Qytaı qalaı degende de bizdiń qudaı qosqan kórshimiz, irgemizdi aýlaq salyp kóship te kete almaımyz. Sondyqtan ajdahanyń tynysyna qulaq túrip, qımylyn baǵyp, soǵan sáıkes óz tirligimizdiń baǵytyn túzep, qorǵanatyn tusta qapysyn jibermeýimiz qajet.
Qarap otyrsaq sońǵy 10-15 jyldyń júzinde osy elden taraıtyn aýrý qatary kóbeıgen eken. Qus tumaýy, shoshqa tumaý, endi mine, koronavırýs. Kóńilińe túrli kúmándi oılar uıalaıdy eken. Ásirese bul, qytaımen kórshi jatqan mońǵol, qazaq, qyrǵyz syndy sany az halyqtardyń qaýipsizdigine zor qater. Erenqabyrǵanyń arjaǵyndaǵylar úshin aýrýdan mıllıon joǵaltsa da dym etpes, al bizder úshin onyń úlken qaýip ekeni ras.
Osy vırýstardyń qaıta-qaıta shabýylǵa shyǵýy bizderge bir ǵylymǵa asa yjahatty kóńil bólip, onyń damýy men zertteýler júrgizýine, mamandar daıarlap shyǵýyna qomaqty qarajat bólý kerektigi syndy úlken problemany jalańashtap berdi. Ol-vırýsologııa!
Shyny kerek, qudaı jar bolsyn tipti bizdiń zerthanalarymyzdyń ózi vırýstyń bar joǵyn jedel anyqtaı alatyn kúıde emes eken. Qytaı tárizdi az kúnde aýrýhana turǵyzatyn hálimiz de joq, endeshe áli de alda bolýy yqtımal juqpaly aýrýlardyń aldyn alý úshin osy salanyń qarqyndy damýyn oılastyrý kerek.
Nege kórshi el vırýsty aýrýlardyń qaıta-qaıta oshaǵyna aınala beredi degen kúmándi oı álem jurtshylyǵyn da oılandyrýy tıis tárizdi. Qalaı degende de yqtımal qaterlerdiń aldyn almasa bolmaıdy!
Anar TÓLEÝHANQYZY
