سۋرەتتەردى تۇسىرگەن ۆالەري بۋگاەۆ
جاڭا ون ەكى قاباتتى تۇرعىن ءۇي «دوستىق» شاعىن اۋدانىندا بوي كوتەردى. باسپانالى بولعان تۇرعىنداردىڭ قاتارىندا جەتىم بالالار، كوپبالالى جانە تولىق ەمەس وتباسىلار، مۇگەدەكتىگى بار ازاماتتار مەن ارداگەرلەر بار.
جاڭا قونىس يەلەرىن پاۆلودار وبلىسىنىڭ اكىمى اسايىن بايحانوۆ قۇتتىقتادى.
- مەملەكەت باسشىسى قاسىم-جومارت كەمەلۇلى توقاەۆ حالىقتى تۇرعىن ۇيمەن قامتاماسىز ەتۋ - مەملەكەتتىڭ باستى مىندەتتەرىنىڭ ءبىرى ەكەنىن بىرنەشە رەت اتاپ ءوتتى. بۇگىن 193 وتباسى ءۇشىن كوپتەن كۇتكەن قۋانىشتى كۇن. كەيبىر ازاماتتار ءوز باسپاناسىن 18 جىل كۇتتى. تۇسىنىستىك تانىتىپ، سابىرلىق ساقتاعاندارىڭىز ءۇشىن شىنايى العىسىمدى بىلدىرەمىن، - دەدى اسايىن بايحانوۆ.
ءوڭىر باسشىسى پاۆلودارلىقتاردى باسپانامەن قامتۋ جۇمىستارى الداعى ۋاقىتتا دا جالعاساتىنىن اتاپ ءوتتى. نەگىزگى ماقسات - مۇمكىندىگىنشە كوپ وتباسىنىڭ باسپانالى بولۋىنا مۇمكىندىك جاساۋ.
تۇرعىندار قۋانىشتارىن جاسىرماي، ءوز اسەرلەرىمەن ءبولىستى.
- ءبىزدىڭ وتباسىمىز ءۇشىن بۇل - ءوز ۇيىمىزدە تۇرىپ، بالالارىمىزعا جايلى جاعداي جاساۋعا مۇمكىندىك بەرەتىن كوپتەن كۇتكەن قۋانىش. مەملەكەتتىك قولداۋعا ەرەكشە مۇقتاج وتباسىلارعا كوڭىل ءبولىپ، قامقورلىق تانىتىپ وتىرعاندارىڭىز ءۇشىن العىس ايتامىن، - دەدى كوپبالالى اكە جانىبەك قۋانىش.
جاڭا تۇرعىن ءۇي 638 پاتەرلى: 330 پاتەر - ءبىر بولمەلى، 242 پاتەر - ەكى بولمەلى، 66 پاتەر - ءۇش بولمەلى. ون ەكى قاباتتى ءۇيدىڭ جالپى اۋدانى 59 مىڭ شارشى مەتردەن اسادى.
جاڭا تۇرعىن ءۇي «دوستىق» شاعىن اۋدانىن كەشەندى دامىتۋ جۇمىستارىنىڭ ءبىر بولىگىنە اينالدى. بۇگىنگى تاڭدا شاعىن اۋداندا مەكتەپ جۇمىس ىستەپ تۇر، الەۋمەتتىك ينفراقۇرىلىم دامىپ كەلەدى. الداعى ۋاقىتتا بالاباقشا، مۇز سارايى، كونگرەسس-حولل جانە باسقا دا نىساندار سالۋ جوسپارلانعان. سونىمەن قاتار ۇزىندىعى شامامەن 4,5 كم بولاتىن جاڭا ترامۆاي جەلىسىنىڭ قۇرىلىسى جۇرگىزىلۋدە. ونى 2027 جىلى ىسكە قوسۋ جوسپارلانىپ وتىر.
وڭىردە تۇرعىن ءۇي قۇرىلىسىنىڭ كولەمى ارتىپ كەلەدى. 2026 جىلدىڭ ءبىرىنشى جارتىجىلدىعىندا 166 مىڭ شارشى مەتردەن استام تۇرعىن ءۇي پايدالانۋعا بەرىلدى. قۇرىلىس جۇمىستارىنىڭ كولەمى 193 ملرد تەڭگەگە جەتىپ، وتكەن جىلدىڭ سايكەس كەزەڭىمەن سالىستىرعاندا 129,6% قۇرادى.
