قىتاي قالاي دەگەندە دە ءبىزدىڭ قۇداي قوسقان كورشىمىز، ىرگەمىزدى اۋلاق سالىپ كوشىپ تە كەتە المايمىز. سوندىقتان اجداھانىڭ تىنىسىنا قۇلاق ءتۇرىپ، قيمىلىن باعىپ، سوعان سايكەس ءوز تىرلىگىمىزدىڭ باعىتىن تۇزەپ، قورعاناتىن تۇستا قاپىسىن جىبەرمەۋىمىز قاجەت.
قاراپ وتىرساق سوڭعى 10-15 جىلدىڭ جۇزىندە وسى ەلدەن تارايتىن اۋرۋ قاتارى كوبەيگەن ەكەن. قۇس تۇماۋى، شوشقا تۇماۋ، ەندى مىنە، كوروناۆيرۋس. كوڭىلىڭە ءتۇرلى كۇماندى ويلار ۇيالايدى ەكەن. اسىرەسە بۇل، قىتايمەن كورشى جاتقان موڭعول، قازاق، قىرعىز سىندى سانى از حالىقتاردىڭ قاۋىپسىزدىگىنە زور قاتەر. ەرەنقابىرعانىڭ ارجاعىنداعىلار ءۇشىن اۋرۋدان ميلليون جوعالتسا دا دىم ەتپەس، ال بىزدەر ءۇشىن ونىڭ ۇلكەن قاۋىپ ەكەنى راس.
وسى ۆيرۋستاردىڭ قايتا-قايتا شابۋىلعا شىعۋى بىزدەرگە ءبىر عىلىمعا اسا ىجاھاتتى كوڭىل ءبولىپ، ونىڭ دامۋى مەن زەرتتەۋلەر جۇرگىزۋىنە، ماماندار دايارلاپ شىعۋىنا قوماقتى قاراجات ءبولۋ كەرەكتىگى سىندى ۇلكەن پروبلەمانى جالاڭاشتاپ بەردى. ول-ۆيرۋسولوگيا!
شىنى كەرەك، قۇداي جار بولسىن ءتىپتى ءبىزدىڭ زەرتحانالارىمىزدىڭ ءوزى ۆيرۋستىڭ بار جوعىن جەدەل انىقتاي الاتىن كۇيدە ەمەس ەكەن. قىتاي ءتارىزدى از كۇندە اۋرۋحانا تۇرعىزاتىن ءحالىمىز دە جوق، ەندەشە ءالى دە الدا بولۋى ىقتيمال جۇقپالى اۋرۋلاردىڭ الدىن الۋ ءۇشىن وسى سالانىڭ قارقىندى دامۋىن ويلاستىرۋ كەرەك.
نەگە كورشى ەل ۆيرۋستى اۋرۋلاردىڭ قايتا-قايتا وشاعىنا اينالا بەرەدى دەگەن كۇماندى وي الەم جۇرتشىلىعىن دا ويلاندىرۋى ءتيىس ءتارىزدى. قالاي دەگەندە دە ىقتيمال قاتەرلەردىڭ الدىن الماسا بولمايدى!
انار تولەۋحانقىزى
