الماتىدا جالپى قۇنى 142 ملرد تەڭگە بولاتىن 11 ينۆەستيتسيالىق جوبا قارالدى

30
Adyrna.kz Telegram
https://adyrna.kz/storage/uploads/YDC0vkP9pgZDBBwGVwc3nfS06z6kUSmHAXxHcdD7.jpg

الماتى قالاسىنىڭ اكىمى دارحان ساتىبالدىنىڭ توراعالىعىمەن وڭىرلىك ينۆەستيتسيالىق شتابتىڭ XVII وتىرىسى ءوتتى.

جيىندا جالپى قۇنى 142 ملرد تەڭگە بولاتىن 11 ينۆەستيتسيالىق جوبا قارالدى. ولاردى جۇزەگە اسىرۋ ناتيجەسىندە شامامەن 950 جاڭا جۇمىس ورنىن اشۋ جوسپارلانىپ وتىر.

جوبالار ەنەرگەتيكا، ونەركاسىپ جانە تۋريزم سالالارىن قامتيدى. اتاپ ايتقاندا، تۇركسىب اۋدانىندا قۋاتى 37 مۆت جانە جىلۋ ءوندىرۋ كورسەتكىشى 43 گكال بولاتىن جىلۋ ەلەكتر ستانتسياسىن سالۋ كوزدەلگەن. جاڭا ستانتسيا اۋدانداعى تۇرعىن ۇيلەر مەن الەۋمەتتىك نىسانداردى جىلۋ جانە ەلەكتر قۋاتىمەن تۇراقتى قامتاماسىز ەتۋگە مۇمكىندىك بەرەدى.

ءوندىرىس سالاسىندا ءۇش جوبا ۇسىنىلدى. ونىڭ ءبىرى جەتىسۋ اۋدانىندا سۋسىن وندىرەتىن زاۋىت سالۋ. قالعان ەكەۋى الماتىنىڭ يندۋستريالىق ايماعىندا جۇزەگە اسىرىلادى. ولار سۋدى تولىق تسيكلمەن تازارتۋ جۇيەلەرىن وندىرەتىن كاسىپورىن جانە تالشىقتى-وپتيكالىق كابەل شىعاراتىن زاۋىت.

سونىمەن قاتار كۇن تارتىبىنە قوناق ءۇي ينفراقۇرىلىمىن دامىتۋعا باعىتتالعان جەتى جوبا ەنگىزىلدى. ولاردىڭ قاتارىندا حالىقارالىق برەندتەرمەن جۇمىس ىستەيتىن قوناق ۇيلەر دە بار.

جيىن سوڭىندا دارحان ساتىبالدى ءتيىستى باسقارمالار مەن اۋدان اكىمدەرىنە جوبالاردى جۇزەگە اسىرۋدا ينۆەستورلارعا قاجەتتى قولداۋ كورسەتۋدى تاپسىردى. سونىمەن بىرگە بارلىق باستامانىڭ زاڭناما تالاپتارىنا سايكەس كەلىسۋ راسىمدەرىنەن ءوتىپ، مەملەكەتتىك ساراپتامانىڭ وڭ قورىتىندىسىن الۋى قاجەتتىگىن ەسكەرتتى. قالا اكىمدىگى ءوز قۇزىرەتى شەڭبەرىندە ينۆەستورلارعا قولداۋ كورسەتۋگە جانە تۋىنداعان ماسەلەلەردى جەدەل شەشۋگە كومەكتەسۋگە دايىن.

 

پىكىرلەر