قاراعاندى وبلىسىندا مۇگەدەكتىگى بار ادامدار ءۇشىن جۇمىس ورىندارىنىڭ كۆوتاسى ەكى ەسەگە ۇلعايدى. جۇمىسپەن قامتۋدى قامتاماسىز ەتۋدە مەملەكەتتىك قولداۋدىڭ بارلىق شارالارى قولدانىلادى. مىسالى، ءوز ءىسىن اشۋعا 61 گرانت بەرىلدى.
– بۇگىندە مۇگەدەكتىگى بار 1120 ادام جۇمىسپەن قامتۋعا جاردەمدەسۋدىڭ بارلىق شارالارىمەن قامتاماسىز ەتىلدى. بوس جۇمىس ورىندارىنا 358 ادام جۇمىسقا ورنالاستىرىلدى. الەۋمەتتىك جۇمىس ورىندارىنا 15, قوعامدىق جۇمىستارعا – 290 ادام جولداندى. "كۇمىس جاس" جوباسى بويىنشا 106 ادام جۇمىس تاپتى. سونداي-اق، ء"بىرىنشى جۇمىس ورنى" جوباسى، جاستار تاجىريبەسى جوبالارى دا كومەكتەسەدى، – دەدى جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى اسەم جۇنىسپەكوۆا اپپاراتتىق كەڭەستە.
ونىڭ ايتۋىنشا، بيىل 89 كاسىپورىندا ءبىرىنشى، ەكىنشى جانە ءۇشىنشى توپتاعى مۇگەدەكتەر ءۇشىن 219 جۇمىس ورنىنا كۆوتا بەلگىلەنگەن. سونىمەن قاتار، جۇمىس بەرۋشىلەر مۇگەدەكتىكتىڭ ءۇشىنشى توبىنداعى ەستۋ قابىلەتى بۇزىلعان ادامدار ءۇشىن 11 ارنايى جۇمىس ورنى قۇرىلدى. قاراعاندىدا ەكى جۇمىس ورنىنا تاعى ءبىر ءوتىنىم قول قويۋ ساتىسىندا.
كاسىپكەرلىك نەگىزدەرىنە وقىتۋ "باستاۋ بيزنەس" جوباسى بويىنشا جۇرگىزىلەدى. بيزنەس-جوبالاردى قورعاعاننان كەيىن ءوز ءىسىن اشۋعا گرانت الۋعا مۇمكىندىك بار.
اسەم جۇنىسپەكوۆا ءساتتى مىسالدار كەلتىردى.
اباي اۋدانىنىڭ ياگودنوە اۋىلىندا تۇراتىن ءبىرىنشى توپتاعى مۇگەدەك ۆيكتور كولەسنيكوۆ جۇمىسسىز وتىرعان، ال قازىر كاسىپكەر. ءوز جىلىجايىندا وسىرىلگەن كوكونىستەردى ساتادى.
اناتولي مياسنيكوۆ گرانتتىق قاراجاتقا لازەرلىك ستانوك پەن قاجەتتى قۇرال-جابدىقتار ساتىپ الدى. ينتەرەرگە ارنالعان پانەل جاسايدى.
مۇگەدەكتىگى بار جانە ولارعا كۇتىم جاسايتىن ادامدار ءۇشىن تەرريكون القابىندا تسيفرلىق كاسىپتەردى وقىتۋ جوباسى جالعاسۋدا.
وبلىس اكىمى ەرماعانبەت بولەكپاەۆ جۇمىسپەن قامتۋدى قولداۋدىڭ بارلىق شارالارى تۋرالى حالىققا كوبىرەك ايتۋدى تاپسىردى.
– مۇگەدەك ادامداردى جۇمىسقا ورنالاستىرۋ بويىنشا بىرقاتار شارالار جۇزەگە اسىرىلدى. جۇمىستار جۇرگىزىلۋدە، بىراق ودان دا كوپ جۇمىس ىستەۋ كەرەك، – دەدى ول.
قاراعاندى وبلىسىندا مۇگەدەكتىگى بار 55 مىڭعا جۋىق ادام تۇرادى، ولاردىڭ جارتىسىنا جۋىعى ەڭبەككە جارامدى. جۇمىسشىلار – 11 مىڭعا جۋىق.
