ەۋروپا پارلامەنتى قىتاي قازاقتارىنىڭ جاعدايىن تالقىلاماقشى گەرمانيا ۇكىمەتى دە بۇل ماسەلەنى جاقىن ارادا كۇن تارتىبىنە الادى دەپ كۇتىلۋدە دەپ حابارلايدى "زامانا".
دۇنيە ءجۇزى قازاقتارىنىڭ V قۇرىلتايىندا ءسوز العان گەرمانيا قازاعى ءومىرحان التىن ەلباسى نۇرسۇلتان نازارباەۆقا قىتاي قازاقتارىنىڭ قۇقىقتارى تاپتالىپ، قاتتى ساياسي قىسىم مەن قۋدالاۋعا تاپ بولىپ جاتقانىن تىكەلەي جەتكىزگەن ەدى.
ەندى، ەۋروپا پارلامەنتى ءومىرحاننىڭ ارىزى بويىنشا الداعى مامىر ايىندا بۇل ماسەلەنى قولعا الماق.
ەۋروپا پارلامەنتىنىڭ ادام قۇقىقتارى جونىندەگى كوميتەتى باستىعىنىڭ ورىنباسارى ۆاربارا لوچۆيحلەر حانىم ءومىرحان التىنعا جازعان حاتىندا وعان شىعىس تۇركىستانداعى جاعداي تۋرالى بەرگەن مالىمەتتەرى ءۇشىن العىسىن بىلدىرە وتىرىپ، ءوزىنىڭ ول جاقتا ادام قۇقىقتارىنىڭ ورەسكەل تۇردە تاپتالۋىنا قاتتى الاڭداۋدا ەكەنىن ايتتى.
سونىمەن بىرگە ءومىرحان التىن جاقىن ارادا گەرمانيا پارلامەنتىنىڭ (بۋندەستاگ) دەپۋتاتى جانە ادام قۇقىقتارى كوميتەتىنىڭ بەلسەندى مۇشەسى مارگارەتە باۋسە حانىممەن كەزدەسىپ، قىتايدا قازاقتار تاپ بولىپ كەلە جاتقان زۇلىمدىقتار، اسسيميلياتسيالاۋ ساياساتى تۋرالى ەگجەي-تەگجەيلى تۇسىندىرگەن.
«قىتايلاردىڭ قازاقتارمەن قاتار ۇيعىر سىندى باسقا دا مۇسىلماندارعا باعىتتالعان ادام سەنگىسىز سان ءتۇرلى قىسىم، قۋدالاۋ تاسىلدەرىن، كارى-جاس دەمەي ءجۇز مىڭداعان ادامداردىڭ جازىقسىز تۇرمەلەرگە قامالۋىن، ەكىگە بولىنگەن وتباسىلاردىڭ ايانىشتى تۇرمىس جاعدايلارىن ەستىگەندە نەمىس دەپۋتاتى ۆاۋسە حانىمنىڭ كوزىنە جاس كەلدى»، – دەيدى ءومىرحان التىن.
گەرمانيا پارلامەنتىنىڭ دەپۋتاتى باۋسە حانىم الداعى كۇندەردە گەرمانيا ۇكىمەتىنىڭ بۇل ماسەلەنى جوعارى دەڭگەيدە قولعا الۋىنا كۇش جۇمسايتىنىن ايتتى.
سونىمەن ەۋروپا پارلامەنتىمەن قاتار گەرمانيا ۇكىمەتى دە قىتايداعى قازاقتاردىڭ جاعدايىن الداعى كۇندەردە قولعا الۋى مۇمكىن.
________________________________________________________________________________________________________________________
Nur.kz
