الماتىدا عىلىمي گرانتتار بايقاۋى قورىتىندىلاندى. سونىڭ ناتيجەسىندە جالپى سوماسى 348 ملن تەڭگە بولاتىن گرانت 23 جوباعا بەرىلدى. جەڭىمپازدار قاتارىندا جەر سىلكىنىسىن ەرتە انىقتاۋ، اۋانىڭ لاستانۋىن باقىلاۋ، جول قوزعالىسى قاۋىپسىزدىگىن ارتتىرۋ، قالا ينفراقۇرىلىمىن دامىتۋ جانە جاساندى ينتەللەكتىنى ەنگىزۋگە باعىتتالعان جوبالار بار. ۇزدىك جوبا اۆتورلارىنا سەرتيفيكاتتار 11 قاراشادا الماتى قالاسى اكىمدىگى جانىنداعى عىلىم جانە تەحنولوگيالار جونىندەگى كەڭەستىڭ وتىرىسىندا تابىستالدى. بۇل تۋرالى قالالىق جاستار ساياساتى باسقارماسىنىڭ وكىلدەرى ايتتى.
عىلىمدى دامىتۋ جانە يننوۆاتسيانى ەنگىزۋ جۇمىستارى اياسىندا مۇنداي بايقاۋ العاش رەت ۇيىمداستىرىلدى. بايقاۋعا بارلىعى 229 ءوتىنىم تۇسكەن. الدىن الا ىرىكتەۋدەن كەيىن 191 جوبا كەلەسى كەزەڭگە ءوتتى. قاتىسۋشىلار بەس اپتالىق اكسەلەراتسيالىق باعدارلامادان ءوتىپ، جوباسىن جەتىلدىرىپ، ساراپشىلار كوميسسياسىنىڭ الدىندا قورعادى. سونىڭ ناتيجەسىندە 23 عىلىمي ازىرلەمە قارجىلاندىرۋعا يە بولدى.
جەڭىمپاز جوبالاردىڭ قاتارىندا سەيسميكالىق قۇبىلىستاردى ەرتە انىقتاۋ جۇيەسى، اۆتوكولىك پەن ونەركاسىپ ورىندارىنان شىعاتىن زياندى قالدىقتاردى تازارتۋ تەحنولوگياسى، اۋا، سۋ جانە توپىراق ساپاسىن تسيفرلىق باقىلاۋ شەشىمدەرى بار. سونىمەن قاتار عالىمدار سۋ ايدىندارىن تازارتۋعا ارنالعان ارنايى گلايدەرلەردى پايدالانۋدى جانە 2-جەو مەن 3-جەو كۇل-قوج قالدىقتارىن قايتا وڭدەپ، 3D باسىپ شىعارۋ ارقىلى شاعىن ساۋلەت نىساندارىن جاساۋدى ۇسىندى.
قالانى كوگالداندىرۋعا ارنالعان ەكولوگيالىق تازا، اسەرى ۇزاققا سوزىلاتىن پرەپاراتتار ازىرلەندى. ال تاعى ءبىر جوبا اللەرگەندى وسىمدىكتەردى باقىلاۋعا باعىتتالعان. ونىڭ كومەگىمەن وسىمدىكتەردىڭ توزاڭ تاراتۋ كەزەڭدەرى انىقتالىپ، تۇرعىندارعا اللەرگيا قاۋپى تۋرالى حابارلانادى.
كولىك سالاسىندا قيىلىستارداعى قوزعالىستى بەيىمدەپ باسقارۋعا ارنالعان SmartFlow جۇيەسى قولداۋ تاپتى. بۇدان بولەك، بەينەتالداۋ ارقىلى جوعالعان ادامداردى ىزدەۋگە ارنالعان FaceAlert Almaty جۇيەسى، جەدەلساتىلاردىڭ قاۋىپسىزدىگىن تسيفرلىق باقىلاۋ پلاتفورماسى جانە دەنساۋلىق ساقتاۋ سالاسىنداعى جوبالار دا جەڭىمپازدار قاتارىنان كورىندى.
جەڭىمپازداردى قالالىق ءماسليحات دەپۋتاتتارى، قر ۇلتتىق عىلىم اكادەمياسىنىڭ وكىلدەرى، عىلىمي قاۋىمداستىق پەن قوعام وكىلدەرى قاتىسقان كونكۋرستىق كوميسسيا انىقتادى. ىرىكتەۋ كەزىندە زەرتتەۋلەردىڭ جاڭاشىلدىعى، تاجىريبەلىك ماڭىزى جانە قالا شارۋاشىلىعىندا قولدانۋ مۇمكىندىگى ەسكەرىلدى.
سونىمەن قاتار عىلىم جانە تەحنولوگيالار جونىندەگى كەڭەس وتىرىسىندا ازىرلەمەلەردى ودان ءارى قولدانىسقا ەنگىزۋ ماسەلەسى قارالدى. اتاپ ايتقاندا، جوبالاردى پيلوتتىق رەجيمدە سىناقتان وتكىزۋگە ارنالعان الاڭدار ءبولۋ، ولاردى بىرلەسىپ قارجىلاندىرۋعا بيزنەستى تارتۋ جانە جەڭىمپازدار قاتارىنا ەنبەگەن بولاشاعى زور زەرتتەۋلەرگە قولداۋ كورسەتۋ جايى تالقىلاندى.
عىلىمي ازىرلەمەلەردى قولداۋ قازاقستان پرەزيدەنتى قاسىم-جومارت توقاەۆتىڭ عىلىمدى دامىتۋ جانە يننوۆاتسيانى ەكونوميكاعا ەنگىزۋ جونىندەگى تاپسىرمالارى اياسىندا جۇزەگە اسىرىلىپ وتىر.
ايتا كەتەيىك، عىلىمي قاۋىمداستىق، مەملەكەتتىك ورگاندار مەن ساراپشىلار وكىلدەرىنىڭ باسىن قوسقان عىلىم جانە تەحنولوگيالار جونىندەگى كەڭەس الماتى قالاسى اكىمدىگى جانىنان 2024 جىلى قۇرىلعان.
