بەتپەردە كيگەن بەلگىسىز جىگىت تاعى ءبىر وتباسىنا قايىرىمدىلىق جاسادى. بۇل جولى ول كوزى كورمەيتىن اناسى مەن ارباعا تاڭىلعان اعاسىن جالعىز اسىراپ وتىرعان، ونكولوگيالىق دەرتكە شالدىققان 20 جاستاعى گۇلجانعا كومەك كورسەتتى، دەپ حابارلايدى "ادىرنا" ۇلتتىق پورتالى.
قايىرىمدىلىق جاساۋشى بۇل جايتتىڭ ۆيدەوسىن Instagram-داعى جەكە پاراقشاسىندا جاريالاعان.
گۇلجان دۇنيەگە كەلمەي جاتىپ اكەسىنەن ايىرىلعان. بەس جاسىنان باستاپ قارا جۇمىس ىستەپ، كوزى كورمەيتىن اناسىن جانە ارباعا تاڭىلعان اعاسىن باعىپ كەلەدى. جۋىردا وعان قاتەرلى ىسىك دياگنوزى قويىلىپ، وتا جاسالعان. دەگەنمەن بويجەتكەن ەمدەلۋدەن باس تارتقان، سەبەبى ول ۇيدەگى جاقىندارىنىڭ قاراۋسىز قالۋىنان الاڭداعان.
وتباسى ساماننان سالىنعان ەسكى ءۇيدى جالداپ تۇرىپ كەلگەن. قايىرىمدى جىگىت ولارعا باسپانا سىيلاپ قانا قويماي، شاعىن كاسىپ اشۋعا قارجى ءبولىپ، گۇلجاننىڭ ءۇندىستاندا ەم الۋىنا دا جاعداي جاساعان.
«مەن ۇنەمى ءوزىمنىڭ ەمەس، انام مەن اعامنىڭ جايىن ويلايمىن. ولاردىڭ ءۇيى بولسا دەپ ارماندايتىنمىن. ەندى بىزدە “دۇرىستاپ ءومىر سۇرۋگە بولادى” دەگەن ءۇمىت وتى تۇتاندى»، — دەدى كوز جاسىنا ەرىك بەرگەن گۇلجان.
قايىرىمدى جاننىڭ ايتۋىنشا، قازىرگى ۋاقىتتا گۇلجان ءۇندىستاندا قاجەتتى ەم-دومىن قابىلداپ جاتىر.
