«اۋىل ناقىشتارى» فوتوبايقاۋىنىڭ قورىتىندىسىن شىعاردى، دەپ حابارلايدى "ادىرنا" ۇلتتىق پورتالى photooner.kz-كە سىلتەپ.
بايقاۋ قازاقستاننىڭ داستۇرلەرىن ساقتاۋ، اۋىل ءومىرىنىڭ وڭ ءيميدجىن قالىپتاستىرۋ جانە فوتوجۋرناليستيكانى قولداۋ ماقساتىندا ۇيىمداستىرىلعان ماڭىزدى مادەني جوبا بولدى.
استاناداعى «حان شاتىر» ساۋدا ويىن-ساۋىق ورتالىعىندا بايقاۋ جەڭىمپازدارىن ماراپاتتاۋ ءراسىمى ءوتىپ، ۇزدىك سۋرەتتەر كورمەسىنىڭ اشىلۋى ۇيىمداستىرىلدى. سونداي-اق «اۋىل» پارتياسى مادەنيەت جانە اقپارات مينيسترلىگىنىڭ قولداۋىمەن جارىق كورگەن «اۋىل ناقىشتارى» اتتى كوركەم فوتوالبومنىڭ رەسمي تانىستىرىلىمى دا وتكىزىلدى. ءىس-شاراعا پارتيا باسشىلىعى، مادەنيەت قايراتكەرلەرى، كاسىبي فوتوگرافتار جانە ونەر سۇيەر قاۋىم قاتىستى.
«اۋىل» پارتياسىنىڭ توراعاسى سەرىك ەگىزباەۆ بايقاۋدىڭ ەل مادەنيەتىن ساقتاۋداعى رولىنە توقتالدى.
«“اۋىل ناقىشتارى” – اۋىل ءومىرىنىڭ سۇلۋلىعىن، تابيعاتى مەن ەڭبەكتەنىپ جۇرگەن ادامداردىڭ بەينەسىن پاش ەتەتىن ەرەكشە جوبا. جىل سايىن قاتىسۋشىلار سانى ارتىپ كەلەدى. بۇل – تۋعان جەرگە دەگەن ماحاببات پەن قۇرمەتتىڭ كورىنىسى»، — دەدى ول.
بيىل بايقاۋعا قازاقستاننىڭ 20 وڭىرىنەن 678 قاتىسۋشى قاتىسىپ، جالپى 3366 فوتوسۋرەت ۇسىنىلدى. جۇمىستار اۋىل ءومىرىنىڭ ءار قىرىن، تابيعاتتىڭ وزىندىك مىنەزىن، ەڭبەك ادامدارىنىڭ بەينەسى مەن اۋىل مادەنيەتىن قامتىدى. بايقاۋ «اۋىل پەيزاجدارى»، «ەڭبەك ادامىنىڭ فوتوپورترەتى»، «فوتورەپورتاج» نوميناتسيالارى بويىنشا ءوتتى. سونىمەن قاتار العاش رەت «اۋىلداعى باقىتتى بالالىق» اتتى جاڭا نوميناتسيا ەنگىزىلدى.
الەۋمەتتىك جەلى پايدالانۋشىلارى داۋىس بەرۋ ارقىلى تاڭداعان «كورەرمەندەر كوزايىمى» نوميناتسياسى دا ەرەكشە نازارعا يە بولدى. Telegram جەلىسىندە 10 ءفيناليستىڭ اراسىنان ۇزدىك جۇمىس تاڭدالدى.
جەڭىمپازدار سەرتيفيكاتتارمەن جانە باعالى سىيلىقتارمەن ماراپاتتالدى. جالپى جۇلدە قورى — 3 ملن 900 مىڭ تەڭگە. باس جۇلدەنى شىمكەنت قالاسىنىڭ تۇرعىنى — ماقسات شاعىرباەۆ يەلەندى.
