وش قالاسىندا اباي قۇنانبايۇلى اتىنداعى كوشە، ەسكەرتكىش جانە مۋزەيدىڭ سالتاناتتى اشىلۋ ءراسىمى ءوتتى، دەپ حابارلايدى "ادىرنا" ۇلتتىق پورتالى.
بۇل تۋرالى مادەنيەت جانە اقپارات مينيسترلىگىنىڭ ءباسپاسوز قىزمەتى حابارلادى.
ءىس-شاراعا قازاقستاننىڭ مادەنيەت جانە اقپارات ءمينيسترى ايدا بالاەۆا، قىرعىزستاننىڭ مادەنيەت، اقپارات، سپورت جانە جاستار ساياساتى ءمينيسترىنىڭ ورىنباسارى اسقارالى مادامينوۆ، وش قالاسىنىڭ مەرى جەڭىسبەك توقتورباەۆ، ديپلوماتيالىق كورپۋس پەن شىعارماشىلىق زيالى قاۋىم وكىلدەرى قاتىستى.
اشىلۋ سالتاناتىندا مينيستر ايدا بالاەۆا بۇل باستامانىڭ ەكى ەل اراسىنداعى رۋحاني بايلانىستاردى نىعايتۋداعى ەرەكشە ماڭىزىن اتاپ ءوتتى.
"بيىل تامىز ايىندا بىشكەكتە مۇحتار اۋەزوۆ پەن شىڭعىس ايتماتوۆقا ارنالعان كومپوزيتسيالىق ەسكەرتكىش اشىلعان ەدى. سول ءداستۇردى بۇگىن وش جەرىندە ابايدىڭ ەسىمىمەن جالعاستىرىپ وتىرمىز. بۇل — تەك مادەني نىساندار عانا ەمەس، ەكى ەلدىڭ باۋىرلاستىعىن، رۋحاني ساباقتاستىعىن كورسەتەتىن ماڭگىلىك بەلگى", — دەدى مينيستر.
سونىمەن قاتار، مەملەكەت باسشىسىنىڭ جارلىعىمەن وش قالاسىنىڭ مەرىنە قازاقستان رەسپۋبليكاسىنىڭ II دارەجەلى «دوستىق» وردەنى تابىستالدى.
ءمينيستردىڭ ايتۋىنشا، سوڭعى جىلدارى قازاقستان مەن قىرعىزستاننىڭ مادەني-گۋمانيتارلىق ىنتىماقتاستىعى ايتارلىقتاي دامىپ كەلەدى. بىرلەسكەن كورمەلەر، تەاتر گاسترولدەرى، ادەبي جانە جاستار فورۋمدارى، عىلىمي كونفەرەنتسيالار تۇراقتى تۇردە وتكىزىلىپ، مادەنيەت مەكەمەلەرىنىڭ ارىپتەستىگى كۇشەيگەن.
