جاڭاوزەندىك 15 وتباسى مەملەكەتتىك تۇرعىن ءۇي قورىنان بەرىلگەن پاتەرلەرىن جەكەشەلەندىرە الماي ءجۇر.ولار شەنەۋنىكتەردىڭ بۇل قىلىعىنا تۇسىنبەيدى. ويتكەنى، اتقامىنەرلەر بۇعان قۇلىقسىز. امالى تاۋسىلعان ولار ماسەلەگە ايماق باسشىسىنىڭ ارالاسۋىن ءوتىندى. وسىدان 10 جىل بۇرىن كوپبالالى جانە از قامتىلعان وتباسىلار، مۇگەدەك بالاسى بار جانۇيالار باسپانانى اكىمدىك تاراپىنان العان. الايدا كوپ جىل وتسە دە ءالى كۇنگە دەيىن جەكە اتىنا وتكىزە الماي جۇرگەنگە ۇقسايدى. ال جاڭاوزەندىك اكىمدىك بولسا، نارىقتاعى پاتەر قۇنىنىڭ قالعان قالدىق اقىسىن تولەسەڭ، اۋدارۋعا بولادى دەپتى. بۇل تۋرالى «ادىرنا» ۇلتتىق پورتالى «ەۋرازيا» ءبىرىنشى ارناسىنا سىلتەمە جاساپ حابارلايدى.
«كوپبالالى انا ناتاشا ءجۇر شىرىلداپ. مىندا 1-توپتاعى مۇگەدەك بالانىڭ اناسى تۇر. ول كىسىگە ءالى اۋدارىپ بەرگەن جوق».
ءاۋ باستا باسپانا جالدامالى پاتەر ەسەبىندە بەرىلگەن. بىراق سول كەزدەگى قالا اكىمى 3 جىلدان سوڭجەكەشەلەندىرۋ قۇقىعىمەن اۋدارىپ الاسىڭدار دەگەن ەكەن. جەمە- جەمگە كەلگەندە قازىرگى اكىمدىك وكىلدەرى اينىپ قالعان. كەلىسىم-شارت بويىنشا ناتاليا ۆولوساتوۆا 3 بولمەلى ءۇيىن 7 ملن تەڭگەگە الۋى ءتيىستى. بىراق جۋىردا وعان 11 ملن تەڭگە تولەۋىڭ كەرەك دەپتى.
«مەن كوپبالالى انامىن. ءارى بيۋدجەت سالاسىنىڭ قىزمەتكەرەمىن. 2012 جىلى باسپاناعا ازەر دەگەندە قول جەتكىزدىم. جاڭاوزەن قالاسىنىڭ اكىمدىگى ول ءۇيدى 3 جىلدان كەيىن جەكەشەلەندىرىپ الاسىز دەگەن. قولىمدا كەلىسىم-شارتىم بار. پاتەر قۇنى - 7 ملن تەڭگە. ەندى جەكەشەلەندىرۋگە بارسام، ماعان 11 ملن تەڭگە تولەيسىز دەيدى. مەن بۇعان مۇلدە كەلىسپەيمىن. ءۋاجىمدى قالالىق اكىمدىك وكىلدەرى تىڭداعىسى كەلمەيدى. سول سەبەپتى وبلىستىق اكىمدىككە كەلۋگە ءماجبۇرمىن»، - دەيدى جاڭاوزەن قالاسىنىڭ تۇرعىنى ناتاليا ۆولوساتوۆا.
ال اقتۇزەل اپانىڭ جاعدايى مۇلدە باسقا. ونىڭ 1 توپتاعى مۇگەدەك بالاسى بار. ءوزى جۇمىسسىز. نەگىزىندە تەگىن بەرىلۋى ءتيىس پاتەردى وعان 10 ملن تەڭگەگە باعالاپ وتىر. ال قاتەلىك باستاپقى كەزدە كەتكەن. اناسىنىڭ پايىمىنشا، اكىمدىك ءۇيدى جارىمجان بالاسىنىڭ اتىنا راسىمدەمەگەن. سول سەبەپتى بار جەڭىلدىكتەردەن قاعىلىپ وتىر.
«ءبىر-ەكى جەرگە باردىم، يۋريستكە باردىم. ولار اپا سىزگە دوكۋمەنتتەرىڭىزدى دۇرىس بەرمەگەن دەدى. نەگىزى ينۆاليد بالانىڭ اتىندا بولۋ كەرەك ەدى. قالدىق قۇنىنىن سول ءۇشىن شىعارىپ بەرىپ وتىر. ال مەنىڭ وعان تولەۋگە جاعدايىم جوق»، - دەيدى قالا تۇرعىنى اقتۇزەل سەرىكوۆا.
وبلىستىڭ اتقامىنەرلەرى ارقايسىنىڭ ماسەلەلەرىمەن تانىسىپ، جەكە-جەكە قارايمىز دەپ ۋادەلەرىن ءۇيىپ-توكتى. الايدا ءبارى زاڭ شەڭبەرىندە بولۋى ءتيىس دەدى.
«جەەكلەي ماسەلە بولسا، وسىنداي سۇراقتار تۋىندايتىن بولسا، بىزگە ءوتىنىش رەتىندە شىعىڭىز. ءبىز وتىنىشكە سايكەس، ايتقان ماسەلەنىن قاراۋعا دايىنبىز. جەكەشەلەندىرۋگە شىعادى»، - دەيدى وبلىستىق ەنەرگەتيكا جانە تۇرعىن ءۇي شارۋاشىلىعى باسقارماسىنىڭ باسشىسى بەردىبەك قارتباەۆ.
ەگەر بۇل ماسەلە شەشىلمەسە، شاعىمدانۋشىلار وبلىس اكىمىنىڭ جەكە قابىلداۋىنا بارۋعا ءماجبۇرمىز دەيدى.
«ادىرنا» ۇلتتىق پورتالى
(فوتو ernur.kz سايتىنان)
