ قىزمەتكەرلەرى جاتادى.

«الماتى جاستارى 3.0» باعدارلاماعا قاتىسۋشى جاستارعا قويىلىاتىن تالاپتار:

  1. قازاقستان رەسپۋبليكاسىنىڭ ازاماتى بولۋ كەرەك;
  2. قاتىسۋشىنىڭ جاسى ءوتىنىش بەرۋ كەزىندە 35 جاسقا دەيىن بولۋ كەرەك. نەگىزگى قاتىسۋشى رەتىندە ەرلى-زايىپتىلاردىڭ ءبىرى عانا قاتىسا الادى;
  3. قاتىسۋشىنىڭ  رەسمي جۇمىس ءوتىلى بويىنشا الماتى قالاسىنداعى مەكەمەلەردەن  كەم دەگەندە سوڭعى 6 اي  مىندەتتى زەينەتاقى مولشەرلەمەسى بولۋ قاجەت.
  4. ۇمىتكەردە جانە ونىڭ وتباسى مۇشەلەرىندە مەنشىك قۇقىعىندا تۇرعىن ءۇيدىڭ، سونداي-اق قازاقستان رەسپۋبليكاسىنىڭ اۋماعىندا سوڭعى 5 جىل ىشىندە تۇرعىن ءۇي جاعدايىنىڭ ادەيى ناشارلاۋى فاكتىلەرىنىڭ بولماۋى، قازاقستان رەسپۋبليكاسىنىڭ اۋماعىندا مەملەكەتتىك باعدارلامالار جەلىسى بويىنشا الىنعان وتباسىنىڭ باسقا مۇشەلەرىنىڭ ورتاق بىرلەسكەن (ۇلەستىك) مەنشىگىن قۇرايتىن ۇلەستىك مەنشىكتەگى ۇلەس نەمەسە جالعا بەرىلەتىن تۇرعىن ءۇيى بولماۋى كەرەك. جەكەشەلەندىرۋ نەمەسە مۇراگەرلىك قۇقىعى ناتيجەسىندە باعدارلاماعا قاتىسۋشى نەمەسە كامەلەتكە تولعانعا دەيىن وتباسى مۇشەلەرى العان جىلجىمايتىن مۇلىكتەگى ۇلەسى 4-ءشى (وسى تالاپقاقا – اۆت.) تالاپقا قوسىلمايدى;
  5. قاتىسۋشىنىڭ الماتى قالاسىنداعى جۇمىس ءوتىلى كەم دەگەندە 6 اي بولۋ كەرەك. ول زەينەتاقى اۋدارىمىمەن راستالادى.

باعدارلاماعا قاتىسۋعا تومەندەگىدەي قۇجاتتار قابىلدانادى. اۋەلى ءوتىنىش جازىلادى:

 

_____________________________________

ازامات (شا) (تەگى، اتى-ءجونى)

_____________________________________

تۇرعىلىقتى مەكەن-جايى

ءوتىنىش

 

"الماتى جاستارى 3.0" قالالىق جەڭىلدەتىلگەن نەسيە بەرۋ باعدارلاماسى ارقىلى، تۇرعىن ءۇي قارىزىن (زاەمىن) قامتاماسىز ەتۋدى سۇرايمىن.

اقپاراتتىق جۇيەلەردە قامتىلعان زاڭمەن قورعالاتىن قۇپيانى قۇرايتىن مالىمەتتەردى پايدالانۋعا كەلىسەمىن.

________________

تولتىرعان كۇنى

___________

قولى

 

 

 

 

1) ۇلگى بويىنشا ءوتىنىش;

2) ءبىلىمءى تۋرالى سكانەرلەنگەن قۇجات;

3) 2008 جىلعا دەيىن الىنعان نەكە قيۋ تۋرالى سكانەرلەنگەن كۋالىك (بار بولسا);

4) 2008 جىلعا دەيىن الىنعان بالالاردىڭ تۋ تۋرالى سكانەرلەنگەن كۋالىگى (بار بولسا);

5) ءوتىنىش بەرۋشىگە جانە قازاقستان رەسپۋبليكاسى بويىنشا بارلىق وتباسى مۇشەلەرىنە جىلجىمايتىن مۇلىكتىڭ جوق (بار) ەكەندىگى تۋرالى انىقتاما;

6) بەلگىلەنگەن ۇلگىدەگى فيرمالىق بلانكىدە جۇمىس ءوتىلى كورسەتىلگەن, ءوتىنىش پەن قۇجاتتاردى تاپسىرعان كۇنگە 10 جۇمىس كۇننەن ارتىق ەمەس مەرزىمدە بەرىلگەن سكانەرلەنگەن جۇمىس ورنىنان انىقتاما;

7) قازاقستان رەسپۋبليكاسى ەڭبەك كودەكسىنىڭ 35-بابىنا سايكەس ەڭبەك ءوتىلىن راستايتىن سكانەرلەنگەن قۇجاتتار;

8) الماتى قالاسى مادەنيەت باسقارماسىنان سكانەرلەنگەن راستايتىن انىقتامالار (قۇجاتتار) (اتالعان تالاپ, مادەنيەت سالاسىنداعى ءوزىن-ءوزى جۇمىسپەن قامتىعان قاتىسۋشىلارعا عانا قاتىستى).

 

وسى اتالعان قۇجاتتار باللدىق جۇيە بويىنشا ەسەپتەلەدى. قازىرگى كەزدە 875 جاس باعدارلاماعا ءوتىنىش بەرگەن.

«الماتى جاستارى 3.0» تۇرعىن ءۇي باعدارلاماسىنان بولەك، 29 جاسقا دەيىنگى جاستارعا جالدامالى پاتەرلەر بەرىلەدى. بۇل پاتەر 5 جىل مەرزىمگە جالعا الىنادى.

 

گۇلۆيرا اسقار،

"ادىرنا" ۇلتتىق پورتالى

 

 

پىكىرلەر