(كارىم ءابدىراحمانۇلى حاقىندا)
ءومىردىڭ نە ءبىر سىرلى سوقپاقتارىن باسىپ، اسۋلارىن اسىپ، ارمان اتتى ءبىر بۇلدىر ەلەستىڭ جەتەگىمەن بۇگىنگە جەتكەن دارىندى دارا تۇلعا، اياۋلى اعا، ارداقتى ونەر يەسى – كارىم ءابدىراحمانۇلى ءوزىنىڭ ونەر دەپ وتكەن ونەگەلى ومىرىندە قاسيەتتى حالقىنىڭ ءانى ءۇشىن الەكتەنىپ، كۇيى ءۇشىن كۇيىنبەگەن، ويلانباعان، تولعانباعان كۇنى جوق دەسەم، اسىرا ايتقاندىق بولماس. ال ەندى بۇل ءماندى دە ماعىنالى ءسوز تىركەستەرىنە اعانىڭ ءار اتتاعان قادامدارى مەن ارايلاپ اتقان تاڭدارى، ماناۋراپ باتقان كۇندەرى مازمۇن بولماق.
«كىم كەلىپ، بۇل ومىرگە كىم كەتپەگەن» دەگەندەي، بۇل عالامعا سانسىز ادام پەندەسى شىر ەتىپ كەلىپ، شىرقىراپ كەتىپ جاتادى. ال ەندى وسى جان يەلەرىنىڭ ىشىندە ەسەلى ەڭبەكتەرى ارقىلى ەل ەسىندە ساقتالىپ، ۇرپاقتان-ۇرپاققا جاتتالىپ جاتاتىن ارداقتى ادامدار ساناۋلى عانا. سوندىقتان دا كارىم ابدىراحمەنۇلى سياقتى اعالارىمىزدىڭ كەشەسى مەن بۇگىنىن ەل ەسىنە كەلتىرىپ، ومىرگە دەگەن كوزقاراس تۋراسىندا توقتالۋدى ءجون كوردىك. اسىرەسە، بولاشاعىن بىردەن بولجاپ كەتە المايتىن جاستارىمىزعا «ءبارىن دە باستان باستاۋ» كەرەكتىگىن ۇعىندىرىپ، تىنباي ەڭبەكتەنۋدىڭ جەڭىستەرى مەن جەمىستەرىن تاڭبالاپ، «تاريح پاراعىنان تابىلاتىن بولايىق» دەگىم كەلەدى.
كەشەگى وتكەن بابالارىمىزدىڭ «وكىنىش ورنى تولمايدى» دەپ تورىعا وتىرىپ، ارتىنا قالدىرعان اقىليالارىنىڭ دا تەكتەن-تەككە ايتىلا سالماعاندىعىن، بۇگىنگى ۋاقىتتى ايالاعاندا بارىپ، ەرتەڭگى ۋاقىتتىڭ ەستەلىگىنە جازىلۋعا بولاتىنىن ەسكەرتكىم كەلەدى.
وسىدان جارىم عاسىرعا جۋىق ۋاقىت بۇرىن جاڭا جىل ساۋىق كەشىنە ارناپ ءان جازىپ، جاڭا ءبىر تىڭ جولعا قادام تاستاپ، ءوزىنىڭ تۇڭعىش تۋىندىسىن عاسىرلار قاتپارىن قۇراعان «جىل» تۋراسىندا جازدى. ونى ساۋىق ساحناسىندا ورىنداپ، ساباقتاستارى مەن مۇعالىمدەرىنىڭ قىزعىن قارسى الۋىنا بولەنگەن كارىم ابدىراحمەنۇلى سول ءبىر ورتا مەكتەپ قۇشاعىنداعى كۇندەرىنىڭ وزىندە تىنباي ىزدەنە بىلگەن.
انە، سودان تارتىپ وزىنە قاتاڭ تالاپ قويىپ، جورا-جولداستارىنىڭ ويىن-تاماشاعا جۇمساعان ۋاقىتىن ول جالىقپاي ىزدەنۋگە پايدالانىپ، ەشكىمدە كەزىكپەس ەرەكشە قىزعىندىقپەن ەنتەلەي العا تارتتى. كۇن سايىن كەمەلدەنىپ، جىل سايىن جەتىلىپ، ءتۇرلى فورما-جولدارمەن كەڭ ورىسكە بەت الدى. مۇمكىندىكتىڭ بارىنشا تىڭ دا جاڭا مازمۇندار ىزدەنىپ، مۋزىكا جازۋدىڭ جاي-جاپسارىن بەرىلە زەرتتەپ، «ماقتانىشىم دوستارىم»، «قىزعالدىق»، «اق ساۋلە»، «سارقىلماس ماحاببات»، «ناز»، «تولقىن»، «سايرا، دومبىرا» سياقتى ءار ءتۇرلى ستيلدەگى اندەر جازدى.
وعان قوسا «ايلى ءتۇن»، «جىلقىشى قىز»، «قۋانىش» قاتارلى كۇيلەردى جارىققا شىعاردى. «قارا جورعا سالتاناتى»، «ايگولەك»، «كوكپار»، «قوڭىراۋلى قوزى» تەكتەس بىرقىدىرۋ بي مۋزىكالارىن جازىپ، كۇن-ءتۇن دەمەي تولعانۋدىڭ ناتيجەسىندە بۇل كۇنگە دەيىن ەكى ءجۇزدىڭ ۇستىندە شىعارما جازدى. بۇل تۋىندىلارى ءار ساحنالاردا ورىندالىپ، راديو-تەلەديداردا جاريالانىپ، ءبىرازى كىتاپ-جۋرنالداردا باسىلىپ، حالىقتىڭ قاجەتىنەن شىقتى. ءتىپتى، تەك قانا قازاقتىڭ ەمەس كۇللى دۇنيە حالقىنىڭ رۋحاني ازىعىنا اينالدى. سونىمەن قوسا «ءساليحا-سامەن» وپەراسىنىڭ، مۋزىكالى پەسا «ءۇيسىن رۋحىنىڭ»، ۇلاسپالى تەلەفيلم «تاڭجارىقتىڭ» جانە سول تەكتەس ءبىر قانشالاعان شىعارمالاردىڭ مۋزىكاسىن جازىپ، وزىندىك ەرەكشەلىكتەرىن ءدوپ باسىپ بەينەلەپ بەردى.
كارىم اعا «بالالىعىم ءبىر داستان، شالالىعىم ءبىر داستان» دەمەكشى، – دەپ كەڭەس بارىسىندا ءوزىنىڭ كەشەگى كۇندەرىن ەسىنە الىپ بىلاي تولعاندى:
«مەن 1944 جىلى 28 جەلتوقساندا التاي ايماعىنىڭ بۋىرشىن اۋدانىندا دۇنيەگە كەلىپپىن. سودان 1947 جىلى «ءۇش ايماق توڭكەرىستىك ۇكىمەتى» التاي ايماعى باسشىلارىن قايتا تاعايىنداعان كەزدە، اكەم ءابدىراحمان توققۇل التاي اماعى ءۋاليىنىڭ ورىنباسارى بولىپ، قىزمەتى اۋىسقان سوڭ ءۇيىمىز دە سارسۇمبە (قازىرگى التاي) قالاسىنا كوشىپ بارىپ، بالالىق ءداۋىرىم سوندا ءوتتى.
مەندە جاستايىمنان قالىپتاسقان ءبىر ادەت – ءار نارسەگە اۋەس ەدىم. ءتىپتى، شىنىمدى ايتسام، قىزىقپايتىن دۇنيەم بولمايتىن. ماسەلەن، سۋرەت سالۋ، سپورت تۇرلەرى، ادەبيەت-كوركەمونەرگە دەگەن قۇشتارلىق مەنى مازاسىز كۇيگە تۇسىرەتىن. ال سوعان جاراي بويىمدا ارقايسىسىنا دەگەن بەيىمدىلىك بولدى. مەنىڭ ەڭ الدىمەن يگەرگەن مۋزىكالىق اسپابىم اۋىز سىرنايى ەدى.
باستاۋىش مەكتەپتىڭ ويىن-ساۋىق گرۋپپاسىندا سىرنايمەن ءان-بيگە سۇيەمەل جاساۋ – مۋزىكالىق جولىمنىڭ باستاماسى بولدى. كەيىن ورتا مەكتەپكە بارعاندا دومبىرا، ماندولينا قاتارلى اسپاپتاردى ۇيرەندىم. مۇعالىمدەرىمنىڭ جەتەلەۋىنەن تىس، ۇيدە اكە-شەشەمنىڭ قولداۋى دا جاقسى بولدى. مەيلى ۇلكەن بول، كىشى بول، قانداي جۇمىستى باستاردا بولسىن، ناتيجەگە جەتۋدە بولسىن، ادام ارقاشان ەكىنشى ءبىر جاقتىڭ قولداۋىنسىز كەز كەلگەن ءىستى ىستەپ كەتۋى ەكىتالاي. تۇسىنگەن ادامعا «قولداۋ» دەگەن ءبىر قاسيەتتى ءسوز. «قولداۋشىڭ باردا قور بولمايسىڭ» دەگەن دە بەكەر ايتىلماسا كەرەك.
وتباسىمداعى ءوزىمنىڭ ارناۋلى ساندىقشامدا سۋرەت سالۋعا قاجەتتى بوياۋلار مەن ءجۇن قالامدار جانە ءوزىم ءسۇيىپ وقيتىن كوپتەگەن كىتاپتار ساقتالۋشى ەدى. مەنى جانىنداي جاقسى كورەتىن اكەم مارقۇم ءبىر رەت قۇلجاعا جيىنعا بارعان جولىندا ماندولينانىڭ ءبىر ءتۇرى ماندول دەگەن اسپاپ اكەلىپ بەردى. وسىنداي ءبىرشاما جاقسى مۇمكىندىكتەر مەنىڭ كوركەمونەر جونىندە نەداۋىر تۇسىنىككە، پراكتيكالىق ىقتيمالدىققا يە بولۋىما سەبەپشى بولدى.
1957-1959 جىلدارى اكە-شەشەم دۇنيە سالدى. اسپان قۇلاپ باسىما تۇسكەندەي سول ءبىر شاقتارىمدا تاعى دا سول بالا كەزدەن وزىنە باۋراعان سازدى سىرلاستارىم قايعىما ورتاقتاسىپ، قاسىرەتىمدى جەڭىلدەتتى. كوڭىلىم تولقي قالعان كەزدەردە دومبىرام مەن ماندالينىمدى كەزەك تىڭقىلداتىپ، كەڭەسكەندەي بولعاندا بارىپ تىنىسىم قالپىنا تۇسەتىن ەدى. «اكەڭ ولسە ءولسىن، اكەڭدى كورە قالعان ولمەسىن» دەگەندەي، يللاھي، اق كوڭىلى اڭقىلداعان حالقىم امان بولسىن!
سودان 1960 جىلى اقپان ايىندا التاي ايماقتىق ويىن-ساۋىق ۇيىرمەسىنە رەسمي مۋزىكانت بولىپ قابىلداندىم دا، بالا كۇنگى اۋەسىم بولعان ارداقتى اسپاپتارىمدى الدىما الىپ، الديلەي جونەلدىم...».
«پوەزيا ماحابباتپەن باستالىپ، پاراساتپەن اياقتالۋى ءتيىس» ءتيىس دەگەن عوي الىپ مۇقاعالي. انە، سول سياقتى كارىم اعانىڭ كەشىرمەلەرى اۋەلى مۋزىكاعا دەگەن اۋەستىكتەن باستالدى دا، سوعى ديريجەرلىككە ۇلاستى. ول رەسمي وركەستردە ديريجەر بولعان سوناۋ الپىسىنشى جىلدارداعى التاي ايماعىندا قۇرىلعان تاريحي داستان «شىعىس قىزاردىدان» باستاعان ەكەن.
سودان بەرى جارىم عاسىر ۋاقىتتا وسى ءبىر جاپالى دا داڭقتى جۇمىسپەن اينالىسىپ، سانسىز شىعارمالاردى ءار ءتۇرلى اۋەندەرگە ءبولۋ ارقىلى ارلەندىرە ءتۇستى. كارىم اعانىڭ بۇل سالاداعى جەتىستىگى ايتىپ تاۋىسقىسىز، ۇشان-تەڭىز ەسەلى ەڭبەكتەرى كۇي بولىپ كۇمبىرلەپ، ءان بولىپ اۋەلەپ، ەل ەسىندە قالارى ءسوزسىز.
ءبىز بۇل كۇندەرى «ۇلت اسپاپتارى وركەسترىمەن» ورىندالعان نە ءبىر عاجايىپ كۇيلەر مەن اندەردى راديودان ەستىپ، تەلەديداردان كورىپ كەلەمىز. ءتىپتى، كەي ۋاقىتتار دا اتىن دا ەستىپ كورمەگەن كيەلى ۇلتتىق اسپاپتارىمىزدى ۇستاپ، ساحناعا كوتەرىلگەن ارتيستەرىمىزگە ءار دايىم العىستارىمىزدى جاۋدىرىپ، سۇلۋ سازدى سۇيسىنە تىڭداپ، سۇيىنە قاراپ وتىرامىز.
مىنە، وسى كورىنىستەرگە كۋا بولىپ كەلە جاتۇان كارىم اعانىڭ جەتەكشىلىگىندەگى ىلە قازاق اۆتونوميالى وبلىستىق كوركەمونەر ۇيىرمەسىنىڭ ۇلت اسپاپتار وركەسترى توپ ەتىپ توبەدەن تۇسە قالعان جوق. قايتا بۇراڭ جولداردى ارتقا سالىپ، سانسىزداعان ونەر قايراتكەرلەرىنىڭ ارقاسىندا اياعىن ءتاي-ءتاي باسىپ، قاز تۇرىپ، سولاردىڭ تابان ەت، ماڭداي تەرلەرىنىڭ بوداۋى نەگىزىندە بۇل كۇنگە جەتىپ وتىر.
ەندەشە، وسى ءبىر ۇلكەن تاريحي مىندەتكە ءوز ۇلەسىن قوسىپ، وركەستردىڭ قۇرىلۋ بارىسىندا باستان اياق قاسىندا بولىپ، اشتى-تۇشتىسىن بىرگە تاتقان ارداقتى اعامىز، قاسيەتتى ونەر ورداسىنىڭ قارا شاڭىراعىنداي سەزىلەتىن وركەستر ءومىرى جايلى بىلاي تولعانادى:
«ءتۇرلى زەرتتەۋ ناتيجەلەرى بۇگىنگى كۇندە قازاق ۇلتتىق مۋزىكا اسپاپتارىنىڭ الپىس نەشە تۇرگە جەتكەندىگىن انىقتادى. جانە ول ىشەكتى-ىسقىمالى، شەرتپەلى، ۇرلەمەلى، ۇرمالى-سوقپالى دەپ ءبولىنىپ، بۇكىل ادامزات مۋزىكا اسپاپ تۇرلەرىنىڭ قۇرامىن قۇرايتىن ءتورت ۇلكەن سالانىڭ ءبارىن دە قامتىعاندىعىن كورسەتىپ وتىر. مۇنىڭ ءوزى قازاقتىڭ مۋزىكا اسپاپتارىنىڭ ءبىرشاما كەمەلدى ەكەندىگىن ءارى ءتۇر جاعىنان مول بولعاندىعىن بىلدىرەدى.
بىراق، بۇل زەرتتەۋلەر كەيىنگى كەزدە ناتيجە بەرگەندىكتەن قىتايدا كوپكە دەيىن دومبىرا عانا ساحناعا شىعىپ ءجۇردى. بۇل جاعداي ۇلتتىق مۋزىكا مادەنيەتىنىڭ دامۋىنا كوپ كەدەرگى بولىپ كەلدى. سوندىقتان ۇلت اسپاپتار وركەسترىن قۇرىپ، ۇلتتىق مۋزىكا مادەنيەتىن دامىتۋدىڭ اياق الىسىن تەزدەتۋ، ورەسىن جوعارىلاتۋ تالابى مەن ويى حالىق ىشىندە دە، ونەر سالاسىندا دا، ەلىم دەپ ەگىلە بىلەتىن پاراساتتى باسشىلار كوڭىلىندە دە بولىپ كەلدى.
سونىمەن، وبلىستىق ويىن-ساۋىق ۇيىرمەسىن قايتادان جاڭالاپ قۇرۋ قىزمەتى جۇرىلگەن 1975 جىلدارى قوبىزدى ساحناعا كوتەرۋ مىندەتى دە جولعا قويىلىپ، ءجانابىل سىماعۇلۇلى، ەرعالي قاتارلى باسشىلاردىڭ نۇسقاۋىندا كەزىندەگى وبلىستىق مادەنيەت مەكەمەسىنىڭ باستىعى سابيتقازىنىڭ ۇيىمداستىرۋىمەن ۇيىرمەدە كامال ماقايۇلى، باياقىن، داۋلەت حالىقۇلى، لۋ ىنجى جانە مەن قاتارلى بەس ادامنان ارناۋلى گرۋپپا قۇرىلىپ، قوبىزدى قاتارعا قوسۋ جونىندەگى جۇمىس قىزۋ باستالدى.
مۇندا قوبىز جاساۋ جاعىندا ءادىلحان ءابدىلداۇلى ەرەسەن ەڭبەك ءسىڭىردى دە، ال ساحناعا تۇڭعىش كادەك قىرعىزبايۇلى الىپ شىقتى. 1986 جىلى وبلىس باستىعى ديار قۇماش، ورىنباسارلارى زاقان ومارۇلى، مالگاجدار قاتارلى كىسىلەردىڭ قولداۋىمەن، مادەنيەت مەكەمەسىنىڭ باستىعى ىرىمحان ايدارحاننىڭ اتسالىسۋىندا وبلىستان ارناۋلى قارجى ءبولىنىپ، شاڭحاي ۇلت اسپاپتارى زاۋىتىنا ءادىلحان ءابدىلداۇلىن جىبەرىپ، دومبىرا، قوبىز، داۋىلپاز تەكتەس ءبىر پار اسپاپتار جاساتىپ، وركەستردىڭ تۇڭعىش تۇلعاسىن ىسكە قوستىق. وركەستردىڭ مۋزىكالىق قورىن تولىقتىرۋ ءۇشىن «جەكە باتىر»، «ساحارا جاستارى» سياقتى كۇيلەر جازدىق جانە حالىق كۇيلەرىن وركەسترگە ءتۇسىرىپ ورىندادىق.
ال، ءبىزدىڭ وركەستردىڭ بۇگىنگىدەي ءبىرشاما كەمەلدى كۇيگە كەلۋىنە قازاقستانداعى ونەر قايراتكەرلەرىنىڭ وزىندىك ۇلەسى بولدى. 1995 جىلى وبلىس باسشىلارى اسحات كەرىمباي، بەكمۇقامەت مۇسا، حاكىم بوكەن قاتارلى كىسىلەردىڭ كوڭىل بولۋىمەن قازان ايىندا مادەنيەت مەكەمەسىنىڭ باستىعى عالىم باستاپ، مەن جانە توكەن قاتارلى ءبىر توبىمىز الماتى قالاسىنا بارىپ، قازاقستان رەسپۋبليكاسى مادەنيەت مينيسترلىگىنىڭ ورنالاستىرۋىمەن «قۇرمانعازى اتىنداعى اكادەميالىق اسپاپتار وركەسترىمەن كەلىسىم جاساسىپ، تۇياق شامەلوۆ، قۋانىش اقمۇراتوۆ، قۇندىز قالامباەۆالاردى قۇلجا قالاسىنا ۇستازدىققا شاقىرىپ، قىلقوبىز، پريما قوبىز، دومبىرا ورىنداۋشىلىق كۋرستارىنا ساباق بەرۋگە كەلىسىپ قايتتىق.
بۇل كۋرس 1996 جىلى قاڭتاردىڭ ورتاسىنان كوكەكتىڭ سوڭىنا دەيىن اشىلىپ، وبلىستىق ءان-بي ۇيىرمەسىنىڭ مۋزىكانتتارى تولىق قاتىسۋدان سىرت، التاي، تارباعاتاي، ىلە ايماقتارىنان دا شاكىرتتەر قاتىسىپ، كۋرس ويداعىداي ناتيجەلەرگە قول جەتكىزدى. سونىمەن بىرگە ۇيىرمەمىزدىڭ «ۇلت اسپاپتار وركەسترىنىڭ» ورىنداۋشىلىق ونەرى جوعارىلاي ءتۇسىپ، حالىقتىق، ۇلتتىق قوبىز جانە ونىڭ جەتىلدىرىلگەن ءتۇرى رەسمي ىسكە قوسىلدى.
قازىر «ۇلت اسپاپتار وركەسترىندە» جوعارى-تومەن، ورتا داۋىستار گرۋپپالارىنا بولىنگەن دومبىرالار توبى مەن قوبىزدار توبى، شەرتەر، سىبىزعى، ۇرمالى-سوقپالى اسپاپتاردى قامتىعان ءبىر ءجۇرىس ۇلت اسپاپتارى جۇمىس ىستەيدى. مىنە، وسىنداي جۇيەلى وركەستردىڭ قۇرىلۋى – ۇلتتىق مۋزىكا مادەنيەتىن دامىتۋدا قولعا كەلتىرگەن زور تابىس بولىپ تاريحقا قالدى.
قىتاي مۋزىكانتتار قوعامىنىڭ مۇشەسى، شينجياڭ مۋزكانتتار قوعامى توراعاسىنىڭ ورىنباسارى، ىلە وبلىستىق مۋزىكانتتار قوعامىنىڭ توراعاسى، «مەملەكەتتىك ءبىرىنشى دارەجەلى كومپوزيتور» كارىم ابدىراحمەنۇلى ىلە وقۋ-اعارتۋ ينستيتۋتى، وبلىستىق كوركەمونەر مەكتەبى جانە ۇيىرمە قۇرامىنداعىلارعا «نوتا نازارياسى»، «مۋزىكالىق نەگىزگى بىلىمدەر»، «گارمونيا»، «مەلوديا» قاتارلى ساباقتاردى بەرىپ، ونەر سالاسىنداعى وركەندەردىڭ مۋىزكا ساباعىنان ساۋات اشۋىنا ءبىر كىسىلىك ۇلەسىن قوستى.
مۋزىكا زەرتتەۋ ىستەرىمەن دە شۇعىلدانىپ، «قىتاي ەنتسيكلوپەدياسى بي-مۋزىكا توبىنىڭ» جانە «قىتاي از ۇلت اسپاپتىق كۇيلەرى» جيناعىنىڭ دايىندالۋ جۇمىستارىنا قاتىسىپ، «قازاق ۇلتىنىڭ مۋزىكاسى»، «قازاق حالىق كۇيلەرى جونىندە شولۋ»، «قوبىز»، «جاراپازان» قاتارلى عاىلىمي ماقالالار جازىپ، ىزگىلىكپەن ىزدەنىپ كەلدى.
سونىمەن بىرگە، 65-ءىنشى جىلدارى التاي ايماقتىق ويىن-ساۋىق ۇيىرمەسى مۋزكانتتار گرۋپپاسىنىڭ جاۋاپتىسى بولعاننان باستاپ كۇنى بۇگىنگە دەيىن ءتۇرلى اكىمشىلىك قىزمەتتەن دە قول ۇزبەي، ءوزىنىڭ ۇيىمداستىرۋ، باسشىلىق ەتۋ جاقتارىنداعى ارتىقشىلىقتارىن دا كورسەتىپ، قوس تىزگىندى تەڭ ۇستادى. اتادان قالعان «سەگىز قىرلى، ءبىر سىرلى» دەگەن بابا تالابىنان شىقتى.
«ءبىلىمى كۇشتى مىڭدى جىعار، بىلەگى كۇشتى ءبىردى جىعار» دەيتىن حالىق ماتەلىن جادىندا تۇتقان ول، ءوزىنىڭ سوناۋ 1973-1976-1978-1985 جىلدارداعى ورتالىقتا جانە شاڭحاي، گانسۋ ولكەلەرىندەگى قىسقا مەرزىمدىك وقۋ ورايلارىندا يگەرگەن نازاريالىق جانە امالياتتىق بىلىمدەرىن ناقتىلى ءىس بارىسندا پايدالاندى. ولاردى وزىندىك ۇلتتىق ەرەكشەلىككە ساي تالعام تارازىسىنان وتكىزىپ، اقيقاتتى ءامالياتتان ىزدەۋ تۇرعىسىنان جاندى قولدانىپ كەلدى. ءار قانداي ۋاقىتتا حالىقتىق ءان-كۇيدىڭ قاسيەتىن باستى، ماڭىزدى ورىنعا قويا ءبىلدى.
مەيلى، شىعارماشىلىقپەن شۇعىلدانسىن، مەيلى، حالىق ءان-كۇيلەرىن نوتاعا ءتۇسىرىپ، دىبىستارعا جانە اسپاپتارعا ءبولىپ وركەسترگە ورنالاستىرسىن، شاكىرتتەرىنە ساباق بەرگەندە بولسىن، قاي-قاشاندا ۇلتتىق سارىندى ساقتاۋ جونىندەگى ويلارىن ورتاعا تاستاۋدى ۇمىتقان جوق. سوندىقتان دا ول قاسيەتتى قازاق ونەرىنىڭ قادىرىنە جەتكەن اياۋلى دا ارداقتى ازامات ەسەپتەلمەك.
«شەكتى ومىردە شەكسىز ەڭبەك ءسىڭىرۋ» ەكىنىڭ ءبىرىنىڭ قولىنان كەلە بەرەتىن ءىس ەمەس ەكەندىگى بەلگىلى. ونىڭ ۇستىنە تىنباي تالپىنىپ، باستان اقىر ءبىر قالىپتى ساقتاپ، ەرىنبەي ەڭبەكتەنىپ، قاجىماي-تالماي قايراتتانىپ، قانداي دا ءبىر ەڭبەك ناتيجەلەرىن قاناعات قىلمادى. نە ماساتتانباي، اتاق-داڭقى ارتا تۇسكەن سايىن كىرشىكسىز كىشىپەيىلدىگىن كورسەتىپ، «مەن پالەنمىن» دەپ ەشكىمدى ەلەمەيتىن تاكاپپارلىقتان بويىن اۋلاق ۇستادى. ۇلكەن-كىشىنىڭ بارىمەن دە جۇرەك توعىستىرىپ، ويىن ورتاقتاسىرا بىلگەن، دارىنىنا دارحاندىعى ساي اقجارقىن اعا كارىم ابدىراحمەنۇلى كەيىنگى جاستار ۇلگى ەتۋىنە تاتيتىن دارا تۋعان تالانت يەسى.
ال ونىڭ تۇعىرى بيىك، تۇلعاسى بولەك قۇندى دا قۇدىرەتتى شىعارمالارى مۋزىكا سالاسىندا ەڭبەكتەنىپ كەلە جاتقان ماماندارىمىز بەن جانە ولاردىڭ ءىزباسارلارىنىڭ زەر سالا زەرتتەۋىن كۇتىپ تۇرعان تىڭ تاقىرىپ بولماق. كوگىلدڭر كوكتكە كوپتەگەن جۇلدىزدار بار. بىراق، شولپان بىرەۋ عانا.
تاڭ الدىندا تۋعان شولپانداي بولىپ، شوق جۇلدىزدار اراسىنان ەرەكشە جارقىراپ كورىنەتىن اياۋلى اعا ەڭبەگى بۇدان بىلاي ءتىپتى دە كورنەكىلەنە بەرەتىنى حاق!
اۆتور تۋرالى:
سەرىك ءابىلۇلى 1973 جىلى 4 اقپاندا قىتايدىڭ التاي ايماعىنداعى ۇلىڭگىر كولى بويىندا، جەتىارال دەگەن جەردە دۇنيەگە كەلگەن. شىڭجاڭ ۋنيۆەرسيتەتىنىڭ «قازاق ءتىلى مەن ادەبيەتى» فاكۋلتەتىن، شىڭجاڭ پارتيا مەكتەبىنىڭ ەكونوميكالىق باسقارۋ فاكۋلتەتىن بىتىرگەن.
«داريعا-اي»، «شولپان»، «سامال» پۋبليتسيستيكالىق، «كۇمىس جەبە»، «قوبىز سارىن»، «اققۋ ارمان» جىر جيناقتارى، «كۇن» اتتى بالالارعا ارنالعان شالقىما، باللادالار جيناعىنىڭ اۆتورى.
سەرىك ءابىلۇلى قىتايداعى قازاق راديوسىندا ۇزاق جىلدار قىزمەت ەتىپ، سول ەلدەگى قانداستاردىڭ مادەنيەتىنە ەلەۋلى ۇلەس قوسقان تۇلعانىڭ ءبىرى. ول قازاقتىڭ تاڭداۋلى 50 ءانىن قىتاي تىلىنە اۋدارتىپ، ۇلتىمىزدىڭ كەڭ تاراعان 500 كۇيى مەن 200 حالىق ءانىن تاسپاعا تۇسىرگەن، 100-گە جۋىق ءان ءماتىنى مەن كوپتەگەن ءاننىڭ اۆتورى، راديو ەفيرىندە 30-عا تارتا رومان وقىعان تانىمال ديكتور، اقىن، ءانشى، سازگەر.
قۇلاققا جاعىمدى قازاقى قوڭىر داۋىس يەسى سەرىك ءابىلۇلى قازىر اتامەكەنگە ورالدى.
