بيىل – ەرىكتىلەر جىلى. ەل ىشىندەگى وتانسۇيگىش جاستاردىڭ ءبىر ءۇيدىڭ بالاسىنداي ۇيىسىپ، جۇرت كوڭىلىن توعايتار جۇمىستار ىستەپ جاتقانىن اقپاراتتاردان كورىپ قۋانىسىپ جاتىرمىز. اسپان استىن الاڭداتىپ، الەككە سالعان كوروناۆيرۋستىڭ ماشاقاتى دا وڭاي بولىپ جاتقان جوق. وسى كەزدە دە ەرىكتىلەر اققالاتتىلار مەن وتانقورعاۋشىلاردان قالعان ابىرويلى شارۋالاردى وزدىگىنەن ۇيىمداسىپ، بەرەكە-بىرلىكپەن تىندىرۋدا. ەل باسىنا كۇن تۋعاندا جۇدىرىقتاي جۇمىلعان جاستاردىڭ وسىنداي قادامدارىنان ەلدىڭ ەرتەڭىن كورگەنەي بولامىز. ءسوزدىڭ رەتى كەلگەن سوڭ، سىزدەرگە مىناداي ءبىر جۇرەكجىلتار جاڭالىقتى جەتكىزۋدى ءجون كورىپ وتىرمىز.
ەلىمىزدە تارالعان ىندەتتىڭ جاعدايىنان ەل ىشىندەگى عانا ەمەس، الىس-جۋىق شەتەلدەگى قانداستارىمىز دا الاڭداپ جاتىر. قازاقستان – وسى توپىراقتا ءونىپ جاتقان ءسىز بەن ءبىزدىڭ تۋعان ەلىمىز بولسا، الىستاعى قانداستاردىڭ ارقاسۇيەر رۋحاني وتانى. ارينە، رۋحاني وتانىنا ورالۋدى كۇن ساناپ اڭساپ، جابىلعان شەكارانىڭ اشىلۋىن اسىعا كۇتىپ جۇرگەن جاندار قانشاما. تەك تاعدىرىن تۋعان حالقىمەن، اتاجۇرتىمەن بىرلەستىرگىسى كەلەتىن ارعى-بەرگى اعايىننىڭ ءبىر شاڭىراق استىندا باسى تۇگەندەلەر كۇن تۋسىن دەپ تىلەيىك!
قىتايدا تۇراتىن قانداستارىمىز سول ەلدەگى ميليارد حالىقپەن بىرگە ۆيرۋس كۇرەسىندە جەڭىسكە جەتىپ، الاڭ كوڭىلدەن ارىلا باستاعانى بەلگىلى. ىرگەكورشىمىزدە بۇل كۇندە جابىلعان قالالار اشىلىپ، بۇكىل ەل بويىنشا ءوندىرىس پەن جۇمىس، قالىپتى تۇرمىس نەگىزىنەن قالقىنا كەلە باستادى. سول ەلدە تۇراتىن قانداستارىمىز ەندى اتاجۇرتتاعى ءسىز بەن ءبىزدىڭ تاعدىرىمىزعا دا الاڭداۋلى. «التايداعى تاۋتەكەنىڭ تىرسەگىنە تاس تيسە، ارقاداعى ارقاردىڭ ءمۇيىزى سىرقىرايدى» ەمەس پە!
قىتايدا تۇراتىن ءبىر قانداس باۋىرىمىز (اتى-ءجونىن جاريالاماۋدى وتىنگەن) قازاقستاندا اتى جامان ىندەت جايىلا باستاعاننان بەرى ءتۇن ۇيقىسى ءتورت ءبولىنىپ جۇرگەنىن ەستىدىك. ارينە، وسى ءبىر جيىرما ءبىر جاستاعى جاس جىگىت قانا ەمەس، ەلىمىزدەگى قاتەرلى اۋرۋ جاعدايىنان ول ەلدە تۇراتىن ميليونداعان تۋىستارىمىز الاڭداپ جاتقانى بەلگىلى.
سونىمەن، تەپسە تەمىر ۇزەتىن ازامات ءوزىنىڭ ءبىر ايلىق ەڭبەكاقىسىن 5000 يۋان (شامامەن 300 مىڭ تەڭگەگە جۋىق) اقشانى الماتى وبىلىسى ۇزىناعاشتا تۇراتىن قايسا ەسىمدى جىگىتكە جىبەرىپ، «وسى اقشانىڭ جەتىسىنشە، مۇقتاج جاندارعا كەرەك-جاراق الىپ بەرسەڭىز» دەپ ءوتىنىش جاسايدى. قايسا اماناتتى العاننان كەيىن جامبىل وبلىسى، قورداي اۋدانى، وتار اۋىلىندا تۇراتىن، جانۇياسىندا قيىنشىلىعى بار 25 وتباسىنا ازىق-تۇلىكتەر الىپ، جەتكىزىپ بەرىپ قايتتى. ارينە، 300 مىڭ تەڭگە ءبىر قاراعاندا كوپ اقشا بولماعانىمەن، ونىڭ ارجاعىندا جاناشىرلىق پەن ۇلى قاسيەت مەنمۇندالاپ تۇر.
كەشە، 4-ءساۋىر كۇنى ارقايسى وتباسىنا 10 مىڭ تەڭگەدەن اسىپ جىعىلاتىن ازىق-تۇلىك، كەرەك-جاراقتى كولىككە تيەپ الىپ، ەل بويىنشا كارانتين ءجۇرىلىپ جاتقاندا، قاتىستى مەكەمەلەردەن رۇقسات قاعاز الىپ، وتار اۋىلدىق اكىمشىلىگىنەن جاردەمگە ءزارۋ اۋىلداستاردىڭ ءتىزىمىن سۇراپ، سول ءتىزىم بويىنشا، بىرەر كۇن ۋاقىتتارىن شىعارىپ، قايسا اسىلبەكۇلى مەن ساۋلە تالدىباەۆا الىستاعى اقجايساڭ باۋىرىمىزدىڭ جۇرەك جىلۋىن جەتكىزپ قايتىپتى.
ارعى بەتتەن اقجارما سالەمىن جولداپ، الاڭ بولعان اعايىنعا شاماسىنشا جاردەمدەسۋدى ويلاي ءبىلۋدىڭ ءوزى ەستى كىسىنى ويلاندىراتىن، عيبرات الۋعا تاتيتىن، جان تەبىرەنتەر يگى ءىس قوي. الىستاعى ءىنىمىزدىڭ اتى-ءجونىن بىلمەسەك تە، اتاجۇرتىم دەپ ىشكەن اسىن جەرگە قويعان ەرگە ءتان قاسيەتىنە ءتانتى بولىپ، ىشتەي تىلەۋلەستىك بىلدىردىك. ءيا، ءسوزىمىزدىڭ باسىنا قايتا ورالا كەتسەك، بيىل – ەرىكتىلەر جىلى. سول ەرىكتىلەر ۇرانىنا قانى قازاق، شەتەلدىك قانداسىمىز ءۇن قوسىپ جاتقانى ادامعا وي سالادى. كەمەدىنىڭ تىلەۋى ءبىر. «ساۋساق بولەك بولسا دا، بىلەك ءبىر، مەكەن بولەك بولسا دا جۇرەك ءبىر» دەگەن وسى دا. ەستۋگە قاراعاندا ىزەتتى ءىنىمىز پويەز بەكەتىندە جۇك تيەۋشى بولىپ ىستەيدى ەكەن. قازاقتىڭ مارتتىگى قانىندا قالعان بەلگىسىز ازامات وسىلايشا ءبىر تەبىرەنتىپ تاستادى.
ەل ءىشى جامان تىماۋدان ايىعىپ، اعايىنمەن ارقا-جارقا جۇزدەسەتىن كۇن تۋسىن دەگەن تىلەگىمىزدى ايتتىپ، جاڭالىعىمىزدىڭ نۇكتەسىن قويدىق.
ادىلەت احمەتۇلى
